លើកដៃវ៉ៃឪពុកម្តាយទៅរួច លោកកូន!
- កណ្តាល
ខេត្តកណ្ដាល ៖ កូនប្រុសចិត្តតិរច្ឆាន គ្រាន់តែម្ដាយសួរនាំរឿងធ្វើឱ្យកង់ដួលសោះ កូនរូបនេះ បានស្ទុះទៅយកឥដ្ឋប្រហោង វាយប្រហារមកលើម្ដាយ និងឪពុក ហេីយបំផ្លិចបំផ្លាញទ្រព្យសម្បត្តិនៅក្នុងផ្ទះ ។…
ខេត្តកណ្ដាល ៖ កូនប្រុសចិត្តតិរច្ឆាន គ្រាន់តែម្ដាយសួរនាំរឿងធ្វើឱ្យកង់ដួលសោះ កូនរូបនេះ បានស្ទុះទៅយកឥដ្ឋប្រហោង វាយប្រហារមកលើម្ដាយ និងឪពុក ហេីយបំផ្លិចបំផ្លាញទ្រព្យសម្បត្តិនៅក្នុងផ្ទះ ។ ទង្វើរបស់កូនប្រុសរូបនេះ ត្រូវសមត្ថកិច្ចឃាត់ខ្លួននៅវេលារសៀលថ្ងៃទី០៣ ខែឧសភា ឆ្នាំ២០២០ នៅក្នុងភូមិប្រឡាយ ឃុំបឹងខ្យាង ស្រុកកណ្ដាលស្ទឹង ខេត្តកណ្តាល ។
ជនរងគ្រោះមានចំនួន៣នាក់ ទី១-ឈ្មោះ សុឹម ចិន្តា អាយុ៥១ឆ្នាំ ជាម្ដាយ មានទីលំនៅភូមិប្រឡាយ ឃុំបឹងខ្យាង ស្រុកកណ្ដាលស្ទឹង ខេត្តកណ្តាល មុខរបរកសិករ ទី២-ឈ្មោះ ប្រុក សារិន ភេទប្រុស អាយុ៥២ឆ្នាំ ជាឪពុក និងទី៣-ឈ្មោះ កឹម វណ្ណី ភេទស្រី អាយុ៦០ឆ្នាំ ជាអ្នករស់នៅជិតខាង ។ ជនសង្ស័យមានឈ្មោះ ដា រ៉ា ភេទប្រុស អាយុ២១ឆ្នាំ មានមុខរបរមិនពិតប្រាកដ ។
សមត្ថកិច្ចបានឲ្យដឹងទៀតថា នៅមុនពេលកើតហេតុ កូនប្រុសរូបនេះ បានធ្វើអោយកង់ដួលនៅមុខផ្ទះ ពេលនោះ ជនរងគ្រោះជាម្តាយបានសួរនាំពីរឿងដួលកង់នោះ ស្រាប់តែស្ទុះយកដុំឥដ្ឋប្រហោងវាយក្បាលម្ដាយ បណ្តាលអោយពកក្បាល ហើយម្តាយបានរត់ទៅពួននៅផ្ទះអ្នកជិតខាងបាត់ទៅ ។
បន្ទាប់មក កូនប្រុសនេះ បានយកដុំថ្មវាយក្បាលឪពុក បណ្តាលអោយបែកហូរឈាម និងបានវាយបំផ្លិចបំផ្លាញទ្រព្យសម្បត្តិក្នុងផ្ទះ ។ ហាក់ដូចជាក្រពុលមុខ ជននេះបានរត់ចូលទៅផ្ទះអ្នកជិតខាងឈ្មោះ សំ សុវណ្ណារី ដោយកាន់ពូថៅជាប់នឹងដៃទៅជាមួយផង ។ ភ្លាមនោះ ក៏បានធាក់ទ្វារដែកផ្ទះបាយ បណ្តាលអោយដាច់ត្រចៀកទ្វាររបេីកត្រូវចំមុខម្ចាស់ផ្ទះ ជាស្ត្រីវ័យចំណាស់ដួលផ្ងារក្រោយរងរបួសបែកមុខ និងបែកក្បាលពីក្រោយហូរឈាម ។
ជនរងគ្រោះត្រូវបានក្រុមគ្រួសារ ដឹកយកទៅព្យាបាលនៅមណ្ឌលសុខភាពបឹងខ្យាង ។ ក្រោយពីទទួលបានពាក្យបណ្តឹង កម្លាំងប៉ុស្តិ៍នគរបាលរដ្ឋបាលបឹងខ្យាង បានចុះដល់ចំណុចកើតហេតុ បានធ្វេីការឃាត់ខ្លួនជនកំណាចនេះ បញ្ជូនមកកាន់អធិការដ្ឋាននគបាលស្រុកចាត់ការតាមនីតិវិធី ៕
ចែករំលែកព័តមាននេះ