ប្រទេសអង់គ្លេស ៖ ខ្សែប្រយុទ្ធ Sergio Aguero របស់ក្លិប Manchester City បាននិយាយថា កីឡាករភាគច្រើនមានការភ័យខ្លាចចំពោះការចាប់ផ្តើមសកម្មភាពបាល់ទាត់ឡើងវិញ…
ប្រទេសអង់គ្លេស ៖ ខ្សែប្រយុទ្ធ Sergio Aguero របស់ក្លិប Manchester City បាននិយាយថា កីឡាករភាគច្រើនមានការភ័យខ្លាចចំពោះការចាប់ផ្តើមសកម្មភាពបាល់ទាត់ឡើងវិញ នៅពេលដែលការរីករាលដាលនៃវីរុសឆ្លងកូវីដ-១៩ នៅតែកំពុងបន្ត ។
ក្របខ័ណ្ឌ Premier League សង្ឃឹមថានឹងបន្តរដូវកាលឡើងវិញនៅថ្ងៃទី ៨ ខែ មិថុនា ដែលនឹងតម្រូវឲ្យកីឡាករវិលត្រឡប់ចូលជំរំហ្វឹកហាត់វិញនៅថ្ងៃទី ១៨ ខែ ឧសភា ខាងមុននេះ ។
ក្លិបកំពូលៗនឹងជួបគ្នានៅថ្ងៃសុក្រនេះ ដើម្បីពិភាក្សាពីជម្រើសសម្រាប់ការចាប់ផ្តើមលីគឡើងវិញ ។
Sergio Aguero ដែលបច្ចុប្បន្នមានវ័យ ៣១ ឆ្នាំបាននិយាយថា «កីឡាករភាគច្រើនមានការភ័យខ្លាច ព្រោះពួកគេមានកូន និងគ្រួសារដែលត្រូវមើលថែ» ។
ថ្លែងទៅកាន់ស្ថានីយ៍ទូរទស្សន៍អាហ្សង់ទីន El Chiringuito កីឡាករអន្តរជាតិអាហ្សង់ទីនរូបនេះបានបន្ថែមថា «ខ្ញុំពិតជាខ្លាច ប៉ុន្តែខ្ញុំជាមួយមិត្តស្រីនៅទីនេះ ហើយពួកយើងនឹងមិនមានទំនាក់ទំនងជាមួយមនុស្សផ្សេងទៀតទេ ។ ខ្ញុំបាននៅក្នុងផ្ទះរបស់ខ្ញុំមិនចេញទៅណា ហើយមនុស្សតែម្នាក់គត់ដែលខ្ញុំអាចឆ្លងបានគឺ មិត្តស្រីរបស់ខ្ញុំ»។
ក្របខ័ណ្ឌ Premier League ត្រូវបានផ្អាកចាប់តាំងពីថ្ងៃទី ១៣ ខែ មីនា ដោយសារតែរាតត្បាតនៃវីរុសកូវីដ-១៩ ប៉ុន្តែក្លិបទាំងអស់នៅតែប្តេជ្ញាចិត្តក្នុងការបញ្ចប់លីគនៅរដូវកាលនេះ។
ការប្រកួតទាំងអស់ត្រូវបានគេរំពឹងថា នឹងត្រូវបានធ្វើឡើងដោយបិទទ្វារកីឡដ្ឋាន ហើយលីគកំពុងពិចារណាក្នុងការចាក់ផ្សាយនៅលើកញ្ចក់ទូរទស្សន៍ ដោយឥតគិតថ្លៃ ។
Aguero បាននិយាយថា ខ្លួននិងមិត្តរួមក្រុម Man City មានការភ័យខ្លាច ហើយនិងប្រុងប្រយ័ត្នខ្ពស់បំផុត នៅពេលដែលពួកគេត្រឡប់មកធ្វើការហ្វឹកហាត់វិញ ៕ (ដកស្រង់ចេញពី BBC)
ចែករំលែកព័តមាននេះ