ប្រទេសជប៉ុន ៖ លោកនាយករដ្ឋមន្ត្រី ស៊ីនហ្សូ អាបេ បាននិយាយកាលពីថ្ងៃពុធថា ព្រឹត្តិការណ៍អូឡាំពិកទីក្រុងតូក្យូ នឹងមិនអាចប្រព្រឹត្តទៅបានទេនៅឆ្នាំក្រោយតាមលក្ខណៈល្អឥតខ្ចោះរបស់ខ្លួន លើកលែងតែជំងឺរាតត្បាតកូវីដ-១៩រលត់ផុតពីផែនដី ។
គណៈកម្មាធិការអូឡាំពិកអន្តរជាតិ (IOC) និងរដ្ឋាភិបាលជប៉ុន កាលពីខែមុនបានសម្រេចពន្យារពេលការប្រកួតរហូតដល់ខែកក្កដា ឆ្នាំ ២០២១ ដោយសារតែវិបត្តិកូវីដ-១៩ ។
ដោយសារអត្រានៃការឆ្លងរាលដាលទូទាំងពិភពលោក បានកើនឡើងហើយក្រុមអ្នកជំនាញបានលើកឡើងថា វ៉ាក់សាំងវីរុសនេះត្រូវការប្រើពេលយូរក្នុងផលិត ដូច្នេះមានការសង្ស័យជុំវិញឱកាសនៃការប្រារព្ធព្រឹត្តិការណ៍ដ៏ធំៗនៅឆ្នាំក្រោយ។
លោក ស៊ីនហ្សូ អាបេ បានលើកឡើងថា ការប្រកួតកីឡាអូឡាំពិក និងប៉ារ៉ាឡាំពិកត្រូវតែធ្វើឡើងជាមួយទម្រង់ពេញលេញ ក្នុងនោះអត្តពលិក និងអ្នកទស្សនាទាំងអស់អាចចូលរួមដោយសុវត្ថិភាព។ ប៉ុន្តែវានឹងមិនអាចទៅរួចទេ ក្នុងការរៀបចំព្រឹត្តិការណ៍នេះក្នុងទម្រង់ពេញលេញមួយ លើកលែងតែវាត្រូវបានធានាថា កូវីដ-១៩ ត្រូវបានគ្រប់គ្រង់បាន ១០០ភាគរយ ។
ក្នុងបញ្ហានេះ IOC ក៏បានយល់ស្របទាំងស្រុងទៅនឹងជំហររបស់លោកនាយករដ្ឋមន្ត្រី ស៊ីនហ្សូ អាបេ ផងដែរ ។
កាលពីប៉ុន្មានថ្ងៃថ្មីៗនេះ លោក Yoshiro Mori ប្រធានរៀបចំព្រឹត្តិការណ៍អូឡាំពិកក្រុងតូក្យូ បានប្រាប់សារព័ត៌មានក្នុងស្រុក Nikkan Sports ថាការប្រកួតនឹងត្រូវលុបចោលតែម្តង ប្រសិនបើព្រឹត្តិការណ៍នេះមិនអាចធ្វើបាននៅក្នុងឆ្នាំ ២០២១ ៕ (ដកស្រង់ចេញពី Japantimes)
ចែករំលែកព័តមាននេះ