រាជធានីភ្នំពេញ ៖ នៅថ្ងៃសៅរ៍ ទី៩ ខែឧសភា ឆ្នាំ២០២០ នេះ ប៉ុស្តិ៍លេខ៥ នឹងតម្រូវអោយកីឡាករដែលដណ្ដើមបានកៅអី៤នាក់ក្នុងការប្រកួតជ្រើសរើសជើងឯករដូវកាលទី៧ ប្រកួតគ្នាជាលក្ខណៈស្វែងរក២នាក់ទៅប្រកួតដណ្ដើមពានហើយ បន្ទាប់ពីមិនអាចដំអក់ការប្រកួតមួយនោះឱ្យនៅត្រាំត្រែង ដោយអោយកីឡាករផ្សេងទៀតប្រកួតមិត្តភាព ហើយផ្អឹបអ្នកត្រូវដណ្ដើមពានអោយនៅទៀតបាន។
កីឡាករ៤នាក់ នឹងត្រូវប្រកួតគ្នាយក២នាក់ ទៅដណ្ដើមយកពានជើងឯក ក្នុងពេលបន្ទាប់ ហើយអ្នកចាញ់ នឹងប្រកួតយកលេខ៣ ដើម្បីបញ្ចប់ការប្រកួតក្នុងពេលខាងមុខ។
លោក អូឡាឡា អ្នកសម្របសម្រួលកម្មវិធីបញ្ជាក់ថា បន្ទាប់ពីសង្វៀនបិទចោលមួយរយៈដើម្បីចូលរួមទប់ស្កាត់ការរីករាលដាលនៃជំងឺកូវីដ១៩ ដែលកំពុងបង្កផលប៉ះពាល់ ប៉ុស្ដិ៍លេខ៥ គម្រោងបើកសង្វៀនជាថ្មី ក្នុងបំណងប្រកួតមិត្តភាពលេងៗសិនប៉ុណ្ណោះ ដោយមិនទាន់ចង់ឱ្យគូប្រកួតដណ្ដើមពានចេញប្រកួតនោះទេ។
យ៉ាងណាមិញ លោកថា ថ្នាក់ដឹកនាំបានសម្រេចបន្តការប្រកួតសម្រាប់អ្នកត្រូវប្រកួតដណ្ដើមពានជើងឯក ដើម្បីកុំឱ្យដំអក់កីឡាករទាំងនោះត្រាំត្រែង។ អ្នកទាំង៤ នឹងត្រូវប្រកួតគ្នាស្វែងរកអ្នកឈ្នះនៃគូនីមួយទៅប្រកួតវគ្គផ្ដាច់ព្រ័ត្រ ដោយលោកចាត់ទុកថា បើទោះជាការប្រកួតនោះ មិនមានអ្នកទស្សនាដោយផ្ទាល់ ក៏ជារឿងសំខាន់ផងដែរ សម្រាប់អ្នកទាំង៤។
លោកថា ការបិទចោលកន្លងមក របស់សង្វៀនប៉ុស្តិ៍លេខ៥ គឺធ្វើឱ្យប៉ះពាល់មួយចំនួន ជាពិសេសនៅពេលកីឡាករនីមួយៗ ដែលត្រូវមានឈ្មោះដណ្ដើមពាន ហើយលែងមានសកម្មភាព។ លោកថា កីឡាករដែលមានឈ្មោះប្រកួតក្នុងវគ្គពាក់កណ្ដាលផ្ដាច់ព្រ័ត្រនោះរួមមាន កីឡាករ រិន សារ័ត្ន មកពីក្លិបកងទ័ពជើងទឹក ត្រូវប្រកួតជាមួយកីឡាករ វ៉ែន ហុងជីវ៉ុង មកពីក្លិបកេងកងបាត់ដំបង និងកីឡាករ សោម វិឆ័យ មកពីក្លិបវិបុលដារិទ្ធិខណ្ឌពោធិ៍សែនជ័យ ប្រកួតជាមួយកីឡាករ ពុយ វណ្ណៈ មកពីក្លិបឃ្លាំងមឿងខេត្តពោធិ៍សាត់។
អ្នកទាំង៤ សុទ្ធតែមិនធ្លាប់ប្រកួតចាញ់ដូចគ្នា នៅក្នុងការប្រកួតចាញ់ធ្លាក់ៗ ដែលបានធ្វើឡើងសម្រាប់រដូវកាលទី៧នេះ ហើយក៏ជាអ្នកដែលមានសមត្ថភាពខ្លាំងមុនឈានមក ដល់វគ្គពាក់កណ្ដាលផ្ដាច់ព្រ័ត្រដ៏សំខាន់នេះដែរ។ ក្នុងនោះក៏មានការប្រកួតគូឯកមិត្តភាព រវាង កីឡាករកម្ពុជា លីន វិរៈ មកពីក្លិបបុរីរាជសីហ៍មានរិទ្ធិ និងកីឡាករ វេង សុភ័ក្រ មកពីក្លិបកងទ័ពឆ័ត្រយោង៩១១ផងដែរ។ ការប្រកួតនេះ នឹងផ្សាយផ្ទាល់លើផេក និងលើទូរទស្សន៍ចាប់ពីម៉ោង៦ល្ងាចតទៅ នៅថ្ងៃសៅរ៍នេះ។ (កែសម្រួលដោយ ៖ បុប្ផា)
ចែករំលែកព័តមាននេះ