ខេត្តព្រះសីហនុ ៖ ម្ចាស់ទីតាំងកន្លែងកំសាន្តមួយចំនួនដូចជា ពយតាឈួន ពយយាយម៉ី និងពយតាបារាំងដែលនៅជាប់គ្នាជាប់មាត់សមុទ្រក្នុងទឹកដីឃុំកែវផុស ស្រុកស្ទឹងហាវ ខេត្តព្រះសីហនុ បានអោយកោះសន្តិភាពដឹងកាលពីថ្ងៃទីទី២-៣ ឧសភា ឆ្នាំ២០២០ កន្លងមកនេះថា មានប្រជាពលរដ្ឋជាលក្ខណៈគ្រួសារ នាំគ្នាមកលេងកម្សាន្តច្រើននៅតាមឆ្នេរ ក្រោយពីអាក់ខានមួយរយៈដោយសារជំងឺកូវីដ១៩ ។ ជាមួយគ្នានឹងវត្តមានភ្ញៀវទេសចរណ៍មកកម្សាន្តនេះដែរ ក៏មានអាជ្ញាធរបានបន្តផ្សព្វផ្សាយអប់រំដល់ប្រជាពលរដ្ឋ ជាអ្នកទេសចរណ៍អោយចូលរួមក្នុងវិធានការការពារទប់ស្កាត់ការឆ្លងជំងឺកូវីដ១៩ផងដែរ ។
ទោះបីជាយ៉ាងណា ប្រជាពលរដ្ឋដែលមកលេងកម្សាន្តតាមតំបន់ឆ្នេរសមុទ្រខាងលើនៅតែមានការការពារយ៉ាងយកចិត្តទុកដាក់ ដោយមានដាក់អាកុលតាមខ្លួន ជាពិសេសការធ្វើអនាម័យដោយលាងដៃឲ្យបានញឹកញាប់តាមការណែនាំរបស់ក្រសួងសុខាភិបាល ។
ពួកគាត់បានបន្ថែមថា ទោះបីជាមានប្រជាពលរដ្ឋមកលេងកម្សាន្តនៅតំបន់ឆ្នេរសមុទ្រក៏ពិតមែន តែបើប្រៀបធៀបទៅនឹងកាលមិនទាន់ផ្ទុះជំងឺកូវីដ១៩ គឺមានចំនួនខុសគ្នាច្រើន ដែលគិតមកដល់ពេលនេះហាក់មានភ្ញៀវទេសចរចាប់ផ្ដើមមកលេងកំសាន្តជាបណ្ដើរៗហើយ ៕ (កែសម្រួលដោយ ៖ ធីតា)
ចែករំលែកព័តមាននេះ