រាជធានីភ្នំពេញ៖ អ្នកជំងឺម្នាក់ក្នុងចំណោមអ្នកជំងឺកូវីដ-១៩ចំនួនពីរនាក់ដែលកំពុងបន្តព្យាបាលនៅមន្ទីរពេទ្យខេត្តត្រូវបានធ្វើតេស្តចំនួនជាង ១០ ដងតែនៅតែចេញលទ្ធផលវិជ្ជមាន ខណៈអ្នកជំងឺម្នាក់ទៀតនៅខេត្តកំពង់ឆ្នាំងនៅមិនទាន់ជាសះស្បើយដោយសារតែមានជំងឺផ្សេងៗទៀតរួមផ្សំ ។
ដោយសារតែអ្នកជំងឺ២នាក់ចុងក្រោយត្រូវចំណាយពេលវេលាយូរនៅមិនទាន់ជាសះស្បើយនោះ ទើបលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងបញ្ជាក់នៅឯសន្និសិទ្ធសារព័ត៌មាននាព្រឹកថ្ងៃទី ៤ ឧសភានេះថា លោកបានបញ្ជួនក្រុមគ្រូពេទ្យជំនាញនៅភ្នំពេញ ដែលមានលោកវេជ្ជបណ្ឌិតសាស្ត្រាចារ្យ អេង ហួត ចុះទៅមើលអ្នកជំងឺកូវីដ-១៩ ភេទស្រីនៅបន្ទាយមានជ័យ និងបានបញ្ជួន វេជ្ជបណ្ឌិត ងី ម៉េង ដែលធ្វើការនៅពេទ្យសូវៀត និងក្រុមគ្រូពេទ្យជំនាញជាច្រើនរូបទៀត ដើម្បីឲ្យធ្វើការជាមួយគ្នាដើម្បីជួយគ្នាក្នុងការព្យាបាលអ្នកជំងឺកូវីដ-១៩ទាំង២រូបដែលមិនទាន់ជាសះស្បើយ ។
លោក ម៉ម ប៊ុនហេងបានមានប្រសាសន៍បញ្ជាក់ថា «ហើយខ្ញុំលើកទឹកចិត្តថាបើអាចគ្រប់គ្រងបានអាចបន្តធ្វើការព្យាបាលនៅទីនោះ តែបើគេមិនមានអ្នកឯកទេសគ្រប់គ្រាន់ទេ យើងបញ្ជូនមកភ្នំពេញ ព្រោះយើងត្រូវខិតខំធ្វើយ៉ាងម៉េចឲ្យប្រជាពលរដ្ឋយើងឆាប់ជា» ។
យ៉ាងណាមិញ លោកបានបញ្ជាក់ថាលោកបានទំនាក់ទំនងរាល់ថ្ងៃដើម្បីតាមដានសុខភាពអ្នកទាំងពីរ ។ លោករដ្ឋមន្ត្រីក្រសួងសុខាភិបាលបានបន្ថែមទៀតថា «បញ្ហាដែលអ្នកជំងឺ២នាក់ដែលនៅមិនទាន់ជាសះស្បើយ ជួនកាលវាអ្នកជំងឺខ្លះមានរោគផ្សេងទៀតផ្សំ ដូច្នេះទាមទារពេលវេលាយូរ ដែលខ្លះមានទឹកនោមផ្អែមនិងជំងឺផ្សេងៗទៀត … ដូច្នេះវាត្រូវការពេលវេលាយូរបន្តិច» ។
ចំណែកលោកវេជ្ជបណ្ឌិត លី សុវណ្ណ ប្រធាននាយកដ្ឋានជំងឺឆ្លងនៃក្រសួងសុខាភិបាលបានពន្យល់បន្ថែមថាអ្នកជំងឺកូវីដ-១៩ ចំនួន ២ នាក់ដែលមិនទាន់ជាសះស្បើយពីជំងឺគឺម្នាក់ ជាអ្នកជំងឺភេទស្រីនៅបន្ទាយមានជ័យ មានវ័យ៣៦ ឆ្នាំ និងបានធ្វើតេស្តជាង ១០ដង តែគាត់នៅវិជ្ជមាន តែគាត់សុខភាពល្អទេ ។
លោកបានបន្តថា ដោយឡែកអ្នកជំងឺម្នាក់ទៀតនៅកំពង់ឆ្នាំងភេទប្រុស មានវ័យ ៧៥ ឆ្នាំបុរស ដែលគាត់កើតកូវីដ-១៩ ក្រោយពីធ្វើដំណើរមកពីពិធីបុណ្យសាសនានៅប្រទេសម៉ាឡេស៊ី ហើយគាត់មិនអាចចេញពីមន្ទីរពេទ្យបាននៅឡើយទេ ដោយសារតែគាត់ បន្តនៅវិជ្ជមានទៀត ។ ហេតុដូច្នេះក្រសួងសុខាភិបាលបានបញ្ជួនគ្រូពេទ្យជំនាញពីភ្នំពេញទៅខេត្តដើម្បីជួយពិគ្រោះយោបល់ពិនិត្យព្យាបាលឲ្យឆាប់បានជាសះស្បើយ ៕
ចែករំលែកព័តមាននេះ