ខេត្តមណ្ឌលគិរី ៖ សាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំខេត្តមណ្ឌលគិរី (ក.ប.ប) សហការជាមួយមន្ទីរពាណិជ្ជកម្មខេត្ត ចុះត្រួតពិនិត្យមើលការដាក់តាំងលក់សម្ភារៈការពារកូវីដ១៩ និងផ្សព្វផ្សាយណែនាំ និងអនុវត្តប្រកាសអន្តរក្រសួង ស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ទនៈនៅកម្ពុជា ដែលប្រព្រឹត្តទៅនៅក្រុងសែនមនោរម្យ កាលពីព្រឹកថ្ងៃទី៤ ខែឧសភា ឆ្នាំ២០២០។
ក្នុងការចុះត្រួតពិនិត្យនោះដែរ មន្ត្រីជំនាញបានផ្ដោតសំខាន់ទៅលើតម្លៃម៉ាស់ ជែលសម្អាតដៃ សាប៊ូ អាល់កុល និងប្រភពនាំចូល ចំណែកលទ្ធផលពិនិត្យ គឺឃើញថាល្អប្រសើរ មិនមានទំនិញហាមឃាត់នោះទេហើយមន្ត្រីជំនាញក៏បានណែនាំដល់អាជីវករឱ្យនាំយកទំនិញដែលមានប្រភពច្បាស់លាស់មកលក់ ជាពិសេស គឺអាល់កុល ព្រោះថា ប្រសិនមុខទំនិញគ្មានប្រភពពិតប្រាកដ អាចជាទំនិញក្លែងបន្លំរបស់ក្រុមឆ្លៀតឱកាស និងធ្វើឱ្យប៉ះពាល់សុខភាពអ្នកប្រើប្រាស់។
មន្ត្រីជំនាញក៏បានណែនាំដល់អាជីវករគ្រប់រូបដែលតាំងលក់អាល់កុល សាប៊ូ ជែល និងម៉ាស់ ត្រូវសរសេរតម្លៃបិទភ្ជាប់ជាមួយមុខទំនិញគ្រប់មុខក្នុងតម្លៃសមរម្យទូទៅ តាមការកំណត់របស់ក្រសួងពាណិជ្ជកម្ម ចៀសវាងការកេងចំណេញហួសហេតុ ក្នុងករណីដែលអាជីវករដំឡើងថ្លៃខ្ពស់ខុសពីការជូនដំណឹងជំនាញពាក់ព័ន្ធ និងសហការចាត់វិធានការផ្លូវច្បាប់។
នាឱកាសនោះ លោក ចាន់ វាសនា បានណែនាំដល់ម្ចាស់ស្ថានីយ៍ និងដេប៉ូប្រេងឥន្ទៈទាំងអស់ ក្នុងខេត្តមណ្ឌលគិរី ត្រូវលក់តាមតម្លៃដែលបានកំណត់ក្នុងសេចក្តីជូនដំណឹងរបស់ក្រសួងពាណិជ្ជកម្ម មិនអនុញ្ញាតឱ្យលក់លើសតម្លៃដែលក្រសួងបានកំណត់នោះឡើយ ហើយម្ចាស់ស្ថានីយ៍ និងដេប៉ូត្រូវមានកាតព្វកិច្ចទទួលខុសត្រូវក្នុងការតាមដានព័ត៌មានអំពីការកំណត់ថ្លៃប្រេងឥន្ទៈរបស់ក្រសួងពាណិជ្ជកម្ម តាមរយៈក្រុមហ៊ុនផ្គត់ផ្គង់ និងចែកចាយប្រេងឥន្ទៈបានផ្តល់ជូន។
លោកបញ្ជាក់ថា ក្នុងករណីម្ចាស់ស្ថានីយ និងដេប៉ូប្រងឥន្ទនៈទាំងអស់ខកខានមិនបាន ឬមិនព្រមអនុវត្តន៍ត្រឹមត្រូវតាមការណែនាំនោះ នឹងត្រូវទទួលវិធានការពិន័យអន្តរការណ៍ជាប្រាក់ទៅតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ