រាជធានីភ្នំពេញ ៖ វិបត្តិក្នុងវិស័យឧស្សាហកម្មកាត់ដេរនៅកម្ពុជា កាន់តែធ្ងន់ធ្ងរពីមួយថ្ងៃទៅមួយថ្ងៃ ដោយសារបញ្ហាកូវីដ ១៩ ដែលអាចធ្វើអោយវិស័យនេះប្រឈមនឹងការព្យួរការងារ កាន់តែច្រើន ។
ជាក់ស្ដែងតាមការបញ្ជាក់របស់សមាគមរោងចក្រកាត់ដេរ និងសម្លៀកបំពាក់កម្ពុជា ហៅកាត់ថា GMAC បានអោយដឹងថា គិតត្រឹមថ្ងៃទី ០៤ ឧសភា ២០២០នេះ មានរោងចក្រប្រមាណ១៨០បានព្យួរការងាររួចហើយ និងប៉ះពាល់ដល់កម្មករនិយោជិតប្រមាណជាង១៥ម៉ឺននាក់ហើយ ។
សមាគមរោងចក្រកាត់ដេរសម្លៀកបំពាក់និងស្បែកជើងកម្ពុជា បានបង្ហាញពីការព្រួយបារម្ភចំពោះផលប៉ះពាល់កាន់តែធំឡើង ដោយអាចនឹងមានអ្នកព្យួរការងារប្រមាណ២០ម៉ឺននាក់ថែមទៀតនៅពេលខាងមុខ បើសិនជាមិនមានការបញ្ជាទិញពីខាងក្រៅ ។
សមាគមនេះ ក៏បានស្នើសុំអោយអ្នកបញ្ជាទិញជួយពិនិត្យមើលបញ្ហាត្រង់នេះ និងជួយទិញផលិតផលពីកម្ពុជាវិញ នៅពេលឆាប់នេះ និងស្នើសុំអ្នកបញ្ជាទិញដែលមិនទាន់ទូទាត់ ជួយពន្លឿនការទូទាត់អោយបានឆាប់ៗផងដែរ ។
យោងតាមលិខិតអំពាវនាវមួយរបស់សមាគមរោងចក្រកាត់ដេរសម្លៀកបំពាក់និងស្បែកជើងកម្ពុជាបានអោយដឹងថា គិតត្រឹមថ្ងៃទី០៤ មេសា ២០២០ រោងចក្រ១៨០ បានព្យួរប្រតិបត្តិការរបស់ខ្លួន ហើយរោងចក្រ៦០បន្ថេមទៀតនឹងឈានទៅរកការព្យួរផងដែរ ដែលកំពុងប៉ះពាល់ដល់កម្មករជាង១៥ម៉ឹននាក់ ដែលត្រូវព្យួរការងារជាបណ្ដោះអាសន្នរហូតដល់ពេលនេះ ដោយមិនដឹងច្បាស់ថានឹងបន្តការងារវិញ នៅពេលណា ហើយកម្មករជិត២០ម៉ឺននាក់នឹងត្រូវព្យួរការងារនៅពេលខាងមុខឆាប់ៗនេះ ដែលនឹងប៉ះពាល់មិនត្រឹមតែកម្មករនោះទេ ប៉ុន្តែថែមទាំងសមាជិកគ្រួសារប្រមាណ២លាននាក់ដែលពឹងផ្អែកលើពួកគេ ។
GMAC អោយដឹងថាខ្លួន យល់អំពីភាពលំបាកដែលអ្នកបញ្ជាទិញកំពុងប្រឈម ប៉ុន្តែGMAC ពិតជាអំពាវនាវយ៉ាងខ្លាំងទៅអ្នកបញ្ជាទិញទាំងអស់ មេត្តាគោរពតាមលក្ខខណ្ឌទូទាត់ប្រាក់សម្រាប់ទំនិញដែលបានទទួលរួចហើយ ឬដែលកំពុងដឹកទៅអ្នកបញ្ជាទិញ ។ រោងចក្រនៅកម្ពុជា កំពុងរងគ្រោះរួចហើយពីការលុបចោលការបញ្ជាទិញជាច្រើននិងការគ្មានបញ្ជាទិញថ្មីៗ ហើយមិនអាចទ្រាំទ្រនឹងការមិនទូទាត់ប្រាក់នោះទេ ។
លោកប៉ាវ ស៊ីណា ប្រធានសម្ព័ន្ធ សហជីពចលនាកម្មករកម្ពុជា បានមានប្រសាសន៍ថា ផលប៉ះពាល់ទៅលើកម្មករកាត់ដេរនៅកម្ពុជា ឃើញថាកាន់តែធំឡើង ដោយសារតែរោងចក្រជាច្រើនបានចាប់ផ្ដើមព្យួរការងារហើយកម្មករកាន់តច្រើន ក៏អត់មានការងារធ្វើ ហើយក៏បាត់ចំណូលសម្រាប់ផ្គត់ផ្គង់គ្រួសារផងដែរ ។
លោកបន្តថា ការបាត់បង់ការងាររបស់កម្មករនៅពេលនេះ បណ្ដាលពីមិនមានការបញ្ជាទិញ និងការទូទាត់ប្រាក់ពីអ្នកបញ្ជាមកអ្នកផ្គត់ផ្គង់ទើបថៅកែរោងចក្រមិនមានលទ្ធភាព ក្នុងការបន្តការងាររបស់ខ្លួន ដែលជាហេតុធ្វើអោយថៅកែរោងចក្រត្រូវបង្ខំចិត្តព្យួរការងារមួយរយៈសិន ។ លោកថា៖« បើសិនជាស្ថានភាព បែបនេះ នៅតែបន្តបែបនេះទៀត ផលប៉ះពាល់នឹងកាន់តែធំឡើង ហើយវានឹងធ្វើអោយកម្មករជាច្រើននាក់ទៀត ត្រូវបាត់បង់ចំណូល ហើយខណៈនេះ គឺមានការជំរុញអោយអ្នកបញ្ជាទិញជួយទិញ និងទូទាត់មកកម្ពុជា អោយបានទៀងទាត់ផង ដើម្បីថៅកែរោងចក្រមានប្រាក់បើកទៅកម្មករ » ។លោកបន្ថែម រហូតមកដល់ពេលនេះ កម្ពុជាបានបាត់បង់អ្នកបញ្ជាទិញយ៉ាងច្រើន ជាពិសេសទៅលើអ្នកបញ្ជាទិញផលិតផលសម្លៀកបំពាក់និងកាបូប ធ្វើដំណើរ ដោយឡែកសម្រាប់ផលិតផលស្បែកជើង នៅតែមានការបញ្ជាទិញ និងមានដំណើរការផលិតជាធម្មតា ។
សូមបញ្ជាក់ថា ផលប៉ះពាល់ដោយសារកូវីដ ១៩ នៅក្នុងប្រទេសកម្ពុជា មិនមែនមានតែផលិតផលវាយនភណ្ឌប៉ុណ្ណោះទេ តែក៏បានជះឥទ្ធិពលយ៉ាងខ្លាំងផងដែរទៅដល់វិស័យទេសចរណ៍ សេវាកម្មកម្សាន្ត និងវិស័យផ្សេងៗជាច្រើនផងដែរ ៕
ចែករំលែកព័តមាននេះ