ខេត្តសៀមរាប ៖ បន្ទាប់ពីមានការធ្វើកំណាយបានរកឃើញចម្លាក់អណ្ដើកធំមួយនៅខាងក្រោមប្រាសាទកណ្ដាលស្រះស្រង់ កាលថ្ងៃទី៦ ខែឧសភា ឆ្នាំ២០២០នេះ ខណៈដែលក្រុមការងារបុរាណវិទូនៃអាជ្ញាធរអប្សរាកំពុងធ្វើកំណាយនៅការដ្ឋានជួសជុលប្រាសាទនៅកណ្ដាលស្រះស្រង់នោះ។ បើតាមលោក ឡុង កុសល…
ខេត្តសៀមរាប ៖ បន្ទាប់ពីមានការធ្វើកំណាយបានរកឃើញចម្លាក់អណ្ដើកធំមួយនៅខាងក្រោមប្រាសាទកណ្ដាលស្រះស្រង់ កាលថ្ងៃទី៦ ខែឧសភា ឆ្នាំ២០២០នេះ ខណៈដែលក្រុមការងារបុរាណវិទូនៃអាជ្ញាធរអប្សរាកំពុងធ្វើកំណាយនៅការដ្ឋានជួសជុលប្រាសាទនៅកណ្ដាលស្រះស្រង់នោះ។
បើតាមលោក ឡុង កុសល អ្នកនាំពាក្យអាជ្ញាធរជាតិអប្សរាបានផ្តល់ពត៌មានថា កាលពីព្រលប់ថ្ងៃទី៦ ខែឧសភា ឆ្នាំ២០២០ ក្រុមការងារជួសជុលប្រាសាទកណ្តាលស្រះស្រង់ បានប្រទះឃើញចម្លាក់ថ្មសត្វអណ្តើកធំមួយក្នុងពេលកំណាយស្រាវជ្រាវនៅទីនោះ។
សូមជម្រាបថា ក្នុងពេលដំណើរការការដ្ឋានជួសជុលប្រាសាទនៅកណ្ដាលស្រះស្រង់ ដែលកសាងឡើងក្នុងរជ្ជកាលព្រះបាទជ័យវរ្ម័នទី៧ខាងលើនេះ ក្រុមការងារបានរកឃើញវត្ថុបុរាណជាច្រើន ជាក់ស្ដែងនាពេលថ្មីៗនេះ គេបានរកឃើញវត្ថុបុរាណចំនួន៣ប្រភេទ រួមមានជាអាទិ៍ ត្រីសូល៍ធ្វើពីលោហៈចំនួន២ ដែលមួយនៅមានរូបរាងពេញលេញ និងមួយទៀតនៅសល់តែបំណែកចុងស្រួចមួយចំហៀង ព្រមទាំងបំណែកខ្វាតពណ៌ស ឬគ្រីស្តាល់ជាច្រើនគ្រាប់ និងបំណែកចម្លាក់ក្បាលនាគធំមួយ ដែលមួយផ្នែកធំកប់នៅក្នុងដីនៅឡើយ។
សូមបញ្ជាក់ថា នៅថ្ងៃទី៧ ឧសភា នេះអាជ្ញាធរជាតិអប្សរានឹងផ្តល់ព័ត៌មានលម្អិតបន្ថែមជុំវិញការរកឃើញអណ្ដើកយក្សមួយនេះបន្តទៀត៕ (កែសម្រួលដោយ ៖ ធីតា)
ចែករំលែកព័តមាននេះ