រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបន្តក្រើនរំលឹកដល់ប្រជាពលរដ្ឋឲ្យមានការប្រុងប្រយ័ត្ន ក្នុងការទប់ស្កាត់ឆ្លងជំងឺកូវីដ១៩ ។ ការក្រើនរំលឹករបស់ប្រមុខរាជរដ្ឋាភិបាល ខណៈដែលក្រសួងសុខាភិបាកបានបង្ហាញអ្នកឆ្លងជំងឺកូវីដ១៩នៅកម្ពុជាចំនួន២នាក់កំពុងសម្រាកព្យាបាល…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបន្តក្រើនរំលឹកដល់ប្រជាពលរដ្ឋឲ្យមានការប្រុងប្រយ័ត្ន ក្នុងការទប់ស្កាត់ឆ្លងជំងឺកូវីដ១៩ ។ ការក្រើនរំលឹករបស់ប្រមុខរាជរដ្ឋាភិបាល ខណៈដែលក្រសួងសុខាភិបាកបានបង្ហាញអ្នកឆ្លងជំងឺកូវីដ១៩នៅកម្ពុជាចំនួន២នាក់កំពុងសម្រាកព្យាបាល ក្នុងចំណោម១២២នាក់ដែលឆ្លងជំងឺនេះ។
សម្តេចបានសរសេរលើបណ្តាញសង្គម នៅថ្ងៃទី៨ ឧសភាថា ៖ សុខសប្បាយជាទេបងប្អូនជនរួមជាតិ ។ ឆ្លៀតពេលនេះ ខ្ញុំសូមដាស់តឿន និងក្រើនរំឮកដល់បងប្អូនជនរួមជាតិ និងក្មួយៗ គឺត្រូវនាំគ្នាយកចិត្តទុកដាក់ពីការថែទាំសុខភាព ចៀសវាងការឆ្លងរោគកូវីដ១៩ ។ ទោះបីអត្រាឆ្លងនៃជំងឺកូវីដ១៩ ត្រូវបានធ្លាក់ចុះនៅក្នុងប្រទេសកម្ពុជាយើងក្តី ហើយអត្រានៃការព្យាបាលអ្នកជំងឺនេះបានជាសះស្បើយនៅសល់តែ២នាក់ទៀតប៉ុណ្ណោះក្តី ក៏យើងមិនត្រូវធ្វេសប្រហែស ហើយគិតស្រាលថា ជំងឺនេះមិនអីទេ នៅក្នុងប្រទេសកម្ពុជាឬគិតថា កម្ពុជាជាប្រទេសក្តៅមិនងាយឆ្លង គឺមិនដូច្នេះទេ ។ ព្រោះជំងឺនេះជាជំងឺកាចសាហាវហើយងាយឆ្លងពីម្នាក់ទៅម្នាក់លឿនខ្លាំងណាស់» ។
សម្តេចថាមកទល់ពេលនេះទាំងកម្ពុជា និងពិភពលោក គឺកំពុងរួមដៃគ្នាប្រយុទ្ធប្រឆាំងនឹងជំងឺកូវីដ១៩ ហើយថ្នាំព្យាបាលជំងឺនេះក៏មិនទាន់រកឃើញនៅឡើយដែរ ។ ដូច្នេះជំងឺដ៏កាចសាហាវនេះ នៅតែបន្តយាយីអាយុជីវិតពលរដ្ឋនៅទូទាំងពិភពលោក ដែលប្រទេសមួយចំនួនធំកំពុងបិទប្រទេសគេនៅឡើយ ។
សម្តេចសង្កត់ធ្ងន់ថា ៖ ទោះបីនៅក្នុងរាជធានីភ្នំពេញក្តី ឬនៅតាមបណ្តាខេត្តក្រុង ឬជនបទក្តី សូមបងប្អូនបន្តពាក់ម៉ាស ឬក្រមាការពារ និងដុសលាងសម្អាតដៃដោយទឹកអាល់កុល ឬទឹកជឹលសម្អាតកម្ចាត់មេរោគនឹងបាក់តេរីផ្សេងៗអោយបានជាប្រចាំ ចៀសវាងការចម្លងរោគពីម្នាក់ទៅម្នាក់ដែលនាំមកនូវការសោកស្តាយអស់មួយជីវិត»។ ជាមួយគ្នានោះដែរសម្តេចក៏សូមឲ្យប្រជាពលរដ្ឋរាយការណ៍មកក្រសួងសុខាភិបាលជាបន្ទាន់ក្នុងករណីមានការសង្ស័យណាមួយតាមរយៈលេខ ១១៥ ៕
ចែករំលែកព័តមាននេះ