ស្រុកអង្គស្នួល ៖ បើតាមសេចក្តីរាយការណ៍បឋមបានឱហយដឹងថា យុវជនម្នាក់ពិតជាមានល្បិចខ្ពស់ណាស់ក្នុងការឆបោក ដោយប្រើល្បិចបោកយកទាំងខ្លួនប្រាណ និងបេះដូងស្ត្រី២នាក់ជាមិត្តភក្ដិនឹងគ្នា ថែមទាំងបោកយកម៉ូតូពីពួកនាងម្នាក់១គ្រឿងទៅលក់បានសម្រេចជាបន្តបន្ទាប់ថែមទៀត។ ប៉ុន្តែទង្វើរបស់ជននេះ ព្រះមិនជួយឡើយ ដោយនាងជាសង្សារទី១…
ស្រុកអង្គស្នួល ៖ បើតាមសេចក្តីរាយការណ៍បឋមបានឱហយដឹងថា យុវជនម្នាក់ពិតជាមានល្បិចខ្ពស់ណាស់ក្នុងការឆបោក ដោយប្រើល្បិចបោកយកទាំងខ្លួនប្រាណ និងបេះដូងស្ត្រី២នាក់ជាមិត្តភក្ដិនឹងគ្នា ថែមទាំងបោកយកម៉ូតូពីពួកនាងម្នាក់១គ្រឿងទៅលក់បានសម្រេចជាបន្តបន្ទាប់ថែមទៀត។ ប៉ុន្តែទង្វើរបស់ជននេះ ព្រះមិនជួយឡើយ ដោយនាងជាសង្សារទី១ អត់ហ៊ានប្ដឹងទេ ក៏អត់ហ៊ានប្រាប់រឿងរ៉ាវទៅឪពុកម្ដាយតាមត្រង់ដែរ តែនាងជាសង្សារទី២ ប្រាប់ឪពុកម្ដាយតាមត្រង់តែម្តង ទើបបែកធ្លាយរហូតឈានដល់ការធ្វើការឃាត់ខ្លួនបានតែម្តង។
សេចក្តីរាយការណ៍បន្តថា ការធ្វើការចាប់ខ្លួនខាងលើ បានកើតឡើងកាលពីម៉ោង១២និង៣០នាទីយប់រំលងអធ្រាត្រឈានចូលថ្ងៃទី៥ ខែឧសភា ឆ្នាំ២០២០ នៅចំណុចសាលាឃុំផុង ស្រុកបរសេដ្ឋ ខេត្តកំពង់ស្ពឺ ។
បើតាមនគរបាលប្រាប់ឲ្យដឹងថា យុវជនជាជនសង្ស័យខាងលើ ឈ្មោះឯក សុភាក់ អាយុ២០ឆ្នាំ មានទីលំនៅក្នុងភូមិឈូកកៀប ឃុំផុង ស្រុកបរសេដ្ឋ ខេត្តកំពង់ស្ពឺ។ ជនសង្ស័យរូបនេះ មានដីកាលេខ៤៥៥ ចុះថ្ងៃទី១០ ខែកក្កដា ឆ្នាំ២០១៩ ដោយលោកជួន វណ្ណៈ ចៅក្រមជំនុំជម្រះនៃសាលាដំបូងខេត្តកណ្ដាល ដោយបានចោទប្រកាន់ពីបទរំលោភលើទំនុកចិត្ត ប្រព្រឹត្តិនៅភូមិត្រពាំងភូមិ ឃុំពើក ស្រុកអង្គស្នួល ខេត្តកណ្តាល កាលពីថ្ងៃទី២៦ ខែកញ្ញា ឆ្នាំ២០១៨។ ចំណែកឯស្ត្រីរងគ្រោះទាំង២នាក់ ត្រូវជាមិត្តភក្ដិនឹងគ្នា ហើយពួកនាងគឺជាសង្សាររបស់ជនសង្ស័យខាងលើ និងសុំលាក់អត្តសញ្ញាណ។
ប្រភពដដែលបន្តឲ្យដឹងថា មុនពេលហេតុ គឺដំឡូងឡើយ លើកទី១នោះ ជនសង្ស័យបានទំនាក់ទំនងជាមួយស្ត្រីម្នាក់ ហើយលួងលោមសុំស្នេហាពីនាងរហូតនាងទន់ចិត្តស្រលាញ់ប្រគល់ខ្លួនប្រាណនៅជាមួយគ្នាដូចជាប្ដីប្រពន្ធ ហើយនាងក៏មានម៉ូតូម៉ាកហុងដាឌ្រីមសេ១២៥ ផ្ទាល់ខ្លួន១គ្រឿងផងដែរ។ ក្រោយពីនាងផ្ដល់សេចក្តីស្នេហាអស់ពីបេះដូងមួយរយៈពេលមក ស្រាប់តែថ្ងៃមួយជនសង្ស័យបានបោកយកម៉ូតូរបស់នាងទៅលក់ រួចគេចខ្លួនបាត់ស្រមោលតែម្តង។ ក្រោយពីកើតរឿងបែបនេះ នាងមិនហ៊ានប្រាប់ឲ្យឪពុកម្ដាយថាបាត់ម៉ូតូ ព្រោះតែចាញ់បោកសង្សារនោះទេ តែនាងកុហកថាម៉ូតូនោះត្រូវចោរលួចបាត់ទៅវិញ។
ប្រភពដដែលបន្តទៀតថា ចំណែកជនសង្ស័យវិញ បន្ទាប់ពីគេចខ្លួនចេញពីនាងជាសង្សារបានប្រហែល២ខែ ក៏ទៅទំនាក់ទំនងអន្ទងយកបេះដូងស្ត្រីម្នាក់ទៀតត្រូវជាមិត្តភក្តិនាងជាសង្សារទី១ សម្រេចទៀត ប៉ុន្តែរស់នៅផ្ទះផ្សេងគ្នាមិនបានរស់នៅក្រោមដំបូលផ្ទះតែមួយនោះទេ ហើយនាងក៏គ្មានម៉ូតូផ្ទាល់ខ្លួនដូចជានាងទី១ដែរ។
ប្រភពដដែលបន្តថា លុះក្រោយពីស្គាល់ចិត្តថ្លើមគ្នាជាមួយនាងទី២ មួយរយៈពេលរួចមក ពេលដែលនាងស្រឡាញ់ដកចិត្តពុំរួចហើយនោះ ជនសង្ស័យចាប់ផ្ដើមលេងនាងមួយក្បាច់ទៀត ដោយនៅថ្ងៃទី២៦ ខែកញ្ញា ឆ្នាំ២០១៨ ជននេះបានទូរស័ព្ទទៅកាន់នាងទី២នេះឲ្យទៅជួបខ្លួននៅក្នុងបន្ទប់ជួលមួយនៅក្នុងភូមិត្រពាំងភូមិ ឃុំពើក ស្រុកអង្គស្នួល ខេត្តកណ្តា។
ប្រភពដដែលបញ្ជាក់បន្ថែមថា ជននោះបានប្រើល្បិចប្រាប់នាងតាមទូរស័ព្ទថា «អូនឯងខ្ចីម៉ូតូអ្នកជិតខាងជិះទិញអីឲ្យបងហូបបន្តិច បងឃ្លានណាស់ ឥឡូវបងកំពុងនៅបន្ទប់ជួល»។ នាងឆ្លើយវិញថា «អញ្ចឹងចាំអូនទិញបាយឲ្យហូប» ស្រាប់តែជននេះបដិសេធន៍ថា «កុំទិញអីទិញតែម្ហូបមកបានហើយ» ។ ខណៈនោះនាងក៏ខ្ចីម៉ូតូអ្នកជិតខាង១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៦ ជិះទៅទិញម្ហូបយកទៅឲ្យសង្សារបណ្ដូលចិត្តដល់បន្ទប់ជួលខាងលើ លុះទៅដល់ ជនសង្ស័យបានឲ្យនាងទុកម្ហូបនៅក្នុងបន្ទប់ រួចបបួលនាងជិះម៉ូតូដែលខ្ចីគេនោះឌុបគ្នាទៅរកទិញបាយនៅខាងក្រៅ។
ប្រភពដដែលបញ្ជាក់ទៀតថា បន្ទាប់ពីទៅដល់កន្លែងលក់បាយ ជននេះប្រើល្បិចមួយទៀតដោយប្រាប់នាងជាសង្សារទី២នេះថា «អូនចុះទៅទិញបាយមក បងយកម៉ូតូនេះទៅចាក់សាំងឲ្យពេញសិន» ភ្លាមៗនោះនាងតបវិញថា «ចាក់ធ្វើអីបងម៉ូតូខ្ចីគេនឹងមិនបាច់ចាក់ទេ?» ហើយជនសង្ស័យតបវិញថា «មិនអីទេអូនចាក់ឲ្យពេញឲ្យគេទៅ»។
ប្រភពដដែលបន្តថា ក្រោយមកនាងក៏ដើរទៅទិញបាយទាំងមិនដឹងថា ប្រុសស្នេហ៍ចិត្តវៀចវេរឡើយ ចំណែកជននេះក៏ជិះម៉ូតូគេចខ្លួនទៅកាន់ខេត្តព្រះសីហនុបាត់ស្រមោលឥតអាល័យ ហើយយកលក់ម៉ូតូនោះលក់បាន៣០០លុដុល្លារចាយវាយម៉ដ្ឋតែម្តង ចំណែកនាងរងគ្រោះក្រោយពីយួរថង់បាយឈរចាំប្រុសស្នេហ៍ចាំបាត់ៗយូរទៅមិនឃើញវិលវិញ ទើបដឹងថា «ចាញ់បោក»។
ប្រភពដដែលបន្ថែមទៀតថា ដោយសារតែម៉ូតូខ្ចីអ្នកជិតខាងជិះ ពុំមែនជារបស់ផ្ទាល់ខ្លួនឯង នាងមិនអាចលាក់លៀមរឿងរ៉ាវបានទៀតទេ ក៏សុខចិត្តទម្លាយរឿងដែលលួចលាក់មានសង្សារ ហើយត្រូវសង្សារប្រើល្បិចបោកប្រាស់នាងនេះប្រាប់ទៅឪពុកម្ដាយបានដឹងតែម្ដង។ ភ្លាមៗនោះ ឪពុកម្ដាយក៏នាំទៅដាក់ពា្យប្ដឹងសុំឲ្យនគរបាលប៉ុស្តិ៍រដ្ឋបាលពើក និងនគរបាលព្រហ្មទណ្ឌស្រុកអង្គស្នួល ជួយអន្តរាគមន៍ ប៉ុន្តែដោយជនសង្ស័យគេចខ្លួនរកមិនឃើញ ទើបកសាងសំណុំរឿងបញ្ជូនទៅកាន់សាលាដំបូងខេត្តកណ្ដាល ហើយសាលាដំបូងបានចេញដីការបង្គាប់ឲ្យចាប់ខ្លួននៅក្នុងឆ្នាំ២០១៩។
ប៉ុន្តែដោយជនសង្ស័យនៅតែបន្តរត់គេចខ្លួន ទើបចាប់មិនបាន លុះរហូតមកដល់យប់រំលងអធ្រាត្រឈានចូលថ្ងៃទី៥ ខែឧសភា ខណៈដែលជននេះត្រឡប់ចូលផ្ទះ ទើបកម្លាំងនគរបាលព្រហ្មទណ្ឌស្រុកអង្គស្នួល ខេត្តកណ្ដាល សហការជាមួយកម្លាំងនគរបាលប៉ុស្តិ៍រដ្ឋបាលផុង ស្រុកបរសេដ្ឋ ខេត្តកំពង់ស្ពឺ បានធ្វើការឃាត់ខ្លួនបាន និងបញ្ជូនទៅសាលាដំបូងខេត្តកណ្ដាលចាត់ការតាមច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ