ខេត្តក្រចេះ ៖ សម្ភារសម្រាប់ទ្រទ្រង់លើផ្នែកសុខាភិបាល ដែលបានមកពីការផ្តល់ជូនពីសប្បុរសជន ត្រូវបានលោក វ៉ា ថន អភិបាលខេត្ត បន្តនាំយកទៅប្រគល់ជូនដល់ដល់តំបន់ប្រតិបត្តិការសឹករងខេត្ត ដើម្បីលើកកំពស់សុខភាពមូលដ្ឋានកងទ័ព…
ខេត្តក្រចេះ ៖ សម្ភារសម្រាប់ទ្រទ្រង់លើផ្នែកសុខាភិបាល ដែលបានមកពីការផ្តល់ជូនពីសប្បុរសជន ត្រូវបានលោក វ៉ា ថន អភិបាលខេត្ត បន្តនាំយកទៅប្រគល់ជូនដល់ដល់តំបន់ប្រតិបត្តិការសឹករងខេត្ត ដើម្បីលើកកំពស់សុខភាពមូលដ្ឋានកងទ័ព និងគ្រួសារកងទ័ពបង្ការទប់ស្កាត់ពីជំងឺកូវីដ-១៩ ។
ការនាំយកអំណោយជាសម្ភារសង្គ្រោះដល់ទីបញ្ជាការសឹករងខេត្តពីរដ្ឋបាលខេត្ត ក្រោមការដឹកនាំដោយលោក វ៉ា ថន អភិបាលខេត្ត បានធ្វើឡើងនៅថ្ងៃទី៨ ឧសភា ដោយសម្ភារទាំងនោះរួមមានថវិកា១០លានរៀល ម៉ាស់ពណ៌ផ្ទៃមេឃចំនួន១កេសធំ ថ្នាំសម្លាប់មេរោគ (ក្លរ)១ធុង ទឹកសាប៊ូលាងដៃ២កេស ទឹកអាល់កុល២កេស ស្រោមដៃ៥កេស ម៉ាស់ពណ៌ស១កេសធំ ។
អភិបាលខេត្តក្រចេះ លោក វ៉ា ថន បានមានប្រសាសន៍ថ្លែងទៅកាន់ លោកមេបញ្ជាការ មេបញ្ជាការរងយោធាខេត្ត នាឱកាសនោះថា បើទោះបីជាខេត្តក្រចេះ មិនមានអត្រាអ្នកឆ្លងមេ រោគកូវីដ-19 ហើយសព្វថ្ងៃអត្រាឆ្លង និងអ្នកជាសះស្បើយនៅប្រទេសកម្ពុជាមានអត្រាធ្លាក់ចុះយ៉ាងណាក្តី តែយើងទាំងអស់គ្នាត្រូវតែមានការប្រុងប្រយ័ត្នបង្ការការពារការផ្ទុះឆ្លងមេរោគសាកលមួយនេះ ដោយត្រូវអនុវត្តទៅតាមការណែនាំរបស់ក្រសួងសុខាភិបាល។
ប្រធានគណៈកម្មាធិការប្រឆាំងមេរោងកូវីដ-19 និងជាអភិបាលខេត្តក្រចេះ លោក វ៉ា ថន បានថ្លែងទៀតថា កន្លងមក អំណោយជាសម្ភារនិងថវិកាដែលរដ្ឋបាលខេត្តទទួលបានពីសប្បុរសជន គឺរដ្ឋបាលខេត្ត បាននឹងកំពុងធ្វើការប្រគល់ជូនអាជ្ញាធរជំនាញ និងចែកជូនបងប្អូនប្រជាពលរដ្ឋដែលខ្វះខាតជីវភាព និងជាពិសេស បងប្អូនកម្មករពលករដែលត្រឡប់មកពីធ្វើការងារនៅក្រៅប្រទេសធ្វើដំណើរចូលមកភូមិកំណើតរបស់ខ្លួនវិញ ហើយត្រូវបាន អាជ្ញាធររៀបចំដាក់ឲ្យពួកគាត់រស់នៅដាច់ដោយឡែកពីគ្រួសារចំនួន១៤ថ្ងៃ ក្នុងការតាមដានស្ថានភាពជំងឺកូវីដ-១៩ ។
ចែករំលែកព័តមាននេះ