ប្រទេសវៀតណាម ៖ យោងតាមការិយាល័យស្ថិតិទូទៅ (GSO) បានឱ្យដឹងថា តម្លៃនៃការនាំចេញរបស់វៀតណាមបានកើនឡើងជិត ៥% ពីមួយឆ្នាំទៅមួយឆ្នាំ ស្មើនឹងជិត ៨២.៩៤ពាន់លានដុល្លារ ក្នុងរយៈពេល ៤ខែដំបូងនៃឆ្នាំនេះ ទោះបីមានការរីករាលដាលនៃជម្ងឺកូវីដ១៩ក៏ដោយ។
ក្រុមហ៊ុនក្នុងស្រុករកចំណូលបាន ២៦.៤៥ពាន់លានដុល្លារ ពីការនាំចេញក្នុងរយៈពេលនេះ ដែលមានការកើនឡើង ១២% ពីមួយឆ្នាំទៅមួយឆ្នាំ និងស្មើនឹង ៣២% នៃប្រាក់ចំណូលនាំចេញសរុបរបស់ប្រទេស។ ទន្ទឹមនឹងនេះដែរ ការនាំចេញរបស់ក្រុមហ៊ុនវិនិយោគបរទេសមានចំនួន ៥៦.៤៩ពាន់លានដុល្លារ ដែលកើនឡើង ១.៥% និងស្មើនឹង ៦៨% នៃចំនួនសរុប។
ផលិតផលចំនួន ១៥ក្រុមបានកត់ត្រាតម្លៃនៃការនាំចេញជាង ១ពាន់លានដុល្លារ ឬស្មើនឹង ៨០% នៃប្រាក់ចំណូលសរុប រយៈពេលបួនខែមកនេះ។ ក្នុងនោះ ទូរស័ព្ទនិងគ្រឿងបន្លាស់ បានទទួលចំណូលពីការនាំចេញធំជាងគេ គឺ ១៦.២ពាន់លានដុល្លារ កើនឡើង ១.១% ពីមួយឆ្នាំទៅមួយឆ្នាំ និងស្មើនឹង ១៩.៥% នៃការនាំចេញសរុប។
គ្រឿងអេឡិចត្រូនិក កុំព្យូទ័រ និងគ្រឿងបន្លាស់មាន ១២.៤ពាន់លានដុល្លារ កើនឡើង ២៩% ពីមួយឆ្នាំទៅមួយឆ្នាំ បន្ទាប់មកវាយនភ័ណ្ឌនិងសម្លៀកបំពាក់ មាន ៨.៩ពាន់លានដុល្លារ ធ្លាក់ចុះ ៦%។
ចាប់ពីខែមករា ដល់ខែមេសា សហរដ្ឋអាមេរិកនៅតែជាទីផ្សារនាំចេញធំបំផុតរបស់វៀតណាមដោយចំណាយ ២០.៣ពាន់លានដុល្លារ លើទំនិញវៀតណាមដែលកើនឡើង ១៣.៤% ក្នុងមួយឆ្នាំ។ បន្ទាប់មកប្រទេសចិន ដែលមានទឹកប្រាក់ ១៣.១ពាន់លានដុល្លារ កើនឡើង ២៧%៕ (យោងតាមប្រភពពី www.thestar.com.my)
ចែករំលែកព័តមាននេះ