ប្រទេសជប៉ុន ៖ តាមប្រភពព័ត៌មាន CNN បានឱ្យដឹងថា ប្រទេសជប៉ុន បានយល់ព្រមប្រើវិធីព្យាបាលដោយថ្នាំប្រឆាំងវីរុស Remdesivir ក្នុងការសាកល្បងសម្រាប់ការព្យាបាលទៅលើអ្នកជំងឺកូវីដ១៩ ដែលមានស្ថានភាពធ្ងន់ធ្ងរ។
ក្រុមអ្នកស្រាវជ្រាវនៅសហរដ្ឋអាមេរិក បានចេញផ្សាយព័ត៌មានល្អៗ មួយចំនួនកាលពីសប្តាហ៍មុន អំពីការព្យាបាលដែលអាចធ្វើទៅបានក្នុងការសម្លាប់វីរុសកូរ៉ូណា ដែលជាអំណះអំណាងបង្ហាញថា ថ្នាំនេះ អាចជួយឱ្យអ្នកជំងឺឆាប់ជាពីជំងឺនេះជាងការមិនប្រើថ្នាំនេះ។
រដ្ឋបាលចំណីអាហារ និងឱសថអាមេរិក (FDA) បានអនុញ្ញាតឱ្យប្រើប្រាស់ថ្នាំ Remdesivir ជាថ្នាំប្រើប្រាស់ក្នុងស្ថានភាពបន្ទាន់ ទៅលើអ្នកជំងឺកូវីដ១៩ធ្ងន់ធ្ងរ។
ក្រសួងសុខាភិបាល និងសុខុមាលភាពជប៉ុន បានផ្តល់ការយល់ព្រមពិសេសចំពោះថ្នាំ ដែលធ្វើឡើងដោយក្រុមហ៊ុនថ្នាំ Gilead របស់អាមេរិក ក្រោយពីការដាក់ស្នើសុំការយល់ព្រមរយៈពេល៣ថ្ងៃ។
គួរបញ្ជាក់ផងដែរថា ជប៉ុននៅមានពេលនេះ មានករណីឆ្លងកូវីដ១៩ សរុប ១៥,៤៧៧ករណី ករណីឆ្លងថ្មី មិនមានបញ្ជាក់ ករណីបាត់បង់ជីវិតសរុប ៥៧៧ករណី ករណីបាត់បង់ជីវិតថ្មី មិនមានបញ្ជាក់ និងករណីជាសះស្បើយសរុប ៤,៩១៨ករណី៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ