ខេត្តស្វាយរៀង ៖ មានភាពចម្រូងចម្រាស់ប្រជាពលរដ្ឋលើកគ្នាបិទផ្លូវតវ៉ា និងបានចោទសមត្ថកិច្ចថា អនុវត្តច្បាប់ចរាចរណ៍ផ្លូវគោកជ្រុល ដោយចាប់ដាក់ខ្នោះ ហើយវាយលើរាង្គកាយអ្នកបើកបររ៉ឺម៉ក់ដឹកពូកលក់តាមមូលដ្ឋានម្នាក់ ធ្វើឲ្យអ្នកស្រុកខឹងសម្បាយ៉ាងខ្លាំង។ ករណីនេះបានកើតឡើងនៅម៉ោង១១និង៤៥នាទីព្រឹក ថ្ងៃទី២…
ខេត្តស្វាយរៀង ៖ មានភាពចម្រូងចម្រាស់ប្រជាពលរដ្ឋលើកគ្នាបិទផ្លូវតវ៉ា និងបានចោទសមត្ថកិច្ចថា អនុវត្តច្បាប់ចរាចរណ៍ផ្លូវគោកជ្រុល ដោយចាប់ដាក់ខ្នោះ ហើយវាយលើរាង្គកាយអ្នកបើកបររ៉ឺម៉ក់ដឹកពូកលក់តាមមូលដ្ឋានម្នាក់ ធ្វើឲ្យអ្នកស្រុកខឹងសម្បាយ៉ាងខ្លាំង។
ករណីនេះបានកើតឡើងនៅម៉ោង១១និង៤៥នាទីព្រឹក ថ្ងៃទី២ ខែឧសភា ឆ្នាំ២០២០ ស្ថិតនៅភូមិត្រពាំងបុណ្យ ឃុំព្រៃគគីរ ស្រុកចន្ទ្រា រហូតដល់ម៉ោង៣និង៣០នាទីរសៀល ទើបដោះស្រាយបញ្ចប់រឿងដោយឲ្យសមត្ថកិច្ច (ដែលវាយ និងដាក់ខ្នោះអ្នកបើកបររ៉ឺម៉ក់) មកសុំទោសជាសាធារណៈនៅមុខមហាជន ដើម្បីបញ្ចប់រឿង។
រីឯម្ចាស់ម៉ូតូសណ្តោងរ៉ឺម៉ក់ម្នាក់ ក្នុងចំណោមរ៉ឺម៉ក់៣គ្រឿងបានឲ្យដឹងថា ពួកគាត់ទាំង៣រ៉ឺម៉ក់មានទីលំនៅឯខេត្តតាកែវ ហើយបាននាំគ្នាមករកស៊ីដឹកពូកលក់តាមមូលដ្ឋាននៅខេត្តស្វាយរៀង ជាច្រើនខែមកហើយ ស្រាប់តែនៅថ្ងៃទី១ ខែឧសភានេះ ក៏មានច្បាប់រឹតបន្តឹងការអនុវត្តច្បាប់ចរាចរណ៍ផ្លូវគោក ត្រូវឲ្យអ្នកបើកម៉ូតូសណ្តោងរ៉ឺម៉ក់មានប័ណ្ណបើកបរ ។ ប៉ុន្តែរូបគាត់ទៅធ្វើប័ណ្ណបើកបរមិនទាន់ ក៏សម្រេចចិត្តសុំលក់ពូកឱ្យអស់ ដើម្បីត្រឡប់ទៅផ្ទះវិញសិន ទើបទៅធ្វើប័ណ្ណបើកបរ ស្រាប់តែនៅថ្ងៃទី២ ខែឧសភានេះ ក៏ត្រូវសមត្ថកិច្ចចាប់ផាកពិន័យ១៨ម៉ឺនរៀលក្នុងម៉ូតូរ៉ឺម៉ក់មួយ ។
ម្ចាស់ម៉ូតូសណ្តោងរ៉ឺម៉ក់បន្តថា ពេលនោះរូបគាត់គ្មានប្រាក់បង់ លុះដល់ម៉ោង១១និង៣៥នាទីព្រឹក សមត្ថកិច្ចឈរជើងនៅគោលដៅនោះបាននាំគ្នាចេញទៅហូបបាយអស់ ចំណែកពួកគាត់ក៏បើកម៉ូតូរ៉ឺម៉ក់ចេញទៅដែរ ក៏ត្រូវសមត្ថកិច្ចដេញតាម និងចាប់វាយ រួចដាក់ខ្នោះ ចាប់បញ្ជូនទៅអធិការដ្ឋានស្រុកចន្ទ្រា ពេលនោះមហាជនក្នុងភូមិឃើញក៏នាំគ្នាមកបិទផ្លូវតវ៉ាមិនឲ្យសមត្ថកិច្ចចាប់ពួកគាត់យកទៅនោះទេ។
ទាក់ទិនករណីខាងលើនេះដែរ លោកវរសេនីយ៍ទោ សួគ៌ ធី អធិការរងទទួលបន្ទុកផ្នែកចរាចរណ៍ផ្លូវគោកអធិការដ្ឋាននគបាលស្រុកចន្ទ្រា បានមានប្រសាសន៍ថា នេះគឺជាការរឹតបន្តឹងនូវការអនុវត្តច្បាប់ចរាចរណ៍ផ្លូវគោក។
លោកបន្តទៀតថា ចំពោះមូលហេតុ គឺអ្នកបើកបរម៉ូតូរ៉ឺម៉ក់ គ្មានប័ណ្ណបើកបរ និងដឹកសំពីងសំពោងខុសបច្ចេកទេស សមត្ថកិច្ចក៏បានឃាត់រ៉ឺម៉ក់មកសាកសួរ និងធ្វើការផាកពិន័យតាមច្បាប់ ក៏ប៉ុន្តែម្ចាស់ម៉ូតូរ៉ឺម៉ក់រូបនោះមិនព្រមបង់ប្រាក់ផាកពិន័យ ហើយថែមទាំងបើកម៉ូតូរ៉ឺម៉ក់ចេញទៅទៀត ពេលនោះសមត្ថកិច្ចបានហៅឲ្យឈប់ ក៏ប៉ុន្តែអ្នកបើកបររ៉ឺម៉ក់មិនព្រមឈប់នោះទេ ទើបសមត្ថកិច្ចយើងបើករថយន្តដេញតាមទាន់នៅកន្លែងកើតហេតុខាងលើ រួចឲ្យយកម៉ូតូរ៉ឺម៉កត្រឡប់មកកន្លែងសមត្ថកិច្ចឈជើងវិញ ប៉ុន្តែអ្នកបើករ៉ឺម៉ក់មិនព្រម ទើបមានការចាប់វាយខ្នោះ និងមានការប្រវាយប្រតប់គ្នាកើតជារឿង រហូតមានប្រជាពលរដ្ឋនាំគ្នាមកតវ៉ាបិទផ្លូវតែម្តង។
ក្រោយពីមានការសម្របសម្រួលពីលោកឧត្តមសេនីយ៍ត្រី ភោគ សាខុន ស្នងការរងទទួលបន្ទុកផ្នែកចរាចរណ៍ផ្លូវគោកស្នងការដ្ឋាននគបាលខេត្តស្វាយរៀង និងលោកអភិបាលស្រុកចន្ទ្រា បានចុះទៅសម្របសម្រួលម្ចាស់ម៉ូតូរ៉ឺម៉ក់ទាំង៣គ្រឿង ក៏ឈានដល់ការព្រមព្រៀងដោយម្ចាស់ម៉ូតូរ៉ឺម៉ក់ឲ្យសមត្ថកិច្ចទាំង៤រូប មកសុំទោសរូបគាត់ជាសាធារណៈនៅមុខមហាជន ហើយលោកវរសេនីយ៍ទោ សួគ៌ ធី អធិការរងស្រុកចន្ទ្រា បានចេញមកសុំទោសជាសាធារណៈតាមការទាមទាររបស់មហាជន ដូច្នេះប្រជាពលរដ្ឋក៏បានបំបែកគ្នាទៅផ្ទះរៀងៗខ្លួន។ សូមប្រជាពលរដ្ឋចូលរួមអនុវត្តច្បាប់ចរាចរណ៍ផ្លូវគោកទាំងអស់គ្នា៕ (កែសម្រួលដោយ ៖ បុប្ផា)
ចែករំលែកព័តមាននេះ