ខេត្តព្រះវិហារ ៖ ដោយសារតែវីរុសកូវីដ ១៩ កសិករមួយចំនួនដែលមានចម្ការស្វាយ នៅក្នុង ខេត្តព្រះវិហារ បានសម្រេចចិត្តបេះផ្លែស្វាយកែវរមៀតលក់ទៅឱ្យឈ្មួញក្នុងតម្លៃថោកបំផុត ព្រោះពួកគាត់គិតថា ទោះបីជាលក់បានតម្លៃថោក…
ខេត្តព្រះវិហារ ៖ ដោយសារតែវីរុសកូវីដ ១៩ កសិករមួយចំនួនដែលមានចម្ការស្វាយ នៅក្នុង ខេត្តព្រះវិហារ បានសម្រេចចិត្តបេះផ្លែស្វាយកែវរមៀតលក់ទៅឱ្យឈ្មួញក្នុងតម្លៃថោកបំផុត ព្រោះពួកគាត់គិតថា ទោះបីជាលក់បានតម្លៃថោក ក៏ប្រសើរជាងទុកផ្លែស្វាយទាំងអស់នេះ ទុំជ្រុះចោលពេញចម្ការដែរ ។
លោក ម៉ា ដារ៉េត ជាកសិករនៅរស់នៅឃុំស្រយង់ ស្រុកគូលែន ខេត្តព្រះវិហារ បានឱ្យ ដឹងថា ឆ្នាំនេះកសិករដាំដំណាំស្វាយ គឺជួបនឹងវិបត្តិសេដ្ឋកិច្ចយ៉ាងខ្លាំង ដោយសារតែឥទ្ធិពល នៃវីរុសកូវីដ ១៩ បានធ្វើឱ្យទីផ្សារស្វាយធ្លាក់ចុះខ្លាំងក្នុងឆ្នាំនេះ ធ្វើឱ្យខាតបង់ប្រាក់ច្រើនលើ ការថែទាំ និងជួលកម្មករបេះផ្លែស្វាយ ។
លោកបន្តថា តម្លៃស្វាយកែវរមៀត គិតត្រឹមពាក់កណ្តាលខែមេសា ឆ្នាំនេះ មានតម្លៃ ត្រឹមតែ ១៥០រៀលប៉ុណ្ណោះ ក្នុងមួយគីឡូក្រាម បើប្រៀបធៀបទៅនឹងឆ្នាំមុន ខុសគ្នា ១០ដង ម្យ៉ាងវិញទៀតកាលពីប៉ុន្មានឆ្នាំកន្លងទៅនៅពេលរដូវបេះផ្លែស្វាយ តែងតែមានឈ្មួញដើរម៉ៅ ចម្ការតែម្តង ដោយគិតក្នុង ១ដើមបានចន្លោះពី ១០ដុល្លារឡើងទៅ ។ តែទោះជាតម្លៃថោក យ៉ាងណាក៏ដោយ ក៏ត្រូវតែបេះលក់ដែរ ព្រោះអាចបានកម្រៃខ្លះៗ សម្រាប់ផ្គត់ផ្គង់ជីវភាព គ្រួសារ ប្រសើរជាងទុកផ្លែស្វាយឱ្យទុំជ្រុះចោលពេញចម្ការ ។
ជាមួយគ្នានេះដែរលោក ផាន់ សំអាង ប្រធានមន្ទីរពាណិជ្ជកម្មខេត្តព្រះវិហារ បាន ទទួលស្គាល់ថា តម្លៃផ្លែស្វាយពិតជាធ្លាក់ថ្លៃប្រាកដមែន មិនថាឡើយតែស្វាយមួយមុខ ប៉ុណ្ណោះទេ នៅមានកសិផលមួយចំនួនទៀតក៏ធ្លាក់ថ្លៃដែរ នេះមិនមែនតែខេត្តព្រះវិហារ នោះទេ តាមបណ្តាខេត្តផ្សេងៗក៏ដូចគ្នាដែរ ម្យ៉ាងវិញទៀត គឺលំបាកក្នុងការដឹកចេញពីព្រំដែនតែម្តង ដោយសារតែស្ថានភាពជំងឺកូវីដ នៅតែបន្តរាតត្បាត ។
ស្ត្រីអ្នកទិញផ្លែស្វាយនៅឃុំស្រយ៉ង់ បានឱ្យដឹងដែរថា ផ្លែស្វាយទាំងអស់ អ្នកស្រីបាន ទិញយកទៅលក់បន្តនៅប្រទេសវៀតណាមទាំងអស់ ដោយឡែកចំពោះតម្លៃទីផ្សារវិញនៅ ខាងវៀតណាមមានការធ្លាក់ថ្លៃ ដូច្នេះហើយ អ្នកបញ្ជាទិញពីវៀតណាមឱ្យតម្លៃមកឈ្មួញជា អ្នកប្រមូលទិញពីកសិករមានតម្លៃទាប ទើបអ្នកស្រីទិញពីកសិករផ្ទាល់ក្នុងតម្លៃទាបដែរ ៕
ចែករំលែកព័តមាននេះ