រាជធានីភ្នំពេញ ៖ អ្នកទោស២នាក់ ដែលត្រូវបានសាលាដំបូងរាជធានីភ្នំពេញ ចេញដីកាសម្រេចឃំុខ្លួនដាក់ពន្ធនាគារព្រៃសបណ្តោះអាសន្ន ហើយត្រូវសមត្ថកិច្ចខណ្ឌ៧មករា ដឹកតាមរថយន្តបញ្ចូនទៅពន្ធនាគារនោះបានធាក់ទ្វាររថយន្តរបស់សមត្ថកិច្ច ហើយរត់គេចខ្លួនទាំងដៃជាប់ខ្នោះ ។ ហេតុការណ៍ខាងលើនេះ…
រាជធានីភ្នំពេញ ៖ អ្នកទោស២នាក់ ដែលត្រូវបានសាលាដំបូងរាជធានីភ្នំពេញ ចេញដីកាសម្រេចឃំុខ្លួនដាក់ពន្ធនាគារព្រៃសបណ្តោះអាសន្ន ហើយត្រូវសមត្ថកិច្ចខណ្ឌ៧មករា ដឹកតាមរថយន្តបញ្ចូនទៅពន្ធនាគារនោះ
បានធាក់ទ្វាររថយន្តរបស់សមត្ថកិច្ច ហើយរត់គេចខ្លួនទាំងដៃជាប់ខ្នោះ ។ ហេតុការណ៍ខាងលើនេះ បានបង្កឱ្យមានការភ្ញាក់ផ្អើលជាខ្លាំង នៅចំណុចលើស្ពានអាកាសស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ កាលពីវេលាម៉ោង៨ព្រឹកថ្ងៃទី៣ ខែឧសភា ឆ្នាំ២០២០ ។
អ្នកទោសទាំង២នាក់នេាះ ពំុមានការបញ្ជាក់ពីមន្ត្រីនគរបាលឱ្យស្គាល់អត្តសញ្ញាណឡើយ គ្រាន់តែដឹងថា ពួកគេជាប់ចោទពីបទល្មើស កាន់កាំបិតប៉័ងតោដើរគម្រាមគេឯងនៅសង្កាត់អូរឫស្សីទី២ ខណ្ឌ៧មករា ហើយត្រូវបានចៅក្រមស៊ើបសួរសាលាដំបូងរាជធានីភ្នំពេញ លោក ឯក ប៉ូលីហ្វីល ចេញដីកាសម្រេចឃំុខ្លួនដាក់ពន្ធនាគារបណ្តោះអាសន្ននៅព្រៃស ។
ប្រភពព័ត៌មានពីមន្ត្រីនគរបាលឱ្យដឹងថា បន្ទាប់ពីបានដីការសម្រេចឃំុខ្លួនពីតំណាងអយ្យការរួចមក នគរបាលខណ្ឌ៧មករា បានដឹកពួកគេទាំង២នាក់ តាមរថយន្ត ដោយទុកឱ្យពួកគេជិះនៅកាប៊ីនក្រោយទាំង២នាក់ ហើយនគរបាល២នាក់នៅខាងមុខ ។ លុះធ្វើដំណើរដល់ចំណុចស្ពានអាកាសស្ទឹងមានជ័យ ពួកគេទាំង២នាក់ បានធាក់ទ្វាររថយន្តសមត្ថកិច្ចរបើកហើយនាំគ្នាលោតរត់គេចខ្លួនតែម្តង ។
ភ្លាមៗនោះ នគរបាលខណ្ឌ៧មករា បានចុះពីលើរថយន្តស្ទុះដេញតាម ប៉ុន្តែអ្នកទោសទាំង២ រត់លឿនពេកទាំងដៃជាប់ខ្នោះម្នាក់មួយរត់ប្រាសអាយុរួចខ្លួន រកមិនឃើញសោះ។ បន្ទាប់មកនគរបាលខណ្ឌ៧មករាក៏សំុការសហការជាមួយកម្លាំងនគរបាលប៉ុស្តិ៍ស្ទឹងមានជ័យទី១ ដើម្បីតាមស្វែងរកបន្តទៀត។ ក្រោយការតាមរកមួយសន្ទុះធំមក កម្លាំងនគរបាលក៏ចាប់ម្នាក់បានមកវិញ ខណៈម្នាក់ទៀតរត់គេចខ្លួនបាត់ស្រមោល ព្រោះជនល្មើសរត់លឿនជាងប៉ូលិស ទោះបីបន្លាមុតក៏អត់ឈឺដែរ ។
លុះវេលាម៉ោង១១ថ្ងៃខែឆ្នាំដដែលនោះ នគរបាលខណ្ឌ៧មករា បានបើកការស្រាវជ្រាវតាមចាប់អ្នកទោសម្នាក់ទៀតបានមកវិញដោយចាប់ខ្លួនបាននៅម្តុំផ្សារសូរិយាម៉ល ក្នុងសង្កាត់ផ្សារថ្មីទី៣ ខណ្ឌដូនពេញ ។ យ៉ាងណាក៏ដោយ ក្រោយការឃាត់ខ្លួនបានមកវិញហើយនោះ អ្នកទោសទាំង២នាក់ ត្រូវបានបញ្ចូនខ្លួនទៅពន្ធនាគារព្រៃស តាមដីការបស់សាលាដំបូងរាជធានីភ្នំពេញ ទាល់តែបានសម្រេច ។
អ្នកទោសបង្រៀនប៉ូលិសប៉ុណ្ណេះហើយ ថ្ងៃក្រោយទៀត បើមិនរាងទេ…សុំកុំរាង !!
ចែករំលែកព័តមាននេះ