រាជធានីភ្នំពេញ ៖ ផ្ទះសំណាក់នៅផ្លូវជាតិ៦អា ភាគច្រើនមានការធ្លាក់ចុះភ្ញៀវ ហើយវាបានបង្ហាញពីការធ្លាក់ចុះនៃការរួមភេទក្រៅផ្ទះ។ នេះបើតាមការចុះរបាយការណ៍ ដោយអ្នកសារព័ត៌មានកោះសន្តិភាព និងការសាកសួរអ្នកបម្រើការតាមផ្ទះសំណាក់នៅទីនោះ។ ផ្ទះសំណាក់តាមផ្លូវជាតិ៦អា ជាច្រើន ត្រូវបានគេដឹងថា មានភ្ញៀវជាច្រើនបានប្រើប្រាស់សម្រាប់ការដេកខ្លីៗ ឬក៏និយាយឱ្យចំជាងនេះ គឺការរួមភេទក្រៅផ្ទះ។
បុរសម្នាក់បើកផ្ទះសំណាក់នៅផ្លូវជាតិ៦អា បានឱ្យដឹងថា ផ្ទះសំណាក់របស់ខ្លួនបានចាប់ផ្តើមធ្លាក់ភ្ញៀវ ចាប់តាំងពីមានការផ្អើលរឿងកូវីដ១៩ ហើយក្រោយមកមានការអំពាវនាវមិនឱ្យចេញក្រៅផ្ទះ និងការធ្វើដំណើរបើមិនចាំបាច់។
បុរសដែលសុំមិនបញ្ចេញឈ្មោះបាននិយាយទៀតថា ផ្ទះសំណាក់របស់គាត់រកចំណូលសឹងតែមិនបានរួចបាយផងពេលនេះ។ គាត់បន្តទៀតថា មិនមែនមានតែផ្ទះសំណាក់របស់គាត់នោះទេ គឺផ្ទះសំណាក់ជាច្រើនទៀតក៏មិនសូវមានភ្ញៀវចូលដេកដែរ។
ការចុះពិនិត្យផ្ទាល់ស្ថានភាពផ្ទះសំណាក់តាមផ្លូវជាតិ៦អា ផ្តល់ចំណាប់អារម្មណ៍ ពីភាពមិនរស់រវើកនៃដំណើរការផ្ទះសំណាក់នៅតាមផ្លូវជាតិលេខ៦អា។ ផ្លូវជាតិលេខ៦អា មានផ្ទះសំណាក់ជាច្រើន។ ប៉ុន្តែការធ្វើដំណើរតាមផ្លូវនេះ គេមិនសូវឃើញមានភ្ញៀវដូចពីពេលមុនឡើយ។
ចំណែកបុរសជាបុគ្គលិកផ្ទះសំណាក់មួយកន្លែងដែលមានទីតាំងនៅក្នុងសង្កាត់ផ្សារដើមថ្កូវ បានប្រាប់ឱ្យដឹងថា កាលពីមុនពេលកើតមានជំងឺកូវីដ១៩ ឡើង នៅផ្ទះសំណាក់របស់លោក គឺមានភ្ញៀវចូលមកដេកច្រើនណាស់ ។ លុះដល់ក្នុងផ្ទុះជំងឺនេះឡើង ចំនួនភ្ញៀវដែលចូលមកដេកមានការថយចុះខ្លាំង។
លោកពន្យល់ថា ការថយចុះភ្ញៀវចូលមកដេកក្នុងផ្ទះសំណាក់នេះដែរ គឺកើតឡើង ដោយសារតែហាងខារ៉ាអូខេត្រូវបានគេបិទ ។ បើហាងខារ៉ាអូខេនៅបើកវិញម្ល៉េះនឹងមានភ្ញៀវចូលមកដេកច្រើនដូចកាលពីមិនទាន់កើតមានជំងឺកូវីដ១៩នេះ។ លុះមកដល់នឹងពេលនេះ ក៏នៅមិនទាន់មានភ្ញៀវដូចដើមវិញឡើយ។
គួរបញ្ជាក់ថា ក្នុងអំឡុងពេលផ្ទុះកើតមានឡើងនូវជំងឺកូវីដ១៩នេះ តាមបណ្តាកន្លែងកំសាន្ត ក្លឹប ហាងខារ៉ាអូខេ និងអាជីវកម្មមួយចំនួនផ្សេងៗទៀតនៅទូទាំងប្រទេស ត្រូវបានបិទទ្វារអាជីវកម្មជាបណ្តោះអាសន្ន ដើម្បីបង្ការ និងទប់ស្កាត់នូវការរីលរាលដាលនៃជំងឺកូវីដ១៩នេះ៕ (កែសម្រួលដោយ ៖ បុប្ផា)
ចែករំលែកព័តមាននេះ