ស្រុកព្រៃនប់ ៖ មានប្រសាសន៍ក្នុងកិច្ចសម្ភាសផ្ទាល់ជាមួយកោះសន្តិភាព លោកឧត្តមសេនីយ៍ត្រី អុី សុខា ស្នងការងផែនសណ្តាប់ធ្នាប់នៃស្នងការនគរបាលខេត្តព្រះសីហនុ នៅព្រឹកថ្ងៃទី៦ ឧសភា នេះ ក្នុងពេលលោកចុះពិនិត្យការអនុវត្តន៍រឹតបន្តឹងច្បាប់ចរាចរណ៍តាមគោលដៅតាមបណ្តោយផ្លូវជាតិលេខ៤នេះថា ចាប់តាំងពីការចុះអនុវត្តរឹតបន្តឹងច្បាប់ចរាចរណ៍ផ្លូវគោកមកទល់ថ្ងៃនេះ ការធ្វើចរាចរណ៍តាមបណ្ដោយផ្លូវ ពលរដ្ឋលោកមានការយល់ដឹងច្រើន ទាំងការបើកម៉ូតូ ទាំងការបើកបររថយន្ត បានកាត់បន្ថយបទល្មើសគ្រោះថ្នាក់ចរាចរណ៍ច្រើន ។
លោកឧត្តមសេនីយ៍ត្រីបានបន្តថា ជាមួយគ្នានេះក៏នៅមានអ្នកធ្វើចរាចរណ៍តាមរយៈបើកបរម៉ូតូបើកបររថយន្តមួយចំនួន លោកមានការគោរពតែនៅមុខគោលដៅសមត្ថកិច្ច ដែលកំពុងមានការត្រួតពិនិត្យ តែពេលហួសគោលដៅសមត្ថកិច្ចច្រើនតែ បន្តបើកបរនិយាយទូរសព្ទ និងវ៉ាជែងជាដើម ដែលទាំងនេះលោកឧត្តមសេនីយ៍ត្រីបញ្ជាក់ថា ជាហេតុនាំឲ្យមានបទល្មើសករណីគ្រោះថ្នាក់ចរាចរណ៍ជាបន្ត ។
ហើយក្នុងនេះដែរ ក្នុងនាមសមត្ថកិច្ចជំនាញលោកបានសំណូមពរយ៉ាងទទូចដល់អ្នកបើកបរទាំងម៉ូតូត្រូវមានពាក់មួកសុវត្ថិភាពរថយន្តបើកបរ សូមកុំវ៉ាជែងនិងនិយាយទូរស័ព្ទ ដើម្បីចូលរួមគោរពអនុវត្តក្នុងការរឹតបន្តឹងច្បាប់ចរាចរណ៍ដែលកំពុងអនុវត្តនាពេលនេះ ។
សូមបញ្ជាក់ថា ទូទាំងខេត្តព្រះសីហនុមានគោលដៅចំនួន១១ ក្នុងនោះមានដាក់កម្លាំងសមត្ថកិច្ចជំនាញសរុបចំនួន១០២នាក់ទូទាំងខេត្តព្រះសីហនុ ចុះអនុវត្តពង្រឹងច្បាប់ចរាចរណ៍ ចាប់ពីថ្ងៃទី១ ឧសភា ។
ចែករំលែកព័តមាននេះ