ខេត្តតាកែវ ៖ ការប្រព្រឹត្តខុសឆ្គង៤យ៉ាង ដែលនាំឲ្យភិក្ខុអង្គនេះត្រូវអាបត្តិបារាជិក រួមមានការសេពសន្ថវៈជាមួយស្ត្រីដែលគេហៅថា «រួមរ័កមេត្រីស្នេហ៍» ការលួចទ្រព្យរបស់គេ ការសម្លាប់មនុស្ស និងការអួតពីឧត្តរិមនុស្សធម្ម ។ ការអួតពីឧត្តរិមនុស្សធម្ម គឺជាការអួតថា ខ្លួនជាមនុស្សមានគុណវិសេសជាងមនុស្សធម្មតា ហើយបានសម្រេចធម៌វិសេស ដើម្បីទទួលបានលាភសក្ការ ពីបរិស័ទ ដែលមានជំនឿពីការអួតនោះ ។
សង្ឃ ឡុង ចន្ថា អះអាងថា លោកគ្រាន់តែប្រើពាក្យសម្តីលេងសើចជាមួយនារីម្នាក់នោះ តែពុំធ្លាប់បានប៉ះពាល់រាងកាយនាងឡើយ ។ បច្ចុប្បន្នលោកគង់នៅវត្តភ្នំបុរី ។
ភិក្ខុ ឡុង ចន្ថា ត្រូវបានអ្នកមិនពេញចិត្តនិងលោកបាននិយាយថា ជាសង្ឃមួយអង្គមានដីកាមិនសូវពីរោះទេ និងលេងសើចច្រើន ក្លាយជាអ្នកកំប្លែងពេលសម្តែងធម្មទេសនា ។
សូមបញ្ជាក់ថា នៅទីបំផុតភិក្ខុ ឡុង ចន្ថា គង់នៅវត្តភ្នំបុរី ឃុំព្រែកផ្ទោល ស្រុកអង្គរបុរី ខេត្តតាកែវ កាលពីរសៀលថ្ងៃទី៤ ឧសភា ឆ្នាំ២០២០ បានសម្រេចចិត្តលាចាកសិក្ខាបទដោយខ្លួនឯង ក្រោយមានការបែកធ្លាយវីដេអូឆាតញ៉ែស្រីតាម Facebook ។ ក្នុងកិច្ចសន្យាដែលបានធ្វើឡើងនៅវត្តតុំ ជាវត្តព្រះមេគណ មានទីតាំងនៅភូមិតុំ សង្កាត់រកាក្រៅ ស្រុកដូនកែវ ភិក្ខុ ឡុង ចន្ថា មានសង្ឃដីកាថា «បើគិតជាទោសក្នុងព្រះវិន័យ មិនដល់ថ្នាក់សឹកទេ ប៉ុន្តែកុំឱ្យខូចតម្លៃព្រះពុទ្ធសាសនា ភិក្ខុ ឡុងចន្ថា សម្រេចលាចាកសិក្ខាបទដោយខ្លួនឯង នៅថ្ងៃទី១៤ ខែឧសភា ឆ្នាំ២០២០ខាងមុខនេះ» ។
ភិក្ខុ ឡុង ចន្ថា ដែលរងការរិះគន់ខ្លាំងៗពីរឿងដែលលោកលួចទាក់ទងនិងប្រើពាក្យលែបខាយក្នុងន័យស្នេហាជាមួយនារីម្នាក់ ។ សង្ឃ ឡុង ចន្ថា ប្រាប់បណ្តាញសារព័ត៌មានតាមទូរស័ព្ទ នៅល្ងាចថ្ងៃទី៤ ខែឧសភាថា ព្រះមេគណពុំបានបង្ខំឲ្យអាត្មាសឹកឡើយ តែជាការយល់ព្រមដោយអង្គឯង ។ សង្ឃអង្គនេះ មានសង្ឃដីកាថា៖ «កុំឲ្យប៉ះពាល់ដល់តម្លៃព្រះពុទ្ធសាសនា កុំឲ្យរឿងវែងឆ្ងាយអាត្មាសុខចិត្តសឹក» ។
នៅថ្ងៃទី៤ ខែឧសភាផងដែរ សម្តេច នន្ទ ង៉ែត សម្តេចគណៈសង្ឃនាយក បានស្នើឲ្យមេគណខេត្តតាកែវ និមន្តភិក្ខុសង្ឃ ឡុង ចន្ថា ចូលទៅដោះស្រាយក្នុងរឿងអាស្រូវដែលផ្ទុះឡើងនេះ ។ ក្រោយឆ្លងកាត់ការដោះស្រាយជាមួយគ្នាសង្ឃ ឡុង ចន្ថា ក៏សរសេរកិច្ចសន្យាពីការសុខចិត្តលាចាកសិក្ខាបទ(សឹក) ៕
ចែករំលែកព័តមាននេះ