រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា បានចាត់វិធានការចំពោះអតីតនិងមន្ត្រីសហព័ន្ធរបស់ខ្លួនចំនួន៤រូប ដោយសម្រេចព្យួរការងារ និងមិនឱ្យពាក់ព័ន្ធគ្រប់សកម្មភាពកីឡាបាល់ទាត់អស់មួយជីវិតដោយសារមន្ត្រីទាំង៤រូបនេះបានប្រព្រឹត្តកំហុសឆ្គងរំលោភសេចក្ដីទុកចិត្តពាក់ព័ន្ធជាមួយការប្រកួតបាល់ទាត់Tiger Street Football ។ នេះបើតាមលោក…
រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា បានចាត់វិធានការចំពោះអតីតនិងមន្ត្រីសហព័ន្ធរបស់ខ្លួនចំនួន៤រូប ដោយសម្រេចព្យួរការងារ និងមិនឱ្យពាក់ព័ន្ធគ្រប់សកម្មភាពកីឡាបាល់ទាត់អស់មួយជីវិតដោយសារមន្ត្រីទាំង៤រូបនេះបានប្រព្រឹត្តកំហុសឆ្គងរំលោភសេចក្ដីទុកចិត្តពាក់ព័ន្ធជាមួយការប្រកួតបាល់ទាត់Tiger Street Football ។
នេះបើតាមលោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាថ្លែងប្រាប់ឱ្យដឹងនៅក្នុងសន្និសីទសារព័ត៌មានមួយកាលពីរសៀលថ្ងៃទី៦ ឧសភា នៅពហុកីឡដ្ឋានជាតិ។
លោក កែវ សារ៉េត បានថ្លែងថា អំឡុងការសហការរវាងមន្ត្រីសហព័ន្ធ និងក្រុមហ៊ុនស្រាបៀរ Tiger រៀបចំការប្រកួតបាល់ទាត់ Tiger Street Football តាំងពីឆ្នាំ ២០១៣ មកដល់ឆ្នាំ ២០១៩ រកឃើញថា មន្ត្រីសហព័ន្ធទាំង៤រូបនោះមានការកិបកេងប្រាក់ជាង ៣០% ។ ក្រោយការបង្កើតគណៈកម្មការវិន័យ សហព័ន្ធបានរកឃើញបន្ថែមថា ត្រឹមអំឡុងឆ្នាំ ២០១៥ដល់២០១៩មានការកិបកេងប្រាក់ជិត៦ម៉ឺនដុល្លារឯណោះ ។
អំពើនេះហើយទើបបានជាសហព័ន្ធបាល់ទាត់កម្ពុជាប្រជុំគ្នាជាច្រើនលើករហូតឈានដល់ការពិន័យព្យួរសកម្មភាពបាល់ទាត់ពួកគេទាំង៤នាក់អស់មួយជីវិតតែម្ដងក្នុងពេលសាមីខ្លួនទាំង៤ក៏បានសារភាពចំពោះកំហុសនេះដែរ។
ជាចុងក្រោយសហព័ន្ធកីឡាបាល់ទាត់កម្ពុជាបញ្ជាក់ថា ការចាត់វិធានការនេះ បន្ទាប់ពីមន្ត្រីខាងលើបានប្រព្រឹត្តកំហុសយ៉ាងធ្ងន់ធ្ងរផ្ទុយនឹងក្រមសីលធម៌ និងវិន័យរបស់សហព័ន្ធ ។
ក្នុងនោះ លោក ម៉ៃ តុលា ត្រូវបញ្ជូនសំណុំរឿងប្រព្រឹត្តអំពើពុករលួយទៅតុលាការដើម្បីចាត់ការ
ទៅតាមផ្លូវច្បាប់ ។ មន្ត្រីទាំង៤រូបនោះ មានលោក ម៉ៃ តុលា អគ្គលេខាធិការរង លោក គល់ សុភារម្យ ប្រធានការិយាល័យរដ្ឋបាល លោក ឆាំង ពិសិដ្ឋ ប្រធានការិយាល័យប្រកួត និងលោក ទុយ វិច្ឆិកា ប្រធានការិយាល័យអាជ្ញាកណ្តាល៕ (កែសម្រួលដោយ ៖ បុប្ផា)
ចែករំលែកព័តមាននេះ