ខេត្តព្រះវិហារ ៖ បដិមាមួយអង្គដែលមានតែដងខ្លួន ត្រូវបានអ្នកស្រុកប្រទះឃើញនៅក្នុងតំបន់ឧទ្យានជាតិឫស្សីត្រឹប ក្នុងភូមិសាស្ដ្រស្រុកឆែប កាលពីចុងខែមេសាកន្លងមក និងត្រូវបានអាជ្ញាធរខេត្តយកមកប្រគល់ឲ្យមន្ទីរវប្បធម៌និងវិចិត្រសិល្បៈខេត្តរក្សាទុក កាលពីរសៀលថ្ងៃទី៤ ខែឧសភា ឆ្នាំ២០២០…
ខេត្តព្រះវិហារ ៖ បដិមាមួយអង្គដែលមានតែដងខ្លួន ត្រូវបានអ្នកស្រុកប្រទះឃើញនៅក្នុងតំបន់ឧទ្យានជាតិឫស្សីត្រឹប ក្នុងភូមិសាស្ដ្រស្រុកឆែប កាលពីចុងខែមេសាកន្លងមក និងត្រូវបានអាជ្ញាធរខេត្តយកមកប្រគល់ឲ្យមន្ទីរវប្បធម៌និងវិចិត្រសិល្បៈខេត្តរក្សាទុក កាលពីរសៀលថ្ងៃទី៤ ខែឧសភា ឆ្នាំ២០២០ ។
លោក នៅ ចាន់គង់ ប្រធានមន្ទីរវប្បធម៌ និងវិចិត្រសិល្បៈខេត្តបានឲ្យដឹងថា ដងខ្លួនបដិមាដែលប្រគល់-ទទួលក្នុងពេលនេះ មានប្រភពពីតំបន់ឧទ្យានជាតិឫស្សីត្រឹប ដែលអ្នកស្រុកបានប្រទះឃើញហើយយកមកប្រគល់មកឲ្យអាជ្ញាធរស្រុកឆែប ។
លោកបន្តថា ដងខ្លួនបដិមានេះធ្វេីពីថ្មភក់ មានកម្ពស់៧តឹក កម្រាស់១តឹក និងមានរូបរាងមិនពេញលេញ ដោយសាររូបបដិមានេះបានបាត់ព្រះសិរសា ជើង និងដៃ ដែលធ្វើឲ្យមានការពិបាកក្នុងការកំណត់ថា កសាងឡើងនៅសតវត្សរ៍ណា និងរចនាបថណាឲ្យច្បាស់ ។ ប៉ុន្តែលោកសន្និដ្ឋានថា ជាទេវរូបដែលជាព្រះមួយអង្គក្នុងព្រហ្មញ្ញសាសនា និងត្រូវបានកសាងឡើងក្នុងសតវត្សរ៍ទី១២ ។
ទោះជាបែបនេះក្តី ឯកឧត្តម ប្រាក់ សុវណ្ណ អភិបាលខេត្ត បានណែនាំដល់មន្ទីរវប្បធម៌និងវិចិត្រសិល្បៈខេត្ត ត្រូវធ្វើយ៉ាងណារៀបចំរក្សាទុកបដិមានេះឲ្យបានត្រឹមត្រូវ ដើម្បីរង់ចាំការត្រួតពិនិត្យតាមបច្ចេកទេសរបស់អ្នកជំនាញផ្នែកបុរាណវិទ្យា ទើបដឹងច្បាស់ថាបដិមានេះមានប្រវត្តិបែបណា នៅសម័យណាឲ្យប្រាកដ ៕
ចែករំលែកព័តមាននេះ