រាជធានីភ្នំពេញ ៖ ទោះបីជាមិនបានបង្ហាញប្រាប់ពីចំនួនសរុបនៃការទទួលបានលក់ដាច់ស្លាកលេខពិសេសរយៈពេល៤ខែមកនេះក្តី ក្រសួងសាធារណការ និងដឹកជញ្ជូនបានឲ្យដឹងថា មួយថ្ងៃលក់ស្លាកលេខពិសេសបានប្រមាណពី១០ទៅជាង២០ស្លាកលេខក្នុងមួយថ្ងៃ ។ នេះបើតាម អ្នកនាំពាក្យក្រសួងដឹកជញ្ជូន ។
ការបញ្ជាក់របស់អ្នកនាំពាក្យក្រសួងដឹកជញ្ជូន បន្ទាប់ពីរាជរដ្ឋាភិបាលបានចាប់ផ្តើមពង្រឹងការអនុវត្តន៍ច្បាប់ចរាចរណ៍ផ្លូវគោក កាលពីថ្ងៃទី១ ខែឧសភា ឆ្នាំ២០២០មក ។
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូនបានឲ្យកោះសន្តិភាពដឹងតាមទូរស័ព្ទនារសៀលថ្ងៃទី៨ ខែឧសភា ឆ្នាំ២០២០យ៉ាងដូច្នេះថា៖« ចំពោះស្លាកលេខពិសេសនៅតែមានអតិថិជននៅតែដាក់ពាក្យទិញជាធម្មតា ប៉ុន្តែគ្រាន់តែមានចំនួនតិចជាងកាលពីពេលមិនទាន់មានជំងឺកូវីដ១៩ចូលមកកម្ពុជា ។ លោកបញ្ជាក់ថា ៖«ជាទូទៅកាលណាគាត់ទិញស្លាកលេខពិសេស ហើយគាត់បានកិបជាមួយរថយន្តដោយមិនទុកនោះទេ ។
ចំណែកតួលេខវិញ ក្រសួងមិនទាន់បូកសរុបនោះទេ ហើយថ្នាក់ដឹកនាំក្រសួង គឺលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសារធារណការ នឹងដឹកជញ្ជូនគ្រោងនឹងបង្ហាញជាសាធារណៈក្នុងសន្នីសីទសារព័ត៌មាន ប៉ុន្តែមិនមែនពេលឥឡូវនោះទេ ។ តែគាត់គ្រោងបង្ហាញដែរ ប៉ុន្តែដោយសារជំងឺកូវីដ១៩អ្វីៗប្រែប្រួលអីញ្ចឹង» ។
យ៉ាងណាក្តីអ្នកនាំពាក្យបានអះអាងទោះបីជាជំងឺកូវីដ១៩ បានឆ្លងនៅក្នុងប្រទេសកម្ពុជាក្តី ក៏ការលក់ស្លាក់លេខរថយន្តពិសេសនៅតែបន្តលក់ជាធម្មតា ព្រោះថា ការលក់ស្លាកលេខនេះ ធ្វើតាមប្រព័ន្ធអនឡាញ ដោយប្រជាពលរដ្ឋអាចចូលមើលកុម្ម៉ង់បាន ។
អ្នកនាំពាក្យដដែលក៏បានលើកឡើងថា តាមសេវាជាក់ស្តែងប្រចាំថ្ងៃស្លាកលេខពិសេសលក់បានប្រមាណពី១០ ទៅ២០ស្លាក់លេខ ឬលើសពីនេះក្នុងរយៈពេលមួយថ្ងៃ ។ ក្នុងមួយរយៈ ពេលមុនបានច្រើន ប៉ុន្តែក្នុងរយៈពេលជំងឺកូវីដ១៩ផ្ទុះមានភាពស្ងប់ស្ងាត់ ។ ប៉ុន្តែបន្ទាប់ពីមានការរឹតបណ្តឹងច្បាប់ចរាចរណ៍មកការធ្វើប័ណ្ណបើកបរការធ្វើឆៀក និងការបញ្ចុះបញ្ជីរថយន្តក៏ឡើង ។
លោកបញ្ជាក់ថា៖«ពិសេសនោះការធ្វើស្លាកលេខពិសេសក៏មានចំនួនកើនឡើងផងដែរ ដោយក្រុមការងារមានការមមាញឹករហូតដល់ថែមម៉ោងធ្វើការផងដែរ ។ យើងទទួលបានមួយថ្ងៃពី១០ទៅលើសពី២០ស្លាកលេខ ។ ចំនួននេះមានកើនឡើងគ្រប់សេវាពាក់ព័ន្ធនឹងវិស័យដឹកជញ្ជូន» ។
សូមជម្រាបថា ស្លាកលេខពិសេសត្រូវបានក្រសួងសារធារណការ និងដឹកជញ្ជូនដាក់ដំណើរលក់ជាផ្លូវការ កាលពីថ្ងៃទី៧ ខែមករា ឆ្នាំ២០២០ នៅផ្សារទំនើបអីអនម៉ល ។ ស្លាកលេខពិសេសត្រូវបានដាក់លក់ដោយតម្លៃផ្សេងៗគ្នា ទៅតាមម្ចាស់រថយន្តចង់បាន ៕
ចែករំលែកព័តមាននេះ