ប្រទេសអុីតាលី ៖ ខ្សែប្រយុទ្ធ របស់ក្រុមសេះបង្កង់ Juventus បានជាសះស្បើយយ៉ាងពេញលេញពីជំងឺរលាកផ្លូវដង្ហើមបណ្តាលមកពីវីរុសកូវីដ-១៩ បន្ទាប់ពីប្រើពេលជិត៧សប្តាហ៍ក្នុងការព្យាបាល ។
នៅក្នុងសេចក្តីថ្លែងការណ៍មួយកាលពីថ្ងៃពុធក្លិបបាល់ទាត់ Juventus បានបញ្ជាក់ថា ការធ្វើតេស្ត២លើកចុងក្រោយលើកីឡាករ Paulo Dybala បានបង្ហាញលទ្ធផលត្រឡប់មកវិញគឺ អវិជ្ជមានសម្រាប់វីរុសកូវីដ-១៩ ខណៈដែលកីឡាករខ្លួនឯងក៏បានបង្ហោះបញ្ជាក់ ក្នុងបណ្តាញទំនាក់ទំនងសង្គមរបស់ខ្លួនផងដែរ ។
«Paulo Dybala បានអនុវត្តដូចគ្នានឹងពិធីសារក្នុងការតេស្តចំនួនពីរដងសម្រាប់វីរុសកូវីដ-១៩ ដែលបានត្រឡប់មកវិញជាមួយនឹងលទ្ធផលអវិជ្ជមាន។ ដូច្នេះមានន័យថាកីឡាករ បានជាសះស្បើយពេញលេញ នឹងមិនត្រូវបានដាក់ឲ្យនៅដាច់ដោយឡែកពីគេក្នុងផ្ទះបន្តទៀតទេ» ។
សូមរំលឹកជូនថា ក្លិបសេះបង្កង់ Juventus បានចេញសេចក្តីប្រកាសកាលពីថ្ងៃទី ២១ ខែ មីនាកន្លងទៅថាទាំង Paulo Dybala និងមិត្តស្រីរបស់គេគឺនាង Oriana Sabatini បានឆ្លងវិរុសកូវីដ-១៩ ។
ខ្សែប្រយុទ្ធជម្រើសជាតិអាហ្សង់ទីនវ័យ ២៦ឆ្នាំរូបនេះ ត្រៀមដើម្បីវិលត្រឡប់ចូលជំរំហ្វឹកហាត់វិញឆាប់ៗនេះ ខណៈក្លិប Juventus បានធ្វើការកោះហៅកីឡាករទាំងអស់របស់ខ្លួន ឲ្យចូលជំរំហ្វឹកហាត់វិញកាលពីថ្ងៃពុធ បន្ទាប់ពីទទួលបានការអនុញ្ញាតពីរដ្ឋាភិបាលអ៊ីតាលី ក្នុងលក្ខខ័ណ្ឌហ្វឹកហាត់ជាលក្ខណៈបុគ្គល (Individual) មុនពេលការហ្វឹកហាត់ជាក្រុមត្រូវបានអនុញ្ញាតនៅថ្ងៃទី ១៨ ខែ ឧសភាខាងមុខ ៕ (ប្រភពពី៖ Juventus)
ចែករំលែកព័តមាននេះ