រាជធានីភ្នំពេញ ៖ លោក ស៊ុំ វណ្ណា គ្រូបង្វឹកក្លិបបាល់ទាត់ភ្នំពេញក្រោន បានបញ្ជាក់ថា បើលីគត្រឡប់មកវិញ យ៉ាងហោចណាស់ ក៏ត្រូវការពេល២ទៅ៣សប្ដាហ៍ ដើម្បីប្រមូលកម្លាំងកីឡាករមកល្អដូចដើម ។ ការថ្លែងបែបនេះ គឺបន្ទាប់ពីបច្ចុប្បន្ន លីគបាននិងកំពុងត្រូវបានផ្អាក ហើយកីឡាករបានត្រឹមតែហ្វឹកហាត់នៅតាមផ្ទះរៀងខ្លួន ឬតាមទីសាធារណៈផ្ដោតទៅលើការរក្សាកម្លាំងតែប៉ុណ្ណោះ ដ្បិតការហ្វឹកហាត់ពេញលេញពុំមានឡើយចាប់តាំងពីចុងខែមីនា ឆ្នាំ២០២០ ដោយការផ្ទុះឡើងនៃជំងឺកូវីដ-១៩ នៅទូទាំងពិភពលោក ក៏ដូចជានៅកម្ពុជា។
លោក ស៊ុំ វណ្ណា បានសម្ដែងក្ដីរំពឹងថា សហព័ន្ធកីឡាបាល់ទាត់កម្ពុជា និងគណៈកម្មការប្រកួតបាល់ទាត់ជាតិកម្ពុជា (CNCC) នឹងផ្ដល់ពេលវេលាគ្រប់គ្រាន់សម្រាប់ក្លិបនីមួយៗ ប្រមូលផ្ដុំហ្វឹកហាត់ និងស្ដារកម្លាំងកីឡាករមុនលីគកំពូលកម្ពុជា ចាប់ផ្ដើមការប្រកួតឡើងវិញ។
លោកបានលើកឡើងយ៉ាងដូច្នេះថា ក្រុមមួយចំនួនដែលចាប់ផ្ដើមហាត់មុន លោកគិតថា ការហាត់នោះក៏មានកម្រិតដែរ គាត់មិនអាចឲ្យកីឡាករទាំងអស់ទៅហាត់ជុំគ្នាទេ យ៉ាងច្រើនគាត់ហាត់ Fitness ឬអ្វីផ្សេងៗហើយកីឡាករ ក៏មិនលើសពី១០នាក់ដែរ ទៅតាមការបែងចែកពួកគាត់ ។ គ្រាន់តែគាត់ចាប់ផ្ដើមមុន ការប្រមូលផ្ដុំកម្លាំងមកវិញ វាបានល្អប្រសើរជាងយើង ហើយបើលីគចាប់ផ្ដើមក្នុងពេលឆាប់ៗវាមិនទាន់ទេ ។ តែខ្ញុំគិតថា CNCC នឹងផ្ដល់ឱកាសឲ្យក្រុមផ្សេងៗ យ៉ាងហោចណាស់ ២ ឬ ៣សប្ដាហ៍ឬ១ខែ ដើម្បីឲ្យកីឡាករត្រៀមកម្លាំងបានល្អ ទាំងក្លិបចាប់ផ្ដើមមុន និងចាប់ផ្ដើមក្រោយ។
គ្រូបង្វឹកដឹកនាំក្រុមឈរកំពូលតារាងបណ្ដោះអាសន្ន គិតត្រឹមសប្ដាហ៍ទី៥ ឆ្នាំ២០២០រូបនេះ បន្ថែមថា កីឡាករអាជីព បើគាត់ឈប់៤ឬ៥សប្ដាហ៍ហើយ ពួកគាត់ធ្វើតែ Fitness ឬអ្វីផ្សេងៗ នៅតែក្នុងផ្ទះ ឬទីសាធារណៈសមស្របណាមួយ វាមិនពេញលេញសម្រាប់ការលេងកម្រិតខ្ពស់នោះទេ ។
បើលេងកម្រិតខ្ពស់ គឺត្រូវការពេលវេលាគ្រប់គ្រាន់។ អ៊ីចឹងលោកសង្ឃឹមថា CNCC និងសហព័ន្ធកីឡាបាល់ទាត់កម្ពុជា នឹងផ្ដល់ពេលវេលាគ្រប់គ្រាន់សម្រាប់ហ្វឹកហាត់ឆ្ពោះទៅរកបន្ដការប្រកួតលីគ និងពានរង្វាន់សម្ដេចតេជោ ហ៊ុន សែន ឆ្នាំ២០២០។
បច្ចុប្បន្ន ពិភពលោកបាននិងកំពុងជួបប្រទះវិបត្តិនៃការរីករាលដាលនៃជំងឺរលាកផ្លូវដង្ហើមប្រភេទថ្មីវីរុសកូរ៉ូណា ឬក៏ហៅជាផ្លូវការថា កូវីដ-១៩ (COVID-19) ដែលនាំឲ្យសកម្មភាពនានានៅស្ទើរជុំវិញពិភពលោក ត្រូវបានផ្អាក ឬក៏ពន្យារពេលជាបណ្ដោះអាសន្នដោយមិនមានកាលកំណត់ច្បាស់លាស់ ។ ក្នុងនោះរួមមានទាំងវិស័យបាល់ទាត់ដូចគ្នា ជាហេតុនាំឲ្យប៉ះពាល់ដល់បញ្ហាហិរញ្ញវត្ថុ គ្រាដែលជំងឺកូវីដ-១៩ (COVID-19)បានផ្ទុះឡើងកាលពីខែធ្នូ ឆ្នាំ២០១៩ ខណៈកីឡាករស្ទើរជុំវិញពិភពលោកដូចគ្នាធ្វើការហ្វឹកហាត់តាមផ្ទះរៀងៗខ្លួន។
មកទល់ពេលនេះ លីគកំពូលកម្ពុជា ឆ្នាំ២០២០ បានផ្អាកការប្រកួតជាង១ខែមកហើយ ដើម្បីចូលរួមប្រយុទ្ធប្រឆាំងនឹងជំងឺកូវីដ-១៩ (COVID-19)។ តែបច្ចុប្បន្នជំងឺរាតត្បាតជាសាកលនេះ បានធូរស្រាលច្រើននៅកម្ពុជាហើយ ដោយក្នុងចំណោម១២២ករណី បានជាសះស្បើយ ១២០ករណី នៅសល់តែ២ករណីប៉ុណ្ណោះ។
យ៉ាងណាក៏ដោយ ចំពោះការត្រឡប់មកវិញ នៃលីគកំពូលកម្ពុជា នឹងបន្ដការប្រកួតវិញពេលណានៅមិនទាន់កំណត់កាលបរិច្ឆេទថ្មីនោះទេ ស្របពេលបច្ចុប្បន្នរាជរដ្ឋាភិបាល និងក្រសួងសុខាភិបាល បានបន្ដអំពាវនាវឲ្យបញ្ចៀសការជួបជុំ ឬការប្រមូលផ្ដុំមនុស្សច្រើននៅឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ