ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា អស់រយៈពេល១១ថ្ងៃមកហើយ ដែលដំរីព្រៃបានចូលទៅអុកឡុកភូមិឋានប្រជាពលរដ្ឋក្នុងសង្កាត់រមនា ក្រុងសែនមនោរម្យ រហូតធ្វើឲ្យផ្ទះអ្នកភូមិមួយខ្នងរងការខូចខាតដោយសារដំរីតប់ ចំណែកអ្នកភូមិមិនហ៊ានចូលទៅដេកក្នុងផ្ទះនោះទេ ព្រោះខ្លាចគ្រោះថ្នាក់ដល់អាយុជីវិត។ បើតាមសមត្ថកិច្ចឲ្យដឹងថា…
ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា អស់រយៈពេល១១ថ្ងៃមកហើយ ដែលដំរីព្រៃបានចូលទៅអុកឡុកភូមិឋានប្រជាពលរដ្ឋក្នុងសង្កាត់រមនា ក្រុងសែនមនោរម្យ រហូតធ្វើឲ្យផ្ទះអ្នកភូមិមួយខ្នងរងការខូចខាតដោយសារដំរីតប់ ចំណែកអ្នកភូមិមិនហ៊ានចូលទៅដេកក្នុងផ្ទះនោះទេ ព្រោះខ្លាចគ្រោះថ្នាក់ដល់អាយុជីវិត។
បើតាមសមត្ថកិច្ចឲ្យដឹងថា គិតចាប់ពីថ្ងៃទី២១ មេសា រហូតដល់ថ្ងៃទី០១ ឧសភា មានរយៈពេល១១ថ្ងៃហើយ ដែលដំរីព្រៃបានចូលមករកញីដល់ក្នុងភូមិ។ ហើយពេលដែលវាចូលមកដំបូង គឺវាបាននៅក្រវែលៗដំរីញីស្រុកចំនួន៤ក្បាលនៅភូមិពូត្រុំថ្មី សង្កាត់រមនា ។ ក្រោយដំរីព្រៃនោះព្យាយាមទាក់ដំរីស្រុកជាច្រើនថ្ងៃមិនបានសម្រេច វាក៏ដើរចេញពីភូមិពូត្រុំថ្មី កាត់ព្រៃ និងចំការអ្នកស្រុក ឆ្ពោះទៅភូមិពូត្រុំ (ភូមិដំរីជាន់) រហូតឈានដល់វាឈ្មុលផ្ទះប្រជាពលរដ្ឋ ធ្វើឱ្យខូចខាតអស់មួយខ្នង។
លោកនាយកដែនជម្រកការពារសត្វព្រៃកែវសីមាបាន ឲ្យដឹងយ៉ាងខ្លីថា មន្ត្រីនៅមិនទាន់មាននវិធានការអ្វីបន្ថែមនោះទេ ដោយបានត្រឹមតាមឃ្លាំមើលពីសកម្មភាពរបស់វាតែប៉ុណ្ណោះ។ ហើយករណីនេះក្រៅពីប្រើរបៀបសាមញ្ញាមិនទាន់អាចធ្វើអ្វីបានទៀតទេ។
ទោះជាយ៉ាងណា នៅថ្ងៃទី០១ ឧសភា នេះ កោះសន្តិភាពមិនអាចសុំការបញ្ជាក់ពីមន្ទីរបរិស្ថានខេត្តមណ្ឌលគិរីបានទេ។
ចំណែកមហាជនក៏បានលើកឡើងថា ខេត្តមណ្ឌលគិរីជាតំបន់សម្បូរព្រៃភ្នំ ហើយសម្បូរសត្វព្រៃធំៗ ហេតុអ្វីអាជ្ញាធរ ជាពិសេសមន្ទីរជំនាញមិនមានត្រៀមឧបករណ៍បង្ការហានិភ័យដែលកើតមានឡើង? ហើយអង្គការចិញ្ចឹមសត្វដំរី ដែលមានសត្វដំរីជាង១០ក្បាល ក៏មិនមានវិធីសាស្ត្រដើម្បីបង្ការករណីនេះទៅទៀត។ ដោយគេនៅចាំបានថា កាលពីអំឡុងឆ្នាំ២០១៧ សត្វដំរីចុះប្រេងមួយក្បាល ត្រូវបាញ់សម្លាប់ព្រោះតែមិនមានកាំភ្លើងបាញ់សន្លប់។ ដែលនោះជាបទពិសោធន៍ដ៏ឈឺចាប់ ខណៈប្រទេសកម្ពុជាមានសត្វប្រភេទកម្រ បែរជាត្រូវជាបាញ់សម្លាប់ ព្រោះតែគ្មានកិច្ចអន្តរាគមន៍ច្បាស់លាស់ពីអ្នកពាក់ព័ន្ធ៕ (កែសម្រួលដោយ ៖ បុប្ផា)
ចែករំលែកព័តមាននេះ