Benjamin Aidoo ដែលជាសមាជិកម្នាក់ក្នុងចំណោមសមាជិក៤នាក់ក្នុងក្រុមរាំសែងមឈូសដ៏ល្បីល្បាញរបស់អាហ្វ្រិក បាននិយាយថាខ្លួនគឺជាអ្នកគាំទ្រដ៏ស្មោះស្ម័គ្ររបស់ខ្សែប្រយុទ្ធឆ្នើម Lionel Messi របស់ក្រុម Barcelona ។ Benjamin…
Benjamin Aidoo ដែលជាសមាជិកម្នាក់ក្នុងចំណោមសមាជិក៤នាក់ក្នុងក្រុមរាំសែងមឈូសដ៏ល្បីល្បាញរបស់អាហ្វ្រិក បាននិយាយថាខ្លួនគឺជាអ្នកគាំទ្រដ៏ស្មោះស្ម័គ្ររបស់ខ្សែប្រយុទ្ធឆ្នើម Lionel Messi របស់ក្រុម Barcelona ។
Benjamin Aidoo សមាជិកក្រុមខាងលើ ដែលកំពុងល្បីល្បាញខ្លាំងនៅទូទាំងពិភពលោក តាមរយៈវីដេអូដែលត្រូវបានចែកចាយ (MEME) តាមរយៈសកម្មភាពរាំសែងមឈូសក្នុងពិធីបុណ្យសព បានប្រាប់ក្នុងបទសម្ភាសន៍ជាមួយវិទ្យុអេស្ប៉ាញ Cadena SER ថា «កីឡាករដែលខ្ញុំចូលចិត្តជាងគេបំផុតគឺ Lionel Messi ខ្ញុំស្រលាញ់គេណាស់ ។ ខ្ញុំចូលចិត្តរបៀបលេងរបស់គេ និងការបញ្ចប់ទីរបស់គេ» ។
«គេមិនមែនជាកីឡាករអាត្មានិយមនោះទេ ។ នោះជារឿងសំខាន់ណាស់ ។ ខ្ញុំចូលចិត្តបាល់ទាត់ ហើយខ្ញុំចូលចិត្តលេងវា។ វាគឺជាចំណូលចិត្តមួយរបស់ខ្ញុំ។ ខ្ញុំក៏ជាអ្នកគាំទ្រក្រុម Barcelona ផងដែរ ប៉ុន្តែគ្រប់យ៉ាងគឺមកពីកីឡាករ Lionel Messi ព្រោះគេជាកីឡាករឆ្នើមបំផុតក្នុងលោក» ។
Aidoo ក៏បានពន្យល់អំពីរឿងរ៉ាវនៅពីក្រោយ សកម្មភាពរាំរបស់ក្រុមខ្លួនក្នុងពិធីបុណ្យសព ដែលកំពុងល្បីល្បាញខ្លាំងក្នុងប្រព័ន្ធអ៊ីនធឺណិតនាពេលបច្ចុប្បន្នថា «យោបល់របស់ខ្ញុំ គឺយើងត្រូវតែអបអរសម្រាប់ពិធីបុណ្យសព ។ ហេតុអ្វី? ព្រោះនៅពេលនរណាចាកចេញពីយើង យើងត្រូវតែចងចាំនូវអ្វីដែលពួកគេបានធ្វើក្នុងជីវិតប្រចាំថ្ងៃ និងអ្វីដែលពួកគេបានធ្វើចំពោះយើង ។ ហើយការធ្វើបែបនេះ វាប្រៀបដូចអ្នកកំពុងបានថ្លែងអំណរគុណទៅកាន់ពួកគេ» ៕ (ដកស្រង់ចេញពី Marca)
ចែករំលែកព័តមាននេះ