ខេត្តឧត្តរមានជ័យ ៖ មន្ត្រីកម្ពុជា-ថៃជួបពិភាក្សាគ្នាជាបន្ទាន់ ក្រោយផ្ទុះទំនាស់នៅចំណុចគោលដៅចាស់ ដែលជាចំណុចប្រទាក់ប្រទាញតាមព្រំដែនរវាងប្រទេសទាំង២ ខណៈក្រុមទាហានឈុតខ្មៅថៃក្នុងកងវរៈលេខ២៣.០១ បានរាយរបងបន្លាលួសហើយកម្ពុជាសាងសង់ផ្ទះ ក៏ត្រូវបានរារាំងរៀងៗខ្លួន កាលពីថ្ងៃទី៥ ខែឧសភា ឆ្នាំ២០២០ ។ ហេតុការណ៍នេះកើតឡើងនៅចំណុចនិយាមការ (UA.៩៨ ៩៧៨៨៥៧៥៤) ស្ថិតនៅក្បែរមាត់ច្រកទ្វារអន្តរជាតិជាំ ក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
លោកវរសេនីយ៍ទោ ងួន ទ្ធីរិទ្ធ មេបញ្ជាការអាវុធហត្តស្រុកអន្លង់វែង នៅព្រឹកថ្ងៃទី៦ ឧសភា២០២០បានឱ្យដឹងថា ហេតុការណ៍ដែលបានកើតឡើងរវាងកងកម្លាំងចម្រុះកម្ពុជា និងកងកម្លាំងក្រុមទាហានឈុតខ្មៅថៃកងវរៈលេខ២៣.០១នោះ វាជារឿងទំនាស់លើគោលដៅចាស់កាលពីកើតមានព្រឹត្តការណ៍ផ្ទុះអាវុធតាមព្រំដែនក្នុងអំឡុងឆ្នាំ២០០៨កន្លងទៅ ក្រោយពេលប្រាសាទព្រះវិហារត្រូវបានចុះបញ្ជីជាបេតិកភណ្ឌពិភពលោក នាខែកក្កដា ។
លោកវរសេនីយ៍ទោបានបញ្ជាក់ថា ក្នុងការជួបពិភាក្សាគ្នារកដំណោះស្រាយភ្លាមៗនេះខាងកម្ពុជាដឹកនាំកម្លាំងចម្រុះរួមដោយលោកវរសេនីយ៍ទោ ឃី យូរ៉ា មេបញ្ជាការរងកងវរៈសេនាតូចលេខ៤០៣ កងល្បាតការពារព្រំដែនគោកកម្ពុជា-ថៃយោងតាមបទបញ្ជាឧត្តមសេនីយ៍ទោ សូរ្យ ណារ៉ា មេបញ្ជារងយោធភូមិភាគទី៤ ។
លោកវរសេនីយ៍ទោមានប្រសាសន៍បន្តថា ប្រជាពលរដ្ឋខ្មែរឈ្មោះ ឯក គឹមសាន ភេទប្រុស អាយុ៥៣ឆ្នាំ ប្រពន្ធឈ្មោះ ទូច ស្រីនី អាយុ៤៣ឆ្នាំ មុខរបរជាអ្នកលក់គ្រឿងទេសរស់នៅក្នុងភូមិ-ឃុំកើតហេតុខាងលើបានសាងសង់លំនៅឋាននៅចំណុចទំនាស់នេះ ត្រូវបានក្រុមទាហានឈុតខ្មៅថៃហាមឃាត់មិនឱ្យសង់ ។
ចំណែកកងកម្លាំងចម្រុះកម្ពុជាក៏បានហាមឃាត់ក្រុមទាហានថៃ ដែលធ្វើរបងរាយបន្លាលួសស្ថិតនៅលើតំបន់ហាមឃាត់ផងដែរ គឺហាមឃាត់ដូចគ្នា ។ តែទោះជាបែបនេះក្តី ភាគីទាំងសងខាងបានឯកភាពគ្នា បញ្ឈប់ការសាងសង់រៀងៗខ្លួនទុកឱ្យនៅទំនេរ រហូតដល់មានការកំណត់ព្រំដែនផ្លូវការច្បាស់លាស់ ។
ក្រុមអ្នកតាមដានបាននិយាយថា បញ្ហាព្រំដែនរវាងកម្ពុជា-ថៃ មិនដឹងពេលណាត្រូវបានទទួលស្គាល់ជាផ្លូវការនោះឡើយ ទោះបីមានកិច្ចព្រមព្រៀងព្រំដែនបារាំង-សៀមតាំងពីឆ្នាំ១៩០៧មកហើយក្តី ក៏នៅតែរារាំងរៀងៗខ្លួន ៕ (កែសម្រួលដោយ ៖ បុប្ផា)
ចែករំលែកព័តមាននេះ