រាជធានីភ្នំពេញ, ថ្ងៃទី ២ខែឧសភា ឆ្នាំ ២០២០ ៖ ណាហ្គាវើលដ៍បេះដូងសប្បុរស ដែលជា ផ្នែកការងារទំនួលខុសត្រូវសង្គមរបស់ក្រុមហ៊ុនណាហ្គាវើលដ៍ បានឧបត្ថម្ភម៉ាស់មុខ ១០.០០០ បន្ទះ ជែលលាងដៃ ១.០០០ ដប និងទឹកអាល់កុលលាងដៃ ១៨០ លីត្រដល់ ក្រសួងអប់រំ យុវជន និងកីឡា ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាល ដើម្បី ទប់ស្កាត់ការរីករាលដាលនៃមេរោគកូវីដ-១៩ ក្នុងប្រទេសកម្ពុជា ។
នាយកគ្រប់គ្រង ណាហ្គាវើលដ៍ លោក Pern Chen បានមានប្រសាសន៍ថា «ស្ថានភាព ដែលពុំធ្លាប់កើតមាននេះ បានជះឥទ្ធិពលអាក្រក់ជាច្រើនមកលើគ្រួសារ និងសហគមន៍ របស់យើង ខណៈជីវភាពរស់នៅរបស់ពួកគេទទួលរងផលប៉ះពាល់យ៉ាងខ្លាំងដែលអ្នកខ្លះ មិនមានលទ្ធភាព ដើម្បីទិញសម្ភារការពារផ្ទាល់ខ្លួនឡើយ ។ យើងសង្ឃឹមថា ការឧបត្ថម្ភ របស់យើងអាចឆ្លើយតបទៅកាន់ការអំពាវនាវរបស់រដ្ឋាភិបាល ដើម្បីទប់ស្កាត់ការរីករាល ដាលនៃមេរោគដ៏កាចសាហាវនេះបាន» ។
លោក Pern ក៏បានបន្ថែមផងដែរថា «ជាមួយសម្ភារផ្គត់ផ្គង់ទាំងនេះ ក្រសួងនឹងអាចជួយ ដល់សហគមន៍ជាច្រើនដែលកំពុងត្រូវការវា» ។
រដ្ឋមន្ត្រីក្រសួងអប់រំ ឯកឧត្តមបណ្ឌិតសភាចារ្យ ហង់ជួន ណារ៉ុន បានទទួលសម្ភារដោយ ផ្ទាល់ពីលោក Pern Chen នៅឯក្រសួងអប់រំ យុវជន និងកីឡា ។ ឯកឧត្តមបណ្ឌិត សភាចារ្យ បានឲ្យដឹងថា «គំនិតផ្តួចផ្តើមដ៏មានតម្លៃរបស់ ណាហ្គាវើលដ៍ ពិតជាមានសារ សំខាន់ណាស់សម្រាប់ក្រសួង និងសាលារៀននៅតាមសហគមន៍ដើម្បីការពារខ្លួនយើង ពីមេរោគកូវីដ-១៩» ។
«យើងខ្ញុំសូមថ្លែងអំណរគុណដល់ក្រុមហ៊ុន ណាហ្គាវើលដ៍ ចំពោះ ទឹកចិត្តសប្បុរសលើកកម្ពស់ការអនុវត្តសម្រាប់សុខភាពល្អ និងអនាម័យនៅក្នុងពេល មានវិបត្តិសុខភាពសកលលោកនេះ ។ យើងខ្ញុំសូមប្រគល់លិខិតថ្លែងអំណរគុណដើម្បី អរគុណដល់អំណោយដ៏ថ្លៃថ្លារបស់ពួកគេ» ។
អំពីផ្នែកការងារទំនួលខុសត្រូវសង្គមរបស់ក្រុមហ៊ុន ណាហ្គាវើលដ៍
ណាហ្គាវើលដ៍បេះដូងសប្បុរស ត្រូវបានបង្កើតឡើងក្នុងខែមីនា ឆ្នាំ ២០១៤ ដោយបុគ្គលិក ណាហ្គាវើលដ៍ ដែលមានការគាំទ្រយ៉ាងពេញទំហឹងពីក្រុមហ៊ុន ណាហ្គាវើលដ៍ ដើម្បីលើកកម្ពស់ការស្ម័គ្រចិត្តសម្រាប់សង្គមកម្ពុជាទាំងមូលដោយផ្តោតទៅលើសសរស្តម្ភ ៤ គឺការ លើកកម្ពស់វិស័យអប់រំ ការផ្សារភ្ជាប់ជាមួយសហគមន៍ ការអភិវឌ្ឍវិស័យកីឡា និងការ គាំពារបរិស្ថាន ។ មកដល់បច្ចុប្បន្នមានប្រជាជនកម្ពុជាជាង ២៣០.០០០ នាក់បានទទួល ផលប្រយោជន៍ពីកម្មវិធីទាំងនេះ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ