រាជធានីភ្នំពេញ ៖ ឯកឧត្តមបណ្ឌិតសភាចារ្យ ហង់ ជួនណារុន រដ្ឋមន្ត្រីក្រសួងអប់រំយុវជន និងកីឡា មកដល់នេះមិនទាន់បានកំណត់ពេលវេលា ណាមួយអោយច្បាស់លាស់នៅឡើយទេ ដើម្បីឈានទៅការបើកសាលារៀនទាំងអស់ឡើងវិញ លទ្ធភាពអាចបើកសាលារៀននៅទូទាំងប្រទេសលុះត្រាស្ថានភាពឆ្លងរីករាលដាលនៃកូវីដ–១៩ អាចគ្រប់គ្រងបានទូទាំងពិភពលោក ។
ក្នុងកិច្ចសម្ភាសជាមួយនឹងទូរទស្សន៍ស៊ីអិនស៊ី កាលពីល្ងាចថ្ងៃទី០៧ ឧសភា ២០២០ លោករដ្ឋមន្ត្រីបានលើកឡើងថា ថ្នាក់ដឹកនាំក្រសួងអប់រំ កំពុងតាមដានជាប្រចាំ ហើយលទ្ធភាពអាចបើកសាលាឲ្យសិស្សចូលរៀនវិញបាន លុះត្រាស្ថានភាពឆ្លងរីករាលដាលនៃកូវីដ១៩ អាចគ្រប់គ្រងបានទូទាំងពិភពលោក ។
បណ្ឌិតសភាចារ្យ ហង់ ជួនណារ៉ុន បន្តថា អាចគ្រប់គ្រងបាននោះមានន័យថា គ្រប់គ្រងបានគ្រប់កន្លែង ហើយជាពិសេសនៅក្នុងតំបន់ ។ ក្នុងតំបន់មានប្រទេសជិតខាងកម្ពុជា ដូចជាប្រទេសវៀតណាម ថៃ និងប្រទេសឡាវជាដើម ព្រោះថា ប្រទេសជិតខាងរមែងមានលំហូរ ប្រជាជនទៅវិញទៅមក ជាពិសេសពលករ ។ ត្រូវពិនិត្យមើលស្ថានភាពប្រទេសក្នុងតំបន់អាស៊ានទៅទៀត មានជាអាទិ៍ ប្រទេសម៉ាឡេស៊ី សិង្ហបុរី តើប្រទេសទាំងអស់នោះអាចគ្រប់បានដែរឬទេ ? ដូច្នេះបើប្រទេសទាំងអស់នោះ មិនទាន់អាចគ្រប់គ្រងបានទេ កម្ពុជាក៏មិនទាន់អាចបើកសាលារៀនបានវិញដែរ ។
លោករដ្ឋមន្ត្រីក្រសួងអប់រំយុវជននិងកីឡា បានឲ្យដឹងទៀតថា ក្រសួងអប់រំ ធ្វើការងារដោយមានការទទួលខុសត្រូវខ្ពស់បំផុតជាមួយមាតាបិតាសិស្ស ចំពោះប្រទេសជាតិ ក្នុងការធានាសុវត្ថិភាពរបស់សិស្ស ។ លោកបានរម្លឹកថា ករណីបិទសាលានៅខេត្តសៀមរាប គឺជាវិធានការមួយឆ្លើយតបទាន់ពេលបំផុត ហើយផ្ទុយទៅវិញបើមិនមានការបិទសាលារៀនទាន់ពេលទេ ម្ល៉េះនឹងអាចមានការឆ្លងទៅសិស្ស ហើយសិស្សនឹងចម្លងទៅគ្រូ និងឪពុកម្ដាយ ពេលនោះហើយ ការឆ្លងក្នុងសហគមន៍កម្រិតធំ នឹងអាចកើតមាននៅក្នុងប្រទេសកម្ពុជា ។
សូមបញ្ជាក់ថា បច្ចុប្បន្ននេះ មានប្រទេស៩ប៉ុណ្ណោះ បានបើកសាលាវិញ ក្នុងចំណោមប្រទេសជិត២០០ លើពិភពលោក ដែលគេបានបិទ ។ ហើយប្រទេស៩ ដែលបានបើកនោះ គឺក្នុងមួយបន្ទប់ មានសិស្សតែ២០នាក់ទេ ដោយសិស្សត្រូវនៅឆ្ងាយពីគ្នា ដល់ទៅ២ម៉ែត្រ និងមិនអាចប៉ះពាល់ជាមួយគ្រូ និងទំនាក់ទំនងជាមួយសិស្សដទៃទៀតឡើយ ៕
កិច្ចសម្ភាសន៍ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ជាមួយទូរទស្សន៍ CNC
ចែករំលែកព័តមាននេះ