រាជធានីភ្នំពេញ ៖ ជនជាតិចិនមួយក្រុមតាមរកជនជាតិចិនមួយក្រុមផ្សេងទៀតដែលជាក្រុមធ្លាប់ចាប់ជំរិតខ្លួនចំនួន២ដងរួចមកហើយ លុះប្រទះឃើញក៏មានការផ្ទុះអាវុធនិងកាន់ដាវសាំម៉ូរ៉ៃដេញកាប់គ្នាបណ្តាលឲ្យរងរបួស២នាក់ ហើយត្រូវសមត្ថកិច្ចចាប់វាយខ្នោះបានម្នាក់ បង្កឲ្យមានការភ្ញាក់ផ្អើលកាលពីវេលាម៉ោង៣និង១៥នាទីទៀបភ្លឺថ្ងៃទី៦ ខែឧសភា ឆ្នាំ២០២០ តាមបណ្តោយផ្លូវទន្លេមេគង្គក្បែរនឹងម៉ាស៊ីនបូមទឹក ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
ជនជាតិចិនទាំង២ក្រុមខាងលើមិនស្គាល់អត្តសញ្ញាណនោះទេ ។
តាមប្រភពព័ត៌មានបានអោយដឹងថា មុនពេលកើតហេតុ គេឃើញជនជាតិចិនចំនួន៣នាក់ជិះរថយន្តម៉ាកស្តារិចចំនួន២គ្រឿង ក្នុងនោះមួយគ្រឿងពណ៌ទឹកប្រាក់ និងមួយគ្រឿងទៀតពណ៌ស ក្នុងគោលបំណងបើករថយន្តដើររកជនសង្ស័យជាជនជាតិចិនដែលធ្លាប់ធ្វើសកម្មភាពចាប់ជំរិតខ្លួនកាលពីថ្ងៃទី៥ ខែមករា ឆ្នាំ២០២០ នៅចំណុចខុនដូម្តុំកោះពេជ្រ អស់ប្រាក់ចំនួន៣ម៉ឺនដុល្លារ ដោយជនរងគ្រោះបានវេរលុយទៅអោយជនសង្ស័យ ទើបជនសង្ស័យដោះលែង ។ ក្រោយមកកន្លងមកបានប៉ុន្មានថ្ងៃក៏ចាប់ជំរិតជនរងគ្រោះម្តងទៀតនៅក្នុងម្តុំកោះពេជ្រដដែល ។
តាមប្រភពព័ត៌មានដដែលបានបន្តថា នៅយប់កើតហេតុ ជនរងគ្រោះបានតាមដានជនសង្ស័យមកដល់ក្បែរនឹងម៉ាស៊ីនបូមទឹកជ្រោយចង្វារ ស្រាប់តែឃើញជនសង្ស័យ៣នាក់ ហើយជនសង្ស័យម្នាក់បានដកកាំភ្លើងបាញ់ ចំណែកជនសង្ស័យម្នាក់ទៀតកាន់ដាវសាំម៉ូរៃដេញកាប់ជនរងគ្រោះធ្វើអោយជនរងគ្រោះភ័យស្លន់ស្លោពេកបើករថយន្តបុកជនសង្ស័យម្នាក់បណ្តាលឱ្យរងរបួសធ្ងន់ ហើយរថយន្តជ្រុលបន្តទៅបុកជញ្ជាំងរបងដីឡូត៍មួយកន្លែងដែលនៅទល់មុខផ្ទះវីឡារបស់ជនសង្ស័យផ្ទះលេខ289 ធ្វើឲ្យអ្នកបើករថយន្តរងរបួសសន្លប់ស្តូកស្តឹង រីឯរថយន្តខ្ទេចមួយកំណាត់មុខ ។
បើតាមជនរងគ្រោះប្រាប់តាមរយៈអ្នកបកប្រែថា ជនសង្ស័យនិងជនរងគ្រោះធ្លាប់ជាមិត្តភក្តិនឹងគ្នា និងធ្លាប់បានចាប់ជំរិត២ទៅ៣ដងមកហើយ ទើបតែលើកនេះតាមទាន់ត្រូវជនសង្ស័យផ្ទុះអាវុធត្រូវរថយន្តមួយគ្រាប់ និងកាន់ដាវសាំម៉ូរ៉ៃដេញកាប់ ធ្វើឲ្យជនរងគ្រោះបើករថយន្តដេញបុកបណ្តាលឱ្យរងរបួសធ្ងន់ម្នាក់ ចំណែកជនរងគ្រោះភ័យពេកបានសន្លប់នៅក្នុងរថយន្ត ត្រូវបានរថយន្តសង្គ្រោះរបស់មន្ទីរពេទ្យកាល់ម៉ែតដឹកយកជនរងគ្រោះយកទៅព្យាបាល ។ រីឯជនល្មើសវិញត្រូវបានសមត្ថកិច្ចវាយខ្នោះរួចយកមកកាន់ប៉ុស្តិ៍រដ្ឋបាលនគរបាលជ្រោយចង្វារដើម្បីសួរនាំបានម្នាក់ ចំណែកបក្ខពួក២នាក់ទៀតចូលទៅសម្ងំនៅក្នុងផ្ទះ ។
ក្រោយពេលកើតហេតុខាងលើនេះជនរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលជ្រោយចង្វារដើម្បីអោយសមត្ថកិច្ចកសាងសំណុំរឿងចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ