ប្រទេសស្វ៊ីស ៖ ក្រុមប្រឹក្សាអន្តរជាតិនៃគិលានុប្បដ្ឋាយិកា CII វាយតម្លៃកាលពីថ្ងៃទី៦ ឧសភា ថា សមាជិកបុគ្គលិកព្យាបាលជំងឺ COVID-19ដល់ទៅជាង៩០.០០០នាក់ បានឆ្លងវីរុសនេះលើពិភពលោក…
ប្រទេសស្វ៊ីស ៖ ក្រុមប្រឹក្សាអន្តរជាតិនៃគិលានុប្បដ្ឋាយិកា CII វាយតម្លៃកាលពីថ្ងៃទី៦ ឧសភា ថា សមាជិកបុគ្គលិកព្យាបាលជំងឺ COVID-19ដល់ទៅជាង៩០.០០០នាក់ បានឆ្លងវីរុសនេះលើពិភពលោក ។ អង្គការនោះគូសបញ្ជាក់ថា តួលេខអាចមានខ្ពស់ជាងនោះដល់ទៅ២ដង ។
អង្គការនេះដែលមានមូលដ្ឋាននៅក្រុងហ្សឺណែវ ប្រទេសស្វ៊ីស ហើយជាតំណាងរបស់បុគ្គលិកសុខាភិបាលដល់ទៅជាង២០លាននាក់ អះអាងទៀតថា វីរុសបានសម្លាប់គិលានុប្បដ្ឋាក ឬគិលានុប្បដ្ឋាយិកាជាង២៦០នាក់ ចាប់តាំងពីវាលេចដំបូងនៅចិនពីខែធ្នូមក ។ ក្នុងសេចក្ដីប្រកាសមួយ CII បានស្នើដល់អាជ្ញាធរទាំងឡាយឲ្យចាត់បណ្ដាវិធានការទប់ការឆ្លងរាលដាលនៃវីរុស ខណៈបុគ្គលិកសុខាភិបាលនៅតែប្រឈមមុខចំពោះការខ្វះខាតបណ្ដាឧបករណ៍ការពារ ។
ចំនួនបុគ្គលិកសុខាភិបាលដែលឆ្លងវីរុសពេលនេះបានកើនពី២៣.០០០នាក់ ដល់ជាង៩០.០០០នាក់ ហើយនោះអាចជាតួលេខនៅទាប ព្រោះនៅមិនទាន់រាប់បញ្ចូលពីគ្រប់ប្រទេសនៅឡើយ ។
លោក HOWARD CATTON អគ្គនាយករបស់ CII ថ្លែងទៅកាន់ REUTERS TELEVISIONថា ការវាយតម្លៃនោះផ្អែកលើបណ្ដាព័ត៌មាន ដែលប្រមូលបានក្នុងប្រទេសតែ៣០ព្រមទាំងទិន្នន័យរបស់បណ្ដារដ្ឋាភិបាល ព្រមទាំងបណ្ដាសារព័ត៌មាន ។
លោកបន្តថាអត្រានៃការឆ្លងវីរុសដល់បណ្ដាសមាជិកបុគ្គលិកសុខាភិបាលមានប្រមាណជា៦% ជាមួយអ្នកឆ្លងសរុបលើពិភពលោកនាពេលនេះឡើងដល់ជាង៣.៥លាននាក់ ហើយបុគ្គលិកសុខាភិបាលដែលឆ្លងអាចមានដល់ជាង២០០.០០០នាក់ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ