ខេត្តស្វាយរៀង ៖ ភ្ញៀវទេសចរបាននាំគ្នាមកដើរកំសាន្តនៅឆ្នេព្រែកទន្លេវ៉ៃគោ ដែលជាឆ្នេដ៏ស្អាតស្រស់ត្រកាលនិងជាទីមនោរម្យ មានខ្យល់អាកាសបរិសុទ្ធ ជាឆ្នេរថ្មីនៃក្រុងស្វាយរៀងដែលបានបង្អួតកាយក្រោយពេលបុណ្យចូលឆ្នាំប្រពៃណីជាតិ ហើយក៏ស្របពេលដែលរាជរដ្ឋាភិបាលទប់ស្កាត់ការឆ្លងកូវីដ១៩បានជោគជ័យ គ្មានអ្នកឆ្លងមេរោគកូវីដ-១៩ថ្មី ធ្វើឲ្យមហាជនរីករាយនិងបាននាំគ្នាដើរលេងកំសាន្តជាលក្ខណៈគ្រួសារនាពេលរសៀលតាមឆ្នេទន្លេវ៉ៃគោដ៏ស្រស់ត្រកាលនេះ។
ក្នុងឱកាសនោះដែរ លោកតូច ប៉ូលីវ៉ា អភិបាលរងខេត្តស្វាយរៀង និងជាអនុប្រធានគណៈកម្មការប្រយុទ្ធប្រឆាំងជំងឺកូវីដ១៩ខេត្តស្វាយរៀងបានអញ្ជើញចុះពិនិត្យឆ្នេរទន្លេវ៉ៃគោនិងផ្សព្វផ្សាយអំពីវិធីការពារទប់ស្កាត់ការឆ្លងរីករាលដាលនៃជំងឺកូវីដ១៩ ការធ្វើអនាម័យសម្អាតខ្លួនប្រាណ ការលាងសម្អាតដៃជាមួយនឹងសាប៊ូ ឬអាល់កុលជាដើម។
លោកអភិបាលរងខេត្តបានចុះទៅពិនិត្យតាមឆ្នេរស្ថិតក្នុងភូមិព្រះទន្លេ ភូមិធ្លក និងភូមិបាក់រនាស់សង្កាត់សង្ឃ័រ ក្រុងស្វាយរៀង កាលពីល្ងាចថ្ងៃទី២ ខែឧសភា ឆ្នាំ២០២០។ ក្នុងឱកាសនោះលោកអភិបាលរងខេត្តក៏បានសំណេះសំណាលជាមួយប្រជាពលរដ្ឋនិងអប់រំផ្សព្វផ្សាយអំពីវិធានការណ៍ការពារទប់ស្កាត់ការឆ្លងរីករាលដាលនៃជំងឺកូវីដ១៩ របស់រាជរដ្ឋាភិបាលកម្ពុជា និងរដ្ឋបាលខេត្តស្វាយរៀងដើម្បីណែនាំដល់ប្រជាពលរដ្ឋដែលមកលេងកម្សាន្តនៅទីនេះឱ្យបានយល់ដឹងបន្ថែមទៀត។
លោកអភិបាលរងខេត្តបានបញ្ជាក់ថា បច្ចុប្បន្ននេះជំងឺកូវីដ១៩បានជាសះស្បើយចំនួន១២០នាក់ ក្នុងចំណោម១២២នាក់ ទោះបីជាបែបនេះក្តី សូមអំពាវនាវដល់ប្រជាពលរដ្ឋ ឱ្យមានការប្រុងប្រយ័ត្នខ្ពស់ និងរក្សាអនាម័យឲ្យបានជាប់ជាប្រចាំ ជាពិសេសក្រោយពីបរិភោគហើយ សូមរក្សាអនាម័យវេចខ្ចប់យកទៅចោលនៅកន្លែងចោលសំរាមឱ្យបានត្រឹមត្រូវ ។
ភ្ញៀវទេសចរដែលមកលេងកំសាន្តភាគច្រើនគឺជាមន្ត្រីរាជការ និងប្រជាពលរដ្ឋក្នុងខេត្តស្វាយរៀង ព្រោះតែក្រុងស្វាយរៀងមានឆ្នេទន្លេដ៏ស្រស់ត្រកាលគួរឱ្យចង់មកកំសាន្តពេលរសៀលរហូតដល់ពេលរាត្រី តើអ្នកណាមិនទៅដើរលេង បើនៅជិតផ្ទះបែបហ្នឹងនោះ ៕ (កែសម្រួលដោយ ៖ ធីតា)
ចែករំលែកព័តមាននេះ