មហាសេដ្ឋី Bill Gates ថាពិភព លោកនឹងរឹងមាំជាងពេលមុនៗទាំងអស់
មហាសេដ្ឋី និងសប្បុរសជន ប៊ីល ហ្គេតស៍ (Bill Gates) និងភរិយាគឺអ្នកស្រី មេលីនដា ហ្គេតស៍ (Melinda…
មហាសេដ្ឋី និងសប្បុរសជន ប៊ីល ហ្គេតស៍ (Bill Gates) និងភរិយាគឺអ្នកស្រី មេលីនដា ហ្គេតស៍ (Melinda…
មហាសេដ្ឋី និងសប្បុរសជន ប៊ីល ហ្គេតស៍ (Bill Gates) និងភរិយាគឺអ្នកស្រី មេលីនដា ហ្គេតស៍ (Melinda Gates) បានចែករំលែកសន្ទរកថាមួយកាលពីថ្ងៃសុក្រដែលជូនដល់សិក្សានុសិស្សដែលត្រូវបញ្ចប់ការសិក្សាក្នុងឆ្នាំនេះតែត្រូវពន្យាពេល ឬផ្អាកទាំងស្រុងព្រោះតែកូវីដ ១៩ ។ សន្ទរកថានេះត្រូវបានផ្សព្វផ្សាយដោយសារព័ត៌មាន Wall Street Journal ។
អ្នកទាំងពីរបានសរសេរថា «តើវាមានអត្ថន័យយ៉ាងដូចម្តេចសម្រាប់ជំពូកបន្ទាប់ក្នុងជីវិតរបស់អ្នក? ក្នុងនាមជាសមាជិកម្នាក់ក្នុងសហគមន៍ពិភពលោករបស់ពួកយើង សកម្មភាពរបស់អ្នកអាចជះឥទ្ធិពលជុំវិញពិភពលោកបាន ។ មិនថាអ្នកមានគោលដៅអ្វី រស់នៅឯណា មានសមាសភាពជានរណាទេ អ្នកតែងតែមានវិធីតូចនិងធំក្នុងការចូលរួមដើម្បីធ្វើឲ្យពិភពលោកកាន់តែល្អប្រសើរសម្រាប់មនុស្សគ្រប់គ្នា» ។
យ៉ាងណាក្តី ស្វាមី និងភរិយាដ៏ជោគជ័យទាំងពីររូបបានទទួលស្គាល់ថា សម្រាប់សិស្សានុសិស្សដែលទើបតែបញ្ចប់ការសិក្សា ពួកគេប្រហែលជាមិនទាន់គិតពីការចូលរួមជួយដល់ពិភពលោកទេព្រោះពួកគេមានរឿងច្រើនដែលត្រូវខ្វល់ដូចជាសុខភាព គ្រួសារ និងទីផ្សារការងារជាដើម ។ប៉ុន្តែអ្នកទាំងពីរបានផ្តល់នូវទស្សនៈដ៏សុទិដ្ឋនិយមដោយបាននិយាយថា ពិភពលោកធ្លាប់បានឆ្លងកាត់គ្រោះភ័យពីមុនៗច្រើនដងមកហើយដែលមិនមែនកើតឡើងដោយចៃដន្យ ឬព្រោះតែនិស្ស័យទេ ។ ផ្ទុយមកវិញ វាជាលទ្ធផលនៃមនុស្សដែលបានប្តេជ្ញាខិតខំប្រឹងប្រែងដើម្បីអភិវឌ្ឍន៍ពិភពលោកសម្រាប់មនុស្សគ្រប់គ្នា ។
លោក និងលោកស្រី ហ្គេតស៍ បានបញ្ចប់សន្ទរកថារបស់អ្នកទាំងពីរដោយបាននិយាយថា «ពួកយើងនឹងឆ្លងផុត ។ ហើយក្រោមការដឹកនាំរបស់អ្នក ពិភពលោកនឹងរឹងមាំជាងពេលមុនៗទាំងអស់» ។
គួរបញ្ជាក់ផងដែរថា ស្វាមីនិងភរិយាខាងលើមានភាពសកម្មណាស់ក្នុងការចែករំលែកក្រោមប្រធានបទកូវីដ ១៩ ក្នុងពេលថ្មីៗនេះ ហើយមូលនិធិសប្បុរសធម៌របស់អ្នកទាំងពីរបានបរិច្ចាគថវិកា ២៥០លានដុល្លារដើម្បីឆ្លើយតបនឹងការផ្ទុះជម្ងឺនេះផងដែរ ៕
ចែករំលែកព័តមាននេះ