ខេត្តកណ្ដាល ៖ ប្រជាពលរដ្ឋរស់នៅភូមិស្វាយអាត់ក្រោម ស្វាយអាត់លើ និងស្វាយអាត់កណ្តាល ស្ថិតក្នុងឃុំព្រែកតាមាក់ ស្រុកខ្សាច់កណ្តាល ខេត្តកណ្តាល បាននាំគ្នាចាប់មុខរបរដាំស្មៅសួនច្បារ មិនខ្វល់និងជំងឺ
កូវីដ១៩ និងធ្វើឱ្យជីវភាពធូរធាបានមួយយកម្រិតដែរ ។
បើគេធ្វើដំណើរពីភ្នំពេញតាមផ្លូវជាតិលេខ៦អា ឆ្ពោះទៅទីតាំងដាំស្មៅ សម្រាប់រៀបសួនច្បារដែលជាស្នាដៃកូនខ្មែរ ស្ថិតក្នុងឃុំព្រែកតាមាក់ ស្រុកខ្សាច់កណ្តាល ខេត្តកណ្តាល ប្រមាណជាង២០គីឡូម៉ែត្រ ។ ហើយត្រូវឆ្លងស្ពានព្រែកតាមាក់ ត្រើយខាងកើតដល់រង្វង់មូលបត់ស្តាំដៃ តាមបណ្តោយផ្លូវលេខ៣៨០ ។
ពីរង្វង់មូល ទៅដល់ទីតាំងដាំស្មៅប្រមាណជា៧គីឡូម៉ែត្រនោះគេ នឹងឃើញមានវាលស្រែខៀវខ្ចីនៅខាងឆ្វេងដៃផ្លូវលេខ៣៨០រាប់រយហិកតាគឺជាស្រែដាំស្មៅសម្រាប់រៀបសួន ។
អ្នកស្រីសុខ ជា ដែលមានអាយុប្រមាណជា៤០ឆ្នាំ ជាអ្នកស្រុកភូមិស្វាយអាត់ក្រោម ដែលចាប់មុខរបរដាំស្មៅរៀបសួនបានរៀបរាប់ឲ្យដឹងថា ៖ អ្នកបានចាប់យកមុខរបរដាំស្មៅសម្រាប់រៀបសួនច្បារនេះរយៈពេលជាង១០ឆ្នាំ តាំងពីស្មៅលក់ក្នុងមួយការ៉េតម្លៃ៦កាក់ទៅ៧កាក់ប៉ុណ្ណោះ ។ ពេលនេះ ស្មៅមានតម្លៃពី១ដុល្លារ៣កាក់ ទៅ១ដុល្លារ៤កាក់ ហើយអ្នកស្រីបានដាំស្មៅសម្រាប់រៀបសួនមាន២ប្រភេទ គឺស្មៅជប៉ុននិងស្មៅម៉ាឡេ ។
បច្ចុប្បន្ន គាត់បានដាំស្មៅនេះជាង១មុឺនម៉ែត្រការ៉េដីមួយចំនួនគាត់ជួលពីអ្នក ហើយមួយចំណែកជាដីរបស់ខ្លួន ។ អ្នកស្រីសុខ ជា បានបញ្ជាក់ថា ៖ ពូជស្មៅទាំងពីរប្រភេទខាងលើនេះគាត់បានមកពីអ្នកដាំស្មៅដំបូងដែលគេនាំចូលពីក្រៅប្រទេសហើយនេះយើងពូជបន្តមិនបាច់នាំចូលពីក្រៅទៀតឡើយ ។ បើយើងដាំស្មៅម៉ាឡេត្រូវប្រើពេលមួយខែកន្លះទើបឈួសយកទៅរៀបសួនបានដោយឡែកស្មៅជប៉ុនរង់ចាំ២ខែ ។
អ៊ុំប្រុស សយ សារុំ មានអាយុជាង៥០ឆ្នាំ រស់នៅភូមិស្វាយអាត់លើ បាននិយាយថា ៖ មុខរបរដាំស្មៅជប៉ុននិងម៉ាឡេនេះនឿយហត់ខ្លាំងណាស់ហើយក៏ត្រូវចំណាយទៅលើកម្មករក្នុងការដាំនិងថែរធួន ពេលខែវស្សាវាសំបូរទឹកភ្លៀង តែនៅពេលខែប្រាំងត្រូវរកទឹកយកមកបាញ់ស្មៅ ។ ដល់ពេលលក់សង្ឃឹមលើឈ្មួញកណ្តាលពេលខ្វះស្មៅគេឲ្យមួយការ៉េជិត២ដុល្លារ តែពេលស្មៅសំបូរគេឲ្យស្មៅទាំងពីរប្រភេទក្រោមមួយដុល្លារ ។
បច្ចុប្បន្ន គាត់មានដីដាំស្មៅប្រមាណ៥០ហិកតា ក្រោយពីប្រមូលផលរួចគាត់ត្រូវជួលកម្មករដាំឡើងវិញក្នុងម្នាក់មួយថ្ងៃ១៨០០០រៀល តែមិនអស់ថ្លៃពូជស្មៅនោះទេ ។ លោកសារុំ បានបញ្ជាក់ថា ៖ បច្ចុប្បន្នអ្នកភូមិស្វាយអាត់លើ ក្រោមនិងកណ្តាលចាប់យកមុខរបរដាំស្មៅមិនក្រោមពី៤០០គ្រួសារនោះទេសូម្បីតែដីភូមិក៏ពួកគាត់នាំគ្នាដាំស្មៅនេះ និយាយរួមអ្នកស្រុកទាំង៣ភូមិខាងលើមិនទុកដីទំនេរឥតប្រយោជន៍ឡើយម្យ៉ាងពេលនេះទាំងស្មោជប៉ុនក៏ដូចជាស្មៅម៉ាឡេមានហាងឆេងគ្រាន់បើ។
ដោយឡែកលោកអ៊ុំ គឹម ថា អ្នកស្រុកស្វាយអាត់កណ្តាលបានរៀបរាប់យ៉ាងដូច្នេះថា ៖ ពីដើមមានប្រមាណជា១០គ្រួសារប៉ុណ្ណោះដែលបាននាំគ្នាដាំស្មៅប្រភេទរៀបសួនដែលទិញពូជពីប្រទេសថៃ ពេលបានផលលក់ទៅឲ្យឈ្មួញក្នុងកាលនោះមួយម៉ែតតការ៉េតម្លៃ៥កាក់ ពេលខ្លះលក់មិនដាច់នាំឈួសចោលតែម្តង ។ លុះឥឡូវតម្លៃស្មៅ ក៏បានថ្លៃសមរម្យពូជស្មៅមិនបាច់ទិញពីក្រៅមក ពេលស្មៅបានផឈ្មួញមកទិញដល់ផ្ទះតែម្តង ។ ម្យ៉ាង ដីដែលដាំស្មៅនេះយកមកធ្វើស្រែវាមិនសូវបានផលផងទើបអ្នកស្រុកទាំងបីភូមិខាងលើនាំគ្នាដាំស្មៅប្រភេទរៀបសួនតែម្តងទៅ ។ហើយក៏មានអ្នកភូមិខ្លះចាប់យកមុខរបរនេះដែលអាចជួយ សម្រួល ជីវភាព គ្រួសារ ក្រៅពី ប្រាក់ខែ ដែល កូន បាន ពី រោងចក្រផងដែរ ។
អ្នកស្រីសុខ ជា បានឲ្យដឹងទៀតថា ៖ ពេលខ្លះ អ្នកស្រីត្រូវស្វែងរកទិញស្មៅម៉ាឡេ ដឹកយករៀបសួនច្បារ តារាងបាល់និងតាមភូមិគ្រិះនានារហូតដល់ខេត្តទៀត ។ កាលដើមឡើយគាត់គ្រាន់តែជាអ្នកដាំស្មៅធម្មតាតែប៉ុណ្ណោះ ក្រោយពីមានឈ្មួញកណ្តាលមកទិញស្មៅឲ្យតម្លៃទាប ទើបគាត់បែកគំនិតទិញស្មៅអ្នកភូមិនិងស្មៅរបស់គាត់ដែលដាំខ្លួនឯងផងដឹកទៅរៀបសួនតាមបណ្តាលខេត្តគ្រាន់ដោះស្រាយជីវភាពគ្រួសារ ។ ពេលនេះអ្នកភូមិទាំងបីខាងលើមមាញឹកក្នុងការដាំស្មៅជប៉ុននិងម៉ាឡេខ្លាំងណាស់ តែពួកគេមិនភ្លេចពាក់ម៉ាសនិងលាងដៃនិងទឹកអាកុលជាប្រចាំក្រោយពីធ្វើការដាំស្មៅរួចនោះទេ ៕
ចែករំលែកព័តមាននេះ