ខេត្តកណ្តាល ៖យុវជនម្នាក់បានប្រើល្បិចក្នុងការឆបោកឆក់យកបេះដូងស្ត្រី២នាក់ ដែលជាមិត្តភក្ដិនឹងគ្នា ហើយថែមទាំងបោកយកម៉ូតូពីពួកនាងម្នាក់១គ្រឿងយកទៅលក់បានសម្រេចជាបន្តបន្ទាប់ថែមទៀត ។
ប៉ុន្តែទង្វើអាក្រក់មិនមានវាសនាល្អរហូតនោះទេ ទោះបីនាងជាសង្សារទី១អត់ហ៊ានប្ដឹង ហើយក៏អត់ហ៊ានប្រាប់រឿងរ៉ាវទៅឪពុកម្ដាយតាមត្រង់ក្តី ប៉ុន្តែនាងជាសង្សារទី២ ហ៊ានប្រាប់ឪពុកម្ដាយតាមត្រង់ ។
ទីបំផុត ក៏ឈានដល់ការដាក់ពាក្យបណ្ដឹងរហូតដល់សាលាដំបូង ចេញដីកាបង្គាប់ឲ្យចាប់ខ្លួន ហើយនគរបាលព្រហ្មទណ្ឌស្រុកអង្គស្នួលខេត្តកកណ្ដាល សហការជាមួយនគរបាលប៉ុស្តិ៍ផុង ស្រុកបរសេដ្ឋ ខេត្តកំពង់ស្ពឺ ក៏ឃាត់ខ្លួនបាន កាលពីវេលាម៉ោងប្រមាណ១២និង៣០នាទីរំលងអធ្រាត្រឈានចូលថ្ងៃទី៥ ខែឧសភា ឆ្នាំ២០២០ នៅសាលាឃុំផុង ស្រុកបរសេដ្ឋ ។
មន្ត្រីនគរបាលបានឲ្យដឹងថា យុវជនរូបនេះឈ្មោះ ឯក សុភក្ត្រ អាយុ២០ឆ្នាំ មានទីលំនៅក្នុងភូមិឈូកកៀប ឃុំផុង ស្រុកបរសេដ្ឋ ត្រូវបានចាប់ខ្លួនតាមដីកាលេខ៤៥៥ ចុះថ្ងៃទី១០ ខែកក្កដា ឆ្នាំ២០១៩ ចេញដោយលោក ជួន វណ្ណៈ ចៅក្រមជំនុំជម្រះនៃសាលាដំបូងខេត្តកណ្ដាល។ ជនសង្ស័យរូបនេះ ត្រូវបានចោទប្រកាន់ពីបទរំលោភលើទំនុកចិត្ត ប្រព្រឹត្តនៅភូមិត្រពាំងភូមិ ឃុំពើក ស្រុកអង្គស្នួល ខេត្តកណ្តាល កាលពីថ្ងៃទី២៦ ខែកញ្ញា ឆ្នាំ២០១៨ ។
ចំណែកអ្នកចាញ់បោកគឺស្ត្រី២នាក់ដែលជាមិត្តភក្ដិនឹងគ្នា ហើយពួកនាងទាំង២គឺជាសង្សាររបស់ជនសង្ស័យខាងលើ ។ ប្រភពដដែលឲ្យដឹងទៀតថា លើកទី១ជនសង្ស័យរូបនេះមានទំនាក់ទំនងជាមួយស្ត្រីម្នាក់ហើយបានលួងលោមសុំស្នេហាពីនាង រហូតនាងទន់ចិត្តស្រឡាញ់ប្រគល់ខ្លួនប្រាណនិងរស់នៅជាមួយគ្នាដូចជាប្ដីប្រពន្ធ ហើយនាងម្នាក់នេះមានម៉ូតូហុងដាឌ្រីមសេ១២៥ ផ្ទាល់ខ្លួន១គ្រឿងផងដែរ ។
ក្រោយពីនាងផ្ដល់សេចក្តីស្នេហាឲ្យអស់ពីបេះដូងមួយរយៈពេលមក ស្រាប់តែថ្ងៃមួយជននេះបានបោកយកម៉ូតូរបស់នាងទៅលក់រួចគេចខ្លួនបាត់ស្រមោលបោះបង់ទាំងរូបនាងទៀត ដែលជាហេតុធ្វើឲ្យនាងខកចិត្តយ៉ាងខ្លាំងចំពោះប្រុសស្នេហ៍ចោរនេះ ។ ក្រោយពីកើតរឿងដ៏អាម៉ាស់បែបនេះ នាងមិនហ៊ានប្រាប់ឪពុកម្ដាយថាបាត់ម៉ូតូព្រោះតែចាញ់បោកសង្សារនោះទេ តែនាងកុហកពួកគាត់ថាម៉ូតូនោះត្រូវចោរលួចបាត់ទៅវិញ ។
ប្រភពដដែលបន្តថា ចំណែកជនសង្ស័យរូបនេះ ក្រោយពីគេចខ្លួនចេញពីនាងជាសង្សារបានប្រហែល២ខែ ក៏ទៅមានទំនាក់ទំនងអន្ទងយកបេះដូងនារីម្នាក់ទៀតដែលជាមិត្តភក្តិនាងសង្សារទី១ ប៉ុន្តែរស់នៅផ្ទះផ្សេងគ្នាមិនបានរស់នៅក្រោមដំបូលផ្ទះតែមួយដូចនាងសង្សារទី១ទេ ហើយនាងក៏គ្មានម៉ូតូជិះផ្ទាល់ខ្លួនដូចជានាងទី១ដែរ ។
លុះក្រោយពីស្គាល់ចិត្តថ្លើមគ្នាជាមួយនាងទី២មួយរយៈមក ពេលដែលនាងស្រឡាញ់ងប់ដកចិត្តពុំរួចហើយនោះ ជននេះបានចាប់ផ្ដើមលេងមួយក្បាច់ទៀត គឺនៅថ្ងៃទី២៦ ខែកញ្ញា ឆ្នាំ២០១៨ ជននេះបានទូរស័ព្ទទៅនាងទី២នេះឲ្យទៅជួបខ្លួននៅក្នុងបន្ទប់ជួលមួយក្នុងភូមិត្រពាំងភូមិ ឃុំពើក ស្រុកអង្គស្នួល ។ ជននេះបានប្រើល្បិចប្រាប់នាងតាមទូរស័ព្ទថា «អូនឯងខ្ចីម៉ូតូអ្នកជិតខាងជិះទិញអីឲ្យបងហូបបន្តិច បងឃ្លានណាស់ ឥឡូវបងកំពុងនៅបន្ទប់ជួល»។ ពេលនោះនាងឆ្លើយវិញថា «អុីចឹងចាំអូនទិញបាយឲ្យហូប ស្រាប់តែជននេះបដិសេធថាកុំទិញអី ទិញតែម្ហូបមកបានហើយ» ។
ខណៈនោះ នាងក៏បានខ្ចីម៉ូតូអ្នកជិតខាងម៉ាកហុងដាឌ្រីម សេ១២៥ ស៊េរីឆ្នាំ២០១៦ ជិះទៅទិញម្ហូបយកទៅឲ្យសង្សារបណ្ដូលពោតដល់បន្ទប់ជួលខាងលើ ។ នៅពេលទៅដល់ ជនសង្ស័យបានឲ្យនាងទុកម្ហូបនៅក្នុងបន្ទប់ រួចបបួលនាងជិះម៉ូតូដែលខ្ចីគេនោះឌុបគ្នាទៅរកទិញបាយនៅខាងក្រៅ ។ បន្ទាប់ពីទៅដល់កន្លែងលក់បាយជននេះបានប្រើល្បិចមួយទៀតដោយប្រាប់នាងជាសង្សារទី២នេះថា «អូនចុះទៅទិញបាយមក
បងយកម៉ូតូនេះទៅចាក់សាំងឲ្យពេញសិន» ឯនាងបានតបវិញថា «ចាក់ធ្វើអីបង ម៉ូតូខ្ចីគេហ្នឹងមិនបាច់ចាក់ទេ» ប៉ុន្តែជនសង្ស័យក៏បានតបវិញថា មិនអីទេអូន ចាក់ឲ្យពេញឲ្យគេទៅ ។
បន្ទាប់មក នាងក៏បានដើរទៅទិញបាយទាំងមិនដឹងថា ប្រុសស្នេហ៍ចិត្តវៀចវេរឡើយ។ ចំណែកជននេះក៏បានជិះម៉ូតូគេចខ្លួនទៅកាន់ខេត្តព្រះសីហនុបាត់ស្រមោលឥតអាល័យ ហើយយកម៉ូតូនោះលក់បាន៣០០ដុល្លារចាយវាយហ្មត់ដូចអាចម៍ទីទុយ ។ ចំណែកនាងសង្សារ ក្រោយពីយួរថង់បាយឈរចាំប្រុសស្នេហ៍ចាំបាត់ៗមិនឃើញវិលវិញ ទើបដឹងថាចាញ់បោកប្រុសព្រានបណ្តូលពោតរូបនេះ ។
ប្រភពដដែលបន្តទៀតថា ដោយសារតែជាម៉ូតូខ្ចីអ្នកជិតខាង ពុំមែនជារបស់ផ្ទាល់ខ្លួនឯងនាងមិនអាចលាក់ លៀមរឿងរ៉ាវនេះបាន ក៏និយាយទម្លាយរឿងដែលនាងលួចលាក់មានសង្សារក្បត់ចិត្តឪពុកម្ដាយ ហើយត្រូវសង្សារជាទីស្រឡាញ់ប្រើល្បិចថោកទាបបែបនេះបោកប្រាស់នាងប្រាប់ឪពុកម្ដាយឲ្យបានដឹង ។ បន្ទាប់មក ឪពុកម្ដាយនាងបាននាំទៅដាក់ពា្យប្ដឹងសុំឲ្យនគរបាលប៉ុស្តិ៍ពើកនិងនគរបាលព្រហ្មទណ្ឌស្រុកអង្គស្នួល ជួយអន្តរាគមន៍ ។ ប៉ុន្តែដោយជនសង្ស័យគេចខ្លួនរកមិនឃើញ ទើបកសាងសំណុំរឿងបញ្ជូនទៅសាលាដំបូងខេត្តកណ្ដាល ហើយសាលាដំបូងបានចេញដីកាបង្គាប់ឲ្យចាប់ខ្លួន ។
យ៉ាងណាក៏ដោយ ជនសង្ស័យជាព្រាននារីនិងជាចោរនៅតែបន្តរត់គេចខ្លួនទើបចាប់មិនបាន ហើយរហូតមកដល់វេលារំលងអធ្រាត្រឈានចូលថ្ងៃទី៥ ខែឧសភា ខណៈជននេះត្រឡប់ចូលផ្ទះដែលគេថាជង់មិនភ្លេចកុក ទើបកម្លាំងនគរបាលព្រហ្មទណ្ឌស្រុកអង្គស្នួល សហការជាមួយនគរបាលប៉ុស្តិ៍ផុង ស្រុកបរសេដ្ឋ ខេត្តកំពង់ស្ពឺ ចាប់ឃាត់ខ្លួនបាន និងបញ្ជូនទៅសាលាដំបូងខេត្តកណ្ដាលចាត់ការតាមច្បាប់ ៕
ចែករំលែកព័តមាននេះ