រាជធានីភ្នំពេញ៖ ទម្លាប់មួយក្នុងចំណោមទម្លាប់ជាច្រើនដែលត្រូវបានចាត់ទុកថាជាវិធានការពារពីការឆ្លងវីរុសកូវីដ-១៩ នោះគឺការលាងដៃឲ្យបានញឹកញាប់ជាមួយនឹងសាប៊ូ ឬជែលលាងដៃ ឬអាល់កុល ដើម្បីសម្លាប់មេរោគឆ្លង ក៏ប៉ុន្តែការអនុវត្តនូវការលាងដៃមិនបានត្រឹមត្រូវក៏មិនអាចជួយអ្នកបានដែរ ។
ដូច្នេះតើការលាងដៃពេលណា និងប៉ុន្មានវិនាទីទើបចាត់ទុកជាការលាងសម្អាតដៃបានត្រឹមត្រូវដើម្បីការពារខ្លួនអ្នកពីការឆ្លងវីរុសកូវីដ-១៩ នោះ ?
ថ្លែងនៅសន្និសីទសារព័ត៌មានស្ដីពីបច្ចុប្បន្នភាពជំងឺ COVID-19 នៅក្នុងប្រទេសកម្ពុជានាព្រឹកថ្ងៃទី០៤ ខែឧសភា ឆ្នាំ២០២០ លោកជំទាវ ឱ វណ្ណឌីន រដ្ឋលេខាធិការនិងអ្នកនាំពាក្យក្រសួងសុខាភិបាលបានឲ្យដឹងថា ការលាងដៃត្រឹមត្រូវគឺត្រូវធ្វើឡើងឲ្យបានញឹកញាប់នៅពេលដែលលោកអ្នកប៉ះពាល់នូវវត្ថុអ្វីមួយដែលសង្ស័យថាអាចនឹងធ្វើឲ្យអ្នកឆ្លងនូវវីរុសឆ្លងមួយនេះ ។
លោកជំទាវបានបញ្ជាក់ថាពាក់ព័ន្ធឹនងការលាងដៃ ជម្រើសយកល្អគឺការលាងទឹកនឹងសាប៊ូឲ្យបានញឹកញាប់បើសិនបងប្អូននៅផ្ទះ ហើយសម្រាប់បងប្អូនធ្វើដំណើរច្រើនការលាងដៃនឹងអាល់កុល និងជែលលាងសម្លាប់មេរោគ គឺជារឿងប្រសើរ ។ ក៏ប៉ុន្តែលោកជំទាវបានកត់សម្គាល់ឃើញថាមានបងប្អូនខ្លះលាងចាក់ជែលច្រើនពេក ច្រើនឡើងហៀរហូរចេញពីដៃ ដូច្នេះគួរចាក់ជែលក្នុងចំនួនល្មមៗបានហើយ ។
លោកជំទាវអ្នកនាំពាក្យក្រសួងសុខាភិបាលបានបន្តថាសម្រាប់ថេរវេលាត្រឹមត្រូវគឺការលាងដៃនឹងសាប៊ូ គឺត្រូវលាងចម្លោះពី ៤០ ទៅ ៦០ វិនាទី ខណៈជែលនិងអាល់កុល គួរលាង ចន្លោះពី ២០ ទៅ ៤០ វិនាទី តែបងប្អូនខ្លះដុស គឺដុសយកមែនទែន ។
លោកជំទាវឱ វណ្ណឌីន បានបញ្ជាក់ថា ការលាងដៃគួរតែធ្វើឡើងសម្រាប់តែពេលណាដែលបងប្អូនប៉ះពាល់នូវវត្ថុអ្វីម្យ៉ាងដែលលោកអ្នកគិតថាអាចមានឆ្លងមេរោគទៅលោកអ្នក ។ តែបើដៃអត់មានប៉ះអីផងក៏មិនគូរលាងដែរ គឺលាងរាល់ពេលប៉ះពាល់វត្ថុ ណា ដែលយើងគិតថាមានការចម្លងនូវវីរុស ។
ចំណែកលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានបន្ថែមបថា បើអាចពេលប្រជុំ ចូរកុំបើកម៉ាស៊ីនត្រជាក់ គួរបើកបង្អួចនិងរក្សាគម្លាតសុវត្ថិភាព ៕
ចែករំលែកព័តមាននេះ