ខេត្តកណ្តាល ៖ ជនសង្ស័យម្នាក់ជាអ្នកលេងល្បែងជល់មាន់ ត្រូវបាននគរបាលស្រុកស្អាង ចុះប្រតិបត្តិការណ៍បង្ក្រាប រួចឃាត់ខ្លួននាំមកសួរអស់រយៈពេល១យប់ រួចបញ្ជូនទៅសាលាដំបូងខេត្តកណ្តាល នៅល្ងាចថ្ងៃទី០១ ខែឧសភា ឆ្នាំ២០២០ ក្រោយមកត្រូវបានលោកព្រះរាជអាជ្ញាររង សម្រេចអោយវិលត្រឡប់ទៅផ្ទះវិញ។
ជនសង្ស័យដែលចាប់ខ្លួនបានខាងលើឈ្មោះឃាង ឡេង ភេទប្រុស អាយុ៦៥ឆ្នាំ ជនជាតិខ្មែរ មុខរបរកសិករ រស់នៅនៅភូមិថ្កុល ឃុំត្រើយស្លា ស្រុកស្អាងខេត្តកណ្តាល។
បើតាមលោក ទិន សុចិត្រា អ្នកនាំពាក្យអយ្យការសាលាដំបូងខេត្ត បានថ្លែងប្រាប់នៅព្រឹកថ្ងៃទី០៤ ខែឧសភា ឆ្នា២០២០ នេះថា ចំពោះមូលហេតុដែលអយ្យការសម្រេចឱ្យវិលត្រឡប់ផ្ទះវិញនោះ គឺជាករណីលេងល្បែងស៊ីសងតាមផ្លូវច្បាប់មិនអាចឃុំខ្លួនបានទេ ប៉ុន្តែសំណុំរឿងនៅតែបន្តរចាត់ការតាមផ្លូវច្បាប់ដដែល ។ បើសិនជាលើកទី១ ជនសង្ស័យនៅតែប្រព្រឹត្តិទៀត ចាប់បានលើកទី២ ជាប់ទោសហើយ ជាករណីមិនរៀងចាល ។
បើតាមរបាយការណ៍របស់ស្នងការដ្ឋាននគរបាលខេត្ត ដែលទទួលបាន គឺបានឱ្យដឹងថាហេតុការណ៍ដែលចុះបង្ក្រាបល្បែងស៊ីសងខុសច្បាប់ជល់មាន់ គឺបានធ្វើឡើងនៅថ្ងៃទី៣០ ខែមេសា ម៉ោង១២និង៥៧នាទីរសៀល នៅចំណុចដីចំការស្វាយ ស្ថិតក្នុងភូមិឫស្សី ស្រុក ឃុំខ្ពប ស្រុកស្អាង ។
ប្រភពដដែលបន្តថា មុនពេលចាប់ខ្លួននោះ គឺកមានប្រជាពលរដ្ឋរាយការណ៍ថាមានករណីល្បែងស៊ីសង (ជល់មាន់) នៅចំណុចកើតហេតុខាងលើ ភ្លាមៗនោះកម្លាំងនគរបាលប៉ុស្តិ៍ខ្ពប បានចុះដល់កន្លែងកើតហេតុ ក៏ឃើញមានមនុស្សប្រហែលជាង១០នាក់កំពុងតែជល់មាន់ លុះពេលឃើញសមត្ថកិច្ចទៅដល់ ក៏នាំគ្នារត់គេចខ្លួនអស់។
ក្រោយមកកម្លាំងនគរបាលប៉ុស្តិ៍បានរត់ដេញពីក្រោយ រួចក៏ឃាត់ខ្លួនបានឈ្មោះ ឃាង ឡេង និងវត្ថុតាងខាងលើ យកមកប៉ុស្តិ៍ ដើម្បីធ្វើការសាកសួរតែម្តង៕ (កែសម្រួលដោយ ៖ បុប្ផា)
ចែករំលែកព័តមាននេះ