ប្រទេសអង់គ្លេស ៖ បំណែកនៃព្រះច័ន្ទដែលធំជាងដុំថ្មដែលអវកាសយានិកអាប៉ូឡូបាននាំយកមកផែនដីវិញ គឺត្រូវបានដាក់លក់នៅឯក្រុមហ៊ុនដេញថ្លៃ Christie នៅចក្រភពអង់គ្លេស។
អាចម៍ផ្កាយ ដែលគេស្គាល់ថា NWA 12691 បានធ្លាក់មកផែនដី ហើយត្រូវបានគេរកឃើញកាលពី២ឆ្នាំមុន នៅវាលខ្សាច់សាហារ៉ា។ នេះបើយោងតាមការចេញផ្សាយពីគេហទំព័ររបស់ក្រុមហ៊ុនដេញថ្លៃ Christie។
ក្រុមហ៊ុនបាននិយាយថា តម្លៃដាក់លក់ គឺ២.៥លានដុល្លារអាមេរិក។ ជំនួសឱ្យការដេញថ្លៃ គឺគេដាក់វាលក់ក្នុងលក្ខណៈឯកជន។ ដូចនេះ ប្រសិនបើនរណាគេមានលុយ គឺអាចមកយកបានភ្លាមៗ។
សេចក្តីថ្លែងការណ៍បាននិយាយថា ថ្មព្រះច័ន្ទមានទម្ងន់តិចជា ១៣.៥គីឡូក្រាម ហើយវាជាបំណែកធំជាងគេទី៥ របស់ព្រះច័ន្ទ នៅលើផែនដី។ លោក James Hyslop ប្រធានវិទ្យាសាស្ត្រនិងប្រវត្តិសាស្ត្រធម្មជាតិរបស់ក្រុមហ៊ុន Christie បានប្រាប់ CNN តាមរយៈអ៊ីម៉ែលថា៖ «វាមិនមានអ្វីដែលធំដូចនេះទេ។ វាគឺជាបំណែកដែលធំជាងគេទី៥។ ពីមុនមកមិនមានអាប៉ូឡូណាអាចទៅយកបានធំដូចនេះទេ។ វាគឺជាឱកាសដ៏ពិសេសមួយ សម្រាប់ការយកបានវត្ថុមានតម្លៃលំដាប់ពិភពលោកពីព្រះច័ន្ទ»។
ក្រុមហ៊ុនបាននិយាយថា ថ្មនេះប្រហែលជាត្រូវបានធ្លាក់ចេញពីផ្ទៃព្រះច័ន្ទដោយការប៉ះទង្គិចជាមួយអាចម៍ផ្កាយ ឬផ្កាយដុះកន្ទុយមួយ។ បន្ទាប់មកវាត្រូវធ្វើដំណើរយ៉ាងហោចណាស់ ២៣៩,០០០ម៉ាយល៍ឆ្លងកាត់ទីអវកាស មុនពេលធ្លាក់មកផែនដីក្នុងទម្រង់ជាអាចម៍ផ្កាយ៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ