ខេត្តបាត់ដំបង ៖ ក្មេងប្រុសម្នាក់បានស្លាប់ រីឯ៣នាក់ទៀតបានរងរបួសធ្ងន់និងស្រាល ពេលពួកគេនាំគ្នាដើរដកផ្សិតប៉ក់នៅក្នុងព្រៃក៏ប្រទះឃើញគ្រាប់B ហើយនាំគ្នារើសយកទៅគប់លេងបណ្ដាលឲ្យផ្ទុះគ្រោះថ្នាក់តែម្តង កាលពីវេលាម៉ោង៩និង២០នាទីព្រឹកថ្ងៃទី០៥ ឧសភា នៅចំណុចអូរជ្រៅ ស្ថិតក្នុងភូមិអូរក្រូច ឃុំតាតោក ស្រុកសំឡូត។
អធិការរងស្រុកសំឡូត លោកម៉ែន រីម បានឲ្យដឹងថា ក្រុមប្រជាពលរដ្ឋដែលជនរងគ្រោះទាំងនោះ មកពីស្រុកភ្នំក្រវ៉ាញ ខេត្តពោធិ៍សាត់។ ពួកគេ មានគ្នារាប់សិបនាក់ជិះម៉ូតូរាប់សិបគ្រឿង មកចូលមកកាន់ស្រុកសំឡូត ដើម្បីស្វែងរកបេះផ្លែសំរ៉ង និងដើរដកផ្សិត។ លោកអធិការរងរូបនេះបានបញ្ជាក់ថា ពួកគេមិនសូវស្គាល់ភូមិសាស្ត្រ ស្រុកសំឡូតទេ តែប៉ុន្មានថ្ងៃកន្លងទៅនេះ ពួកគេបាននាំគ្នាភ្លូកទឹក ភ្លូកដីមករកបេះផ្លែ
សំរ៉ងភ្នំ និងដកផ្សិត ។ ប៉ុន្តែដោយសារខ្លាចមានគ្រោះថ្នាក់ ដោយសារគ្រាប់មីន ទើបអាជ្ញាធរមូលដ្ឋាន បានរារាំងមិនឲ្យពួកគេចូលព្រៃ តែពួកគេបែរជានាំគ្នាចូលព្រៃនៅតំបន់គ្រោះថ្នាក់ខាងលើ ដើម្បីដើរដកផ្សិត ហើយជនរងគ្រោះទាំង៤នាក់ ប្រទះនឹងគ្រាប់ B ក៏ចាប់លើក ទើបបណ្ដាលឲ្យផ្ទុះត្រូវស្លាប់ម្នាក់ និង របួស៣នាក់។
តាមរបាយការណ៍សមត្ថកិច្ចបានឲ្យដឹងថា ជនរងគ្រោះទាំង៤នាក់មាន ១-ឈ្មោះ លី ស៊ីណេ អាយុ១៥ឆ្នាំ ស្លាប់ ២-ឈ្មោះ ស្រី ពេជ្រ ភេទស្រី អាយុ១៦ឆ្នាំ របួសធ្ងន់លើផ្ទៃមុខ ៣-ឈ្មោះ ពិន ដាវុធ អាយុ២៥ឆ្នាំ របួសធ្ងន់ដាច់ដៃស្ដាំម្ខាង និង៤-ឈ្មោះ នី ប៊ុនណាត អាយុ១៤ឆ្នាំ របួសស្រាល ។ ពួកទាំង៤នាក់ រស់នៅភូមិកំពេង ឃុំព្រងិល ស្រុកភ្នំក្រវ៉ាញ ខេត្តពោធិ៍សាត់។
របាយការណ៍បានបញ្ជាក់ថា ជនរងគ្រោះទាំង៤នាក់ គឺស្ថិតក្នុងចំណោមប្រជាពលរដ្ឋរាប់សិបនាក់ទៀត បាននាំគ្នាចូលទៅក្នុងព្រៃ ដើម្បីដើររើសផ្សិតប៉ក់ ហើយប្រទះឃើញគ្រាប់បេ ( B ) ក៏រើសយកទៅដំលេងលើដើមឈើ ទើបបណ្ដាលឲ្យផ្ទុះគ្រោះថ្នាក់តែម្ដង ។ សូមបញ្ជាក់ថា នេះមិនមែនជាលើកទី១ទេ ដែលមានប្រជាពលរដ្ឋគ្រោះថ្នាក់ដោយសារកាកសំណល់សង្គ្រាម ដែលនៅសេសសល់រាយប៉ាយ ទាំងកប់ក្នុងដី ទាំងនៅលើដី និង នៅក្នុងព្រៃ ក្នុងស្រុកសំឡូត។ ជារឿយៗ គេបានកត់សម្គាល់ថា ប្រជាពលរដ្ឋដែលជួបគ្រោះថ្នាក់ដោយសារគ្រាប់យុទ្ធភ័ណ្ឌមិនទាន់ផ្ទុះ នៅស្រុកសំឡូត កន្លងមកនេះ គឺសុទ្ធតែកើតឡើង ដោយសារនាំគ្នាចូលរុករានព្រៃ ដើម្បីស្វែងរកបេះផ្លែសំរ៉ង។ ជនរងគ្រោះខ្លះដើរជាន់គ្រាប់មីន ខ្លះរើសគ្រាប់ដំលេង និង ខ្លះទៀតគ្រោះថ្នាក់ដោយសារច្នៃគ្រាប់បោកត្រីតាមស្ទឹង។ល។
លោកម៉ែន រីម អធិការរងស្រុកសំឡូត បានបញ្ជាក់ថា ប៉ុន្មានថ្ងៃកន្លងទៅនេះ មានប្រជាពលរដ្ឋច្រើនណាស់ នាំគ្នាមកពីខេត្តពោធិសាត់ ចូលមកស្រុកសំឡូត។ ពលរដ្ឋខ្លះបានព្យាយាមលួចឆ្លងដែន ហូសចូលទឹកដីប្រទេសថៃ ទៀតផង ដើម្បីស្វែងរកបេះផ្លែសំរ៉ងក្នុងព្រៃ។ ប៉ុន្តែត្រូវបានសមត្ថកិច្ច និង អាជ្ញាធរមូលដ្ឋានព្យាយាមរារាំង។ ព្រោះពួកគេមិនសូវស្គាល់ភូមិសាស្ត្រ អាចជួបគ្រោះថ្នាក់ដោយសារគ្រាប់មីន តែពួកគេបែរជានាំគ្នាចូលព្រៃនៅតំបន់ខាងលើដើរដកផ្សិត រហូតជួបគ្រោះថ្នាក់ធ្ងន់ធ្ងរ ។
ប៉ុន្តែយ៉ាងណា ពាក់ព័ន្ធនឹងជនរងគ្រោះទាំង៤នាក់ខាងលើ លោកម៉ែន រីម បានបញ្ជាក់ថា ជនរងគ្រោះដែលបាត់បង់ជីវិត ត្រូវក្រុមគ្រួសារដឹកសាកសពទៅកាន់លំនៅឋាន រីឯជនរងគ្រោះដែលរងរបួស ត្រូវបានសមត្ថកិច្ច និងអាជ្ញាធរ បញ្ជូនទៅសង្គ្រោះបន្ទាន់ភ្លាមៗ នៅមន្ទីរពេទ្យបង្អែកស្រុកសំឡូតហើយ៕
ចែករំលែកព័តមាននេះ