រាជធានីភ្នំពេញ៖ ក្នុងន័យជួយសម្រួលដល់ប្រជាពលរដ្ឋខ្មែរឲ្យបានដឹងកាន់តែច្បាស់លាស់អំពីច្បាប់ចរាចរណ៍ផ្លូវគោកដែលបាននឹងកំពុងរឹងបន្តឹងការអនុវត្តតាំងពីថ្ងៃទី១ ខែឧសភានោះ ឬក៏បងប្អូនមានចម្ងល់ពាក់ព័ន្ធនឹងការផាកពិន័យសម្រាប់បទល្មើសចរាចរណ៍អគ្គស្នងការដ្ឋាននគរបាលជាតិបានប្រកាសដាក់ឲ្យដំណើរការលេខទូរស័ព្ទទាន់ហេតុការណ៍ ១១៧ សម្រាប់ប្រជាពលរដ្ឋសាកសួរពីច្បាប់ចរាចរណ៍ ២៤ម៉ោងលើ២៤ម៉ោង ដោយឥតគិតថ្លៃ ។
នាយកដ្ឋាននគរបាលចរាចរណ៍ និង សណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានបញ្ជាក់ឲ្យដឹងថា «ករណីមានចម្ងល់ផ្សេងៗ ពាក់ព័ន្ធការអនុវត្តច្បាប់ ស្តីពីចរាចរណ៍ផ្លូវគោក សូមទំនាក់ទំនងមកលេខទូរស័ព្ទទាន់ហេតុការណ៍ អគ្គស្នងការដ្ឋាន នគរបាលជាតិលេខ 117 ដែលមានមន្ត្រីប្រចាំការឆ្លើយតប 24h/24h»។
សូមបញ្ជាក់ថា សមត្ថកិច្ចប៉ូលីសចរាចរណ៍នៅទូទាំងប្រទេសបានចាប់ផ្តើមនូវការអនុវត្តការរឹងបន្តឹងច្បាប់ចរាចរណ៍ផ្លូវគោក ដែលការផាកពិន័យសម្រាប់បទល្មើសនានាបានបង្កើនឡើងច្រើន រហូតដល់ ៣ ដងធៀបនឹងការផាកពិន័យលើកមុន ដែលក្នុងនោះ សម្រាប់អ្នកបើកបរម៉ូតូ បើមិនពាក់មួកសុវត្ថិភាព ឬពាក់មួកសុវត្ថិភាពដែរតែមិនបានដាក់គន្លឹះត្រឹមត្រូវនឹងរងការផាកពិន័យ៦ម៉ឺនរៀល ហើយការផាកពិន័យលើការបើកបរដោយគ្រឿងស្រវឹងគឺចូលដល់ខ្ទង់លានរៀលឯណោះ ដែលក្នុងនោះសមត្ថកិច្ចបានបញ្ជាក់ថាការរឹងបន្តឹងច្បាប់ចរាចរណ៍ផ្លូវគោកនេះគឺដើម្បីការងារអាយុជីវិតពលរដ្ឋខ្មែរនិងកាត់បន្ថយនូវគ្រោះថ្នាក់ចរាចរណួទូទាំងប្រទេស ៕
ចែករំលែកព័តមាននេះ