ខេត្តបន្ទាយមានជ័យ ៖ តាមព័ត៌មានចុងក្រោយពាក់ព័ន្ធនឹងករណីផ្ទុះអាវុធ ដោយមិនដឹងមូលហេតុ បណ្តាលឱ្យបុរសម្នាក់បាត់បង់ជីវិត និងមន្ត្រីប៉ូលិសម្នាក់រងរបួសធ្ងន់ កាលពីវេលាម៉ោងជាង១ឈានចូលព្រឹកថ្ងៃទី៣ ឧសភា ឆ្នាំ២០២០ នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ហើយក៏មានស្ត្រីម្នាក់ស្ថិតក្នុងហេតុការណ៍ខាងលើនេះត្រូវបានសមត្ថកិច្ចកំពុងធ្វើការសាកសួរ ដើម្បីឱ្យដឹងមូលហេតុពិត ។ គួររំលឹកថា មិនដឹងរឿងអ្វី ផ្ទុះអាវុធប្រាវ ម្នាក់បាត់បង់ជីវិត មន្ត្រីប៉ូលិសម្នាក់ទៀតរបួសធ្ងន់
គិតមកត្រឹមរសៀលថ្ងៃទី៣ ឧសភា នេះ សមត្ថកិច្ចជំនាញបានប្រាប់ឱ្យដឹងថា ករណីខាងលើ ដំបូងឡើយមានក្មេងទំនើងដេញកាប់គ្នា ហើយពេលមន្ត្រីនគរបាលរងគ្រោះខាងលើជិះម៉ូតូឆ្លងកាត់កើតហេតុខាងលើក៏ជួបនារីរងគ្រោះធ្លាក់ពីលើម៉ូតូ ក៏សួរនាំ និងដឹកជូននាងទៅផ្ទះ ប៉ុន្តែពេលកំពុងដឹកនាងទៅលំនៅដ្ឋាន បែរជាមានមនុស្ស១ក្រុមជិះម៉ូតូប្រដេញតាមកាប់ ធ្វើឲ្យសមត្ថកិច្ចរងរបួសធ្ងន់ និងឈានទៅផ្ទុះអាវុធដើម្បីការពារខ្លួន បណ្តាលឲ្យបុរសម្នាក់ខាងលើបាត់បង់ជីវិតតែម្តង។
តាមប្រភពដដែលបានបន្តថា ក្រុមក្មេងទំនើងដែលដេញកាប់គ្នាខាងលើនេះ ក្នុងនោះមួយចំនួនត្រូវបានសមត្ថកិច្ចស្គាល់អត្តសញ្ញាណអស់ហើយ និងកំពុងស្រាវជ្រាវ ដើម្បីចាប់ខ្លួនយកទៅផ្តន្ទាទោសឲ្យខាងតែបាន។
ចំណែកស្ត្រីម្នាក់នៅក្នុងហេតុការណ៍ខាងលើដែលសមត្ថកិច្ចហៅទៅធ្វើការសាកសួរបានឱ្យដឹងថា មុនពេលកើតហេតុ នាងជិះម៉ូតូជាមួយភាគីម្ខាងនៃក្រុមដេញកាប់គ្នាខាងលើនោះ លុះក្រោយនាងធ្លាក់ពីលើម៉ូតូ ត្រូវបានមន្ត្រីនគរបាលរងគ្រោះជួយដឹកទៅលំនៅដ្ឋាន ធ្វើឲ្យក្រុមជនសង្ស័យឃើញយល់ច្រឡំក៏ដេញកាប់រហូតក្លាយជាអំពើហិង្សាឈានដល់ការផ្ទុះអាវុធនិងកាប់ចាក់បណ្តាលឱ្យមានអ្នកបាត់បង់ជីវិត និងអ្នករងរបួសធ្ងន់តែម្តង។
បច្ចុប្បន្ន មន្ត្រីនគរបាលដែលរងគ្រោះ ពេលនេះត្រូវបានបញ្ជូនបន្តទៅព្យាបាលនៅមន្ទីរពេទ្យមួយក្នុងខេត្តបាត់ដំបងដើម្បីសង្គ្រោះ ព្រោះតែស្ថានភាពរបួសធ្ងន់ធ្ងរ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ