រាជធានីភ្នំពេញ ៖ គណៈកម្មាធិការជាតិអូឡាំពិកកម្ពុជា(NOCC)បានឱ្យដឹងកាលពេលថ្មីៗនេះថា NOCCមានគម្រោងពិភាក្សាជាមួយសហព័ន្ធកីឡាហែលទឹកអន្តរជាតិ(FINA)និងគណៈកម្មាធិការជាតិរៀបចំស៊ីហ្គេមឆ្នាំ២០២៣ (CAMSOC)ដើម្បីពិនិត្យសិក្សាវាយតម្លៃពីអាងហែលទឹកក្នុងពហុកីឡដ្ឋានជាតិអូឡាំពិកដែលទើបតែបញ្ចប់ការសាងសង់អាចដាក់បម្រើឱ្យការប្រកួតកីឡាស៊ីហ្គេមលើកទី៣២ឆ្នាំ២០២៣បានឬយ៉ាងណា។
លោក វ៉ាត់ ចំរើន រដ្ឋលេខាធិការក្រសួងទេសចរណ៍និងជាអគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា គម្រោងនៃការវាយតម្លៃនេះ គឺដើម្បីបែងចែកពីកម្រិតទីកន្លែងប្រកួត និងប្រភេទវិញ្ញាសានីមួយៗថាវិញ្ញាសាណាខ្លះធ្វើនៅអាងហែលទឹកមរតកតេជោនិងវិញ្ញាសាណាខ្លះត្រូវធ្វើនៅក្នុងអាងហែលទឹកពហុកីឡដ្ឋានជាតិ ។
អាងហែលទឹកមានតម្លៃជិត៣លានដុល្លារដែលទើបបញ្ចប់ការសាងសង់ជួសជុល តែមិនទាន់បើកសម្ពោធដាក់ឱ្យប្រើប្រាស់នៅឡើយនោះ ជាអាងហែលទឹកដែលមានលក្ខណៈស្តង់ដារអន្តរជាតិត្រឹមត្រូវ ។ ដូច្នេះវាអាចជាទីតាំងបំពេញបន្ថែមជាមួយនឹងទីតាំងអាងហែលទឹកពហុកីឡដ្ឋានមរតកតេជោទើបលោកមានគម្រោងចង់ពិភាក្សាជាមួយភាគីពាក់ព័ន្ធក៏ដូចជាសហព័ន្ធផងដែរដើម្បីសម្រេចដាក់ឱ្យប្រកួតក្នុងកម្រិតណាមួយឬវិញ្ញាសាណាខ្លះដែលត្រូវប្រកួតនៅទីនេះ ព្រោះវាអាចទាក់ទាញអ្នកទស្សនាក្នុងទីក្រុងឱ្យចូលរួមទស្សនាបាន ។
លោកបញ្ជាក់ថា បច្ចុប្បន្នយើងមានអាងហែលទឹកចំនួន២កន្លែងដែលទើបតែជួសជុលនិងសាងសង់រួចរាល់ជាផ្លូវការតាមបទដ្ឋានកំណត់ដោយសហព័ន្ធកីឡាហែលទឹកអន្តរជាតិ ក្នុងនោះមានអាងហែលទឹកក្នុងពហុកីឡដ្ឋានជាតិ និងអាងហែលទឹកមរតកតេជោស្ថិតនៅត្រើយខាងកើតស្ពានព្រែកព្នៅក្នុងសង្កាត់ព្រែកតាសេក៕ (កែសម្រួលដោយ ៖ បុប្ផា)
ចែករំលែកព័តមាននេះ