រាជធានីភ្នំពេញ ៖ កីឡាករ សុខ សាវិនមកពីក្លិបប៉ែនកាក់គុនខ្មែរនិងកីឡាករ ឡុង បេនលឿន មកពីក្លិបសាលវ័ន្តកីឡា បានក្លាយជាម្ចាស់ប្រាក់លានក្នុងកម្មវិធីប្រដាល់«កម្ពុជាសង្វៀនគុនខ្មែរ»បន្ទាប់ពីពួកគេទាំងពីរយកឈ្នះគូប្រកួតដោយពិន្ទុរៀងៗខ្លួននៅលើសង្វៀនទូរទស្សន៍ស៊ីអិនស៊ី កាលពីថ្ងៃសៅរ៍ ទី២ ឧសភា។
កីឡាករ សុខ សាវិន បានយកឈ្នះកីឡាករ ពុទ្ធ សំបូរ មកពីក្លិបពុទ្ធសេរីវង្សពោធិសែនជ័យដោយពិន្ទុបន្ទាប់ពីពួកគេប្រកួតគ្នាយ៉ាងស្វិតស្វាញពេញរយៈពេល៥ទឹក ។ កីឡាករពុទ្ធ សំបូរ រាងអន់កម្លាំងបន្តិច ជាក់ស្ដែងការប្រកួតទើបតែឈានចូលដល់ទឹកទី២ប៉ុណ្ណោះ គេត្រូវសុខ សាវិន ទាត់ឱ្យដួលជាញឹកញាប់។ទោះជាយ៉ាងណា ពុទ្ធ សំបូរនៅតែព្យាយាមប្រើកណ្ដាប់ដៃវាយនិងលើកជើងទាត់សងវិញយ៉ាងសន្ធាប់ ប៉ុន្តែមិនអាចបំបាក់ស្មារតីសុខ សាវិនបានឡើយ ។
ផ្ទុយទៅវិញ សុខ សាវិនកាន់តែបង្កើនការវាយលុកកាន់តែខ្លាំងឡើងធ្វើឱ្យចប់ការប្រកួតទឹកទី៥ ចៅក្រមប្រកាសឱ្យ សុខ សាវិន ឈ្នះពិន្ទុជាឯកច្ឆន្ទ និងក្លាយជាម្ចាស់ប្រាក់លានទាល់តែបាន ។
ចំណែកកីឡាករ ឡុង បេនលឿនបានយកឈ្នះកីឡាករជើងចាស់សេក គឹមរួន មកពីក្លិបមកុដរាជសីហ៍ដោយពិន្ទុ ។
នៅទឹកទី១និងទី២ សេក គឹមរួន ហាក់មានជំនឿចិត្តយ៉ាងខ្លាំងក្នុងការក្លាយជាម្ចាស់ប្រាក់លានដោយគេឃើញកីឡាកររូបនេះសម្រុកចូលវាយសន្ធាប់ទៅលើគូប្រកួតយ៉ាងចាស់ដៃ តែត្រូវឡុង បេនលឿនធាក់និងទាត់សងវិញភ្លាមៗ ។ សេក គឹមរួន ចាប់ផ្ដើមថមថយកម្លាំងខ្លាំងខណៈការប្រកួតឈានចូលដល់ទឹកទី៣ ។ ស្នៀតកណ្ដាប់ដៃរបស់គេមានឱកាសវាយម៉ាត់សងវិញមួយៗប៉ុណ្ណោះ ក្រៅពីនោះត្រូវកីឡាករ ឡុង បេនលឿន ចាប់ក្រៀកឡើងជង្គង់បុកចូលពោះទឹកពេញៗតែម្ដង។
ចប់ការប្រកួតទឹកទី៥ ឡុង បេនលឿនត្រូវបានគេប្រកាសឱ្យឈ្នះពិន្ទុជាឯកច្ឆន្ទ ។ ដោយឡែក កីឡាករ ឡុង សុភី មកពីក្លិបកុលបុត្រកូនខ្មែរខណ្ឌទួលគោក និងកីឡាករ ពុទ្ធ ឆាយរិទ្ធី មកពីក្លិបពុទ្ធសរីវង្សពោធិសែនជ័យវិញបានត្រឹមតែស្មើពិន្ទុគ្នាធ្វើឱ្យប្រាក់រង្វាន់ត្រូវចែកគ្នាម្នាក់ពាក់កណ្ដាល ៕ (កែសម្រួលដោយ ៖ បុប្ផា)
ចែករំលែកព័តមាននេះ