ខេត្តមណ្ឌលគិរី ៖ គិតត្រឹមថ្ងៃទី០២ ឧសភា នេះ នៅតាមផ្ទះសំណាក់ សណ្ឋាគារ ភោជនីយដ្ឋាន និងអាហារដ្ឋានជាច្រើន ស្ថិតក្នុងក្រុងសែនមនោរម្យបានបើកទ្វារប្រកបអាជីវកម្មឡើងវិញហើយ…
ខេត្តមណ្ឌលគិរី ៖ គិតត្រឹមថ្ងៃទី០២ ឧសភា នេះ នៅតាមផ្ទះសំណាក់ សណ្ឋាគារ ភោជនីយដ្ឋាន និងអាហារដ្ឋានជាច្រើន ស្ថិតក្នុងក្រុងសែនមនោរម្យបានបើកទ្វារប្រកបអាជីវកម្មឡើងវិញហើយ ខណៈស្ថានភាពជំងឺកូវីត១៩នៅក្នុងប្រទេសកម្ពុជាក៏បានស្ងប់ស្ងាត់ផងដែរ ប៉ុន្តែបងប្អូនក៏មិនត្រូវភ្លេចខ្លួននិងប្រហែសនោះ ក្នុងការបន្តការពារពីជំងឺនេះដែរ ។
គួររំលឹកថា មុនរដូវបុណ្យចូលឆ្នាំខ្មែរ និងថ្ងៃបុណ្យចូលឆ្នាំ គេសង្កេតឃើញថា ទូទាំងខេត្តមណ្ឌលគិរី បានប្រែស្ងាត់ជ្រងំតាមដងផ្លូវ តាមរមណីយដ្ឋាន គ្មានមនុស្សចេញ-ចូល។ ចំណែកច្រកទ្វារទ្វេរភាគីកម្ពុជា-វៀត ណាមទាំងបី នៅច្រកឡាប៉ាខេ ច្រកដាក់ដាំ ច្រកណាំលៀ គឺត្រូវបានបិទទាំងស្រុង ។
អាជីវករម្ចាស់ផ្ទះសំណាក់ហេងហេងបានឲ្យដឹងថា ខ្លួនបានបើកទទួលភ្ញៀវវិញជាបណ្តើរៗ ព្រោះតែបានបិទទ្វារជាង១ខែ ធ្វើឲ្យប៉ះពាល់ចំណូលជាខ្លាំង ។តែបើគាត់បើកនៅពេលនោះ ក៏មានមនុស្សស្នាក់អាស្រ័យដែរ ព្រោះតែគេមិនហ៊ានដើរលេងទេ។ ម្ចាស់ផ្ទះសំណាក់ដដែលបញ្ជាក់ថា ទោះជាគាត់សម្រេចចិត្តបើកអាជីវកម្មឡើងវិញ ប៉ុន្តែគាត់នៅតែមានការព្រួយបារម្ភពីជំងឺកូវីត ហើយគាត់បានបិទស្លាកណែនាំរបស់ក្រសួងសុខាភិបាល សម្រាប់ដាស់តឿននិងរៀបចំដបអាល់កុលទុកសម្រាប់ភ្ញៀវសម្អាតដៃផងដែរ។
ចំណែកម្ចាស់ភោជនីយដ្ឋាននៅម្តុំចុងព្រលានក្នុងក្រុងសែនមនោរម្យបានឲ្យដឹងថា បន្ទាប់ពីមើលឃើញថា មានភ្ញៀវទេសចរណ៏មកដើរលេងនៅខេត្តមណ្ឌលគិរី ខ្លះវិញគាត់ក៏ចាប់ផ្តើមបើកលក់ ចំណីអាហារ មានបាយ គុយទាវ ជាដើមដើម្បីបំពេញតម្រូវការភ្ញៀវនិងផ្គត់ផ្គង់ជីវភាពគ្រួសារ ព្រោះគាត់បានខាត់បង់លើការចំនាយប្រចាំថ្ងៃយូរដែរមកហើយ។
អាជ្ញាធរខេត្តមណ្ឌលគិរីបានឲ្យដឹងថា វិស័យទេសចរណ៍ក្នុងខេត្តទើបល្អឡើងវិញតិចតួច ដោយភ្ញៀវទេសចរដែលចាប់ផ្ដើមចូលមកកម្សាន្តមានប្រមាណ ៣%ទៅ៥%ប៉ុណ្ណោះ។ក្នុងនោះសកម្មភាពអាជីវកម្មនានាក្នុងខេត្តក៏បានបើកដំណើរការជាបណ្តើរៗឡើងវិញ។
ទោះជាយ៉ាងណា ក្រុមមន្ត្រីជំនាញបានដាក់ការប្រមានផងដែរ ជុំវិញការធ្វេសប្រហែសរបស់ប្រជាពលរដ្ឋ បើមិនយកចិត្តទុកដាក់ការពារខ្លួន បង្កើនការរក្សាអនាម័យ ផ្អាកការជួបជុំ ទេនោះបញ្ហាជំងឺកូវីដ១៩និងអាចរីករាលដាលជាថ្មីម្តងទៀត៕
ចែករំលែកព័តមាននេះ