ប្រទេសបារាំង ៖ ខ្សែប្រយុទ្ធក្លិប Paris Saint-German គឺកីឡាការនី Kadidiatou Diani បានសម្រេចពន្យារកុងត្រាថ្មីជាមួយក្លិបមួយនេះ ដោយធ្វើឲ្យនាងក្លាយជាកីឡាការិនីបាល់ទាត់អាជីព…
ប្រទេសបារាំង ៖ ខ្សែប្រយុទ្ធក្លិប Paris Saint-German គឺកីឡាការនី Kadidiatou Diani បានសម្រេចពន្យារកុងត្រាថ្មីជាមួយក្លិបមួយនេះ ដោយធ្វើឲ្យនាងក្លាយជាកីឡាការិនីបាល់ទាត់អាជីព ដែលទទួលបានថ្លៃនឿយហត់ខ្ពស់ជាងគេនៅលើពិភពលោកលំដាប់ទី២ តាមពីក្រោយម្ចាស់ពានរង្វាន់ Ballon d’Or Féminin 2018 (ស្ត្រី) គឺកីឡាការិនី Ada Hegerberg ។
ខ្សែប្រយុទ្ធជនជាតិបារាំងវ័យ២៥ឆ្នាំរូបនេះ បានចុះហត្ថលេខាលើកិច្ចសន្យាថ្មីដែលរយៈពេល៣ឆ្នាំបន្ថែមទៀតកាលពីថ្ងៃច័ន្ទ ដោយប្តេជ្ញាចិត្តអំពីអនាគតរបស់នាងជាមួយក្រុម PSG ខណៈពេលដែលនាងបានបដិសេធ ការចាប់អារម្មណ៍ពីក្រុមដែលជាគូប្រជែង Lyon ។
ការសម្រេចចិត្តរបស់ Diani ក្នុងការស្នាក់នៅបន្តជាមួយ PSG គឺផ្អែកទៅលើចំណង់ចំណូលចិត្តរបស់នាងរីករាយក្នុងការរស់នៅក្នុងទីក្រុងប៉ារីស ខណៈនាយកប្រតិបត្តិកីឡារបស់ក្លិបលោក Leonardo បានធ្វើការពិភាក្សាជាមួយនាងដោយផ្ទាល់ ដើម្បីបញ្ចុះបញ្ចូលឲ្យនាងចុះកិច្ចសន្យាបន្តជាមួយក្លិប ។
ជាមួយនឹងកិច្ចព្រមព្រៀងថ្មីនេះ Diani នឹងត្រូវបានផ្តល់ឲ្យដូចគ្នានឹងមិត្តរួមក្រុមជម្រើសជាតិបារាំងរបស់នាងគឺកីឡាការិនី Amandine Henry ជាមួយនឹងប្រាក់ឈ្នួលចំនួន ៣៦០.០០០ អឺរ៉ូក្នុងមួយរដូវកាល។
ដោយឡែកប្រាក់ឈ្នួលរបស់ខ្សែប្រយុទ្ធ Ada Hegerberg របស់ក្រុម Lyon ដែលជាកីឡាការិនីទទួលបានថ្លៃនឿយហត់ខ្ពស់ជាងគេបំផុតមានចំនួន ៤០០.០០០ អឺរ៉ូនេះយោងតាមរបាយការណ៍ក្នុងឆ្នាំ ២០១៩ ។
សូមជំរាបជូនថា កីឡាការនី Kadidiatou Diani បានផ្លាស់ពីក្លិប Juvisy មកចូលរួមជាមួយក្លិប PSG កាលពីឆ្នាំ ២០១៧ ហើយគិតមកទល់ពេលនេះនាងបានបង្ហាញខ្លួនចំនួន ៦០ប្រកួតដោយស៊ុតបញ្ចូលទីបាន ៣១គ្រាប់ ៕ (ដកស្រង់ចេញពី Goal.com)
ចែករំលែកព័តមាននេះ