ប្រទេសអង់គ្លេស៖ អ្នកចាត់ការទូទៅក្លិប Tottenham Hotspur លោក Jose Mourinho បានបង្ហាញសកម្មភាពដឹកជញ្ជូនបន្លែផ្លែឈើស្រស់ៗ ពីសួនដំណាំរបស់ក្លិបផ្ទាល់ ដើម្បីចែកដល់ទូទាំងសហគមន៍…
ប្រទេសអង់គ្លេស៖ អ្នកចាត់ការទូទៅក្លិប Tottenham Hotspur លោក Jose Mourinho បានបង្ហាញសកម្មភាពដឹកជញ្ជូនបន្លែផ្លែឈើស្រស់ៗ ពីសួនដំណាំរបស់ក្លិបផ្ទាល់ ដើម្បីចែកដល់ទូទាំងសហគមន៍ ក្នុងអំឡុងពេលមានជំងឺរាតត្បាតកូវីដ-១៩ ។
នៅក្នុងរូបភាពដែលបានបង្ហោះដោយក្លិប Spurs លោក Mourinho ត្រូវបានគេមើលឃើញថា ពាក់ម៉ាស និងស្រោមដៃការពារពេលដឹកដំណាំស្រស់ៗ ពីចំការដំណាំដាំដោយផ្ទាល់របស់ក្លិប ដើម្បីទុកផ្គត់ផ្គង់សម្រាប់កីឡាករឈុតធំ ក្នុងការចែកចាយដល់អ្នកងាយរងគ្រោះអំឡុងពេលមានវិបត្តិដោយសារកូវីដ-១៩ ក្នុងតំបន់ជាពិសេសជនចាស់ជរា ។
នៅក្នុងសេចក្តីថ្លែងការណ៍មួយរបស់ Spurs បានឲ្យដឹងថា «ថ្ងៃនេះ (ថ្ងៃពុធ) លោក Jose Mourinho បានធ្វើការចែកចាយផលិតផលស្រស់ៗ នៅសប្តាហ៍ដំបូងពីសួនដំណាំរបស់ក្លិបនៅមជ្ឈមណ្ឌលបណ្តុះបណ្តាលរបស់យើង ទៅកាន់មជ្ឈមណ្ឌលចែកចាយអាហារ ដែលកំពុងដំណើរការនៅក្នុងកីឡដ្ឋានរបស់យើង»។
«ការចែកចាយរបស់លោករួមមាន បន្លែ និងផ្លែឈើសរីរាង្គស្រស់ៗ ដែលជាធម្មតាសម្រាប់ផ្គត់ផ្គង់ដល់កីឡាករឈុតធំ ដែលនឹងត្រូវចែកចាយដល់អ្នកដែលត្រូវបានកំណត់ថា មានតម្រូវការបំផុតនៅក្នុងសហគមន៍មូលដ្ឋានរបស់យើង»។
«ការផ្តល់ស្បៀងអាហារប្រមាណ ២,៨០០ កញ្ចប់ត្រូវបានធ្វើឡើងពីមជ្ឈមណ្ឌលក្នុងអំឡុងពេលនេះ ដែលផ្តល់ដល់គ្រួសារប្រមាណ ១.៥០០ គ្រួសារនៅក្នុងតំបន់ Haringey» ៕
ចែករំលែកព័តមាននេះ