រាជធានីភ្នំពេញ ៖អ្នកនិយមទស្សនាខ្សែភាពយន្តអំឡុងទសវត្សរ៍ឆ្នាំ៦០-៧០ ជាពិសេសរឿង «អនអើយស្រីអន» របស់ផលិតកម្មរន្ទះពេជ្រភាពយន្ត ប្រាកដជាស្គាល់តួអង្គកុមារលី រតនៈ ដែលជាតួយអង្គសម្ដែងមានកាយវិការរស់រវើក និងមានទេពកោសល្យខ្ពស់។ យ៉ាងណាក្ដីដោយប្រទេសយើងឆ្លងកាត់របបប្រល័យពូជសាសន៍ខ្មែរក្រហម…
រាជធានីភ្នំពេញ ៖អ្នកនិយមទស្សនាខ្សែភាពយន្តអំឡុងទសវត្សរ៍ឆ្នាំ៦០-៧០ ជាពិសេសរឿង «អនអើយស្រីអន» របស់ផលិតកម្មរន្ទះពេជ្រភាពយន្ត ប្រាកដជាស្គាល់តួអង្គកុមារលី រតនៈ ដែលជាតួយអង្គសម្ដែងមានកាយវិការរស់រវើក និងមានទេពកោសល្យខ្ពស់។ យ៉ាងណាក្ដីដោយប្រទេសយើងឆ្លងកាត់របបប្រល័យពូជសាសន៍ខ្មែរក្រហម មហាជនគិតស្មានថាកុមារារូបនេះប្រហែលជាបង់ជីវិតទៅហើយ។ លី រតនៈ នៅមានជីវិតមកទល់បច្ចុប្បន្ននេះ ។
បើយោងតាមការបង្ហើបឲ្យដឹងពីក្រុមព្រះសុរិយា កាលពីពេល ថ្មីៗកន្លងមកថា តួអង្គកុមារដ៏រស់រវើកក្នុងរឿងអនអើយស្រីអន លោកលី រតនៈ នៅមានជីវិតនៅឡើយ និងកំពុងស្នាក់នៅក្នុងរាជធានីភ្នំពេញ ប៉ុន្តែលោកមិនមានបំណងចេញមុខចេញមាត់ឡើយរហូតមកទល់ពេលនេះ ។ បើតាមក្រុមព្រះសុរិយា បច្ចុប្បន្នលោកលី រតនៈ កំពុងសម្ងំរស់នៅយ៉ាងស្ងៀមស្ងាត់នៅគេហដ្ឋានរបស់លោក ដោយប្រកបអាជីពជាអ្នកធ្វើបទភ្លេងសម្រាប់លក់ទៅឲ្យក្រុមហ៊ុនមួយនៅសហរដ្ឋអាមេរិក ។ លោកតែងតែបដិសេធរាល់ការស្នើសុំធ្វើបទសម្ភាសន៍ពីបណ្តាញសារព័ត៌មាននានា ។
ពាក់ព័ន្ធទៅនឹងជីវប្រវត្តិ យោងតាមការបង្ហោះឃ្លីបវីដេអូរបស់ក្រុមព្រះសុរិយាបានឲ្យដឹងថា លោកលី រតនៈ កើតនៅក្នុងឆ្នាំ១៩៦៥ ក្នុងវង្សត្រកូលដ៏ស្តុកស្តម្ភនៃអ្នកសិល្បៈនិងជាចាងហ្វាងផលិតកម្មរន្ទះពេជ្រភាពយន្តគឺលោកលី ប៊ុនយីម និងតារាស្រីភាពយន្តសម្រស់លំដាប់អន្តរជាតិគឺលោកស្រីវីរៈតារា ។ លោកជាកូនប្រុសច្បងក្នុងចំណោមបងប្អូន៧នាក់ ។
ក្នុងវ័យ៥ឆ្នាំកុមារលី រតនៈ បានចូលសិក្សារៀនភាសាខ្មែរ និងអង់គ្លេសនៅសាលាឯកជនមួយក្នុងរាជធានីភ្នំពេញ ហើយកុមារូបនេះមានភាពវាងវៃជាខ្លាំងដោយអាចអាន និងសរសេរអក្សរបានយ៉ាងឆាប់រហ័ស ហើយឆ្លៀតពីការសិក្សាកុមាររូបនេះបានចូលប្រឡូកក្នុងវិស័យសិល្បៈ ជាមួយនឹងទេពកោលស្យដ៏គួរឲ្យស្ងើចសរសើរផងដែរ ។
ក្នុងអាយុបានប្រហែលជា១ឆ្នាំ ពោលគឺពេលទើបតែប្រសូតចេញពីផ្ទៃម្តាយកុមារលី រតនៈ ត្រូវបានឪពុកលោក លី ប៊ុនយីម យកមកថតឈុតមួយក្នុងរឿងសព្វសិទ្ធិនាឆ្នាំ១៩៦៥ ខណៈពេលដែលអាយុ៣ឆ្នាំ កុមារារូបនេះក៏បានទទួលការស្ងើចសរសើរយ៉ាងខ្លាំង ដោយក្នុងវ័យទើបតែ៣ឆ្នាំតែលោកអាចសម្តែងភាពយន្តបានយ៉ាងល្អ ។
កុមារលី រតនៈ បានបង្ហាញខ្លួនសម្តែងជាតួអង្គកុមារក្នុងខ្សែភាពយន្តខ្នាតអន្តរជាតិរឿង ពុទ្ធិសែននាងកង្រី និងរឿងអដ្ឋិសុវណ្ណ ច័ន្ទកេសរ។ នៅឆ្នាំ១៩៧៣ កុមារលី រតនៈ បានក្លាយជាតួអង្គសំខាន់បែបកំប្លែងស្ងួតជាមួយដៃគូសម្តែងព្រួញមាស នៅក្នុងរឿង«ចំណងដៃទឹកភ្នែក» ហើយក្នុងខ្សែភាពយន្ត ល្បីៗទាំងនោះ កុមាររូបនេះក៏បានក្លាយជាតួអង្គសំខាន់ និងតួឯកនៅក្នុងខ្សែភាពយន្ត៤រឿងដែលមិនទាន់បានចាក់បញ្ចាំងដូចជារឿង សេះសមុទ្រ រឿងនរណាប្រពន្ធខ្ញុំ រឿងភ្នំពកូន និងរឿងដំណើរផ្សងព្រេងរបស់កុមារលី រតនៈ ។
រហូតមកទល់ពេលនេះគឺមានរយៈពេលប្រមាណ៤០ឆ្នាំហើយ គេនៅមិនទាន់ដឹងច្បាស់ទេថា លោកលី រតនៈ អាចមានជីវិតរស់នៅពីការកាប់សម្លាប់ក្នុងរបបខ្មែរបានដោយរបៀបណា ហើយលោកបានសម្ងំនៅទីណា ហើយមូលហេតុអ្វីដែលលោកមិនព្រមចេញមុខជាសាធារណៈឡើងវិញ ក្នុងពេលដែលវិស័យភាពយន្តខ្មែរនាពេលបច្ចុប្បន្នកំពុងតែបោះជំហានទៅមុខ ៕ (កែសម្រួលដោយ ៖ បុប្ផា)
ចែករំលែកព័តមាននេះ