រាជធានីភ្នំពេញ ៖ មន្ត្រីជំនាញបានអះអាងថា ក្នុងរយៈពេល៣ថ្ងៃ ដោយគិតចាប់ពីថ្ងៃទី២៧ រហូតដល់ថ្ងៃទី៣០ ខែមេសានេះ ប្រជាពលរដ្ឋរាជធានីភ្នំពេញ បាននាំគ្នាសម្រុកទៅធ្វើការត្រួតពិនិត្យលក្ខណៈបច្ចេកទេសយានយន្ត(ឆៀក) ចំនួន៩៦៤៧គ្រឿង ខណៈពេលដែលសមត្ថកិច្ចប្រកាសចាប់ផ្តើមអនុវត្តន៏ និងរឹតបន្តឹងច្បាប់ចរាចរណ៏ចេញថ្មី ចាប់ពីថ្ងៃទី១ ខែឧសភានេះតទៅ ។
លោក អ៊ុន វ៉ាត ប្រធានការិយាល័យត្រួតពិនិត្យលក្ខណៈបច្ចេកទេសយានយន្តរបស់ក្រសួងសាធារណការ និងដឹកជញ្ជូន បានអោយកោះសន្តិភាពដឹងនៅព្រឹកថ្ងៃទី១ ខែឧសភានេះថា បន្ទាប់ពីសមត្ថកិច្ចប្រកាសចាប់ផ្តើមអនុវត្តន៏ និងរឹតបន្តឹងច្បាប់ចរាចរណ៏ចេញថ្មី ចាប់ពីថ្ងៃទី១ ខែឧសភានេះតទៅ ក្នុងរយៈពេល៣ថ្ងៃ គឺចាប់ពីថ្ងៃចន្ទទី២៧រហូតដល់ថ្ងៃទី៣០ ខែមេសានេះ ប្រជាពលរដ្ឋរាជធានីភ្នំពេញបាននាំគ្នាសម្រុកទៅធ្វើការត្រួតពិនិត្យលក្ខណៈបច្ចេកទេសយានយន្ត(ឆៀក)គ្រប់ប្រភេទ មានការកើនឡើងជារៀងរាល់ថ្ងៃ ។
លោកបានបន្តថា ក្នុងរយៈពេល៣ថ្ងៃកន្លងមកនេះ រថយន្តដែលបានចូលឆៀកនៅតាមតាមមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្តទាំង៥ក្នុងរាជធានីភ្នំពេញមានចំនួនសរុប៩៦៤៧គ្រឿង ក្នុងនោះ រថយន្តគ្រួសារចំនួន៦៣៤៦គ្រឿង រថយន្តដឹកអ្នកដំណើរធុនតូចចំនួន៧១៥គ្រឿង រថយន្តដឹកអ្នកដំណើរធុនធំចំនួន៤២គ្រឿង រថយន្តដឹកទំនិញធុនតូចចំនួន៥៥៣គ្រឿង រថយន្តដឹកទំនិញធុនធំចំនួន១៩៦៩ គ្រឿង និងគ្រឿងចក្រចំនួន២២គ្រឿងផងដែរ ។
លោក អ៊ុន វ៉ាត បានអោយដឹងទៀតថា សម្រាប់ថ្ងៃធម្មតានៅតាមមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្តខ្លះមានតែរថយន្តទៅត្រួតពិនិត្យលក្ខណៈបច្ចេកទេសប្រមាណតែ៣០ទៅ៥០គ្រឿងប៉ុណ្ណោះ ប៉ុន្តែចាប់ពីថ្ងៃចន្ទមកនេះ មានការកើនឡើងពី៣០០ទៅ៥០០គ្រឿង និងកើនជារៀងរាល់ថ្ងៃថែមទៀតផង ។
លោក អ៊ុន វ៉ាត បានបញ្ជាក់ថា សម្រាប់នៅរាជធានីភ្នំពេញ មានមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្ត ចំនួន៥ទីតាំង គឺទី១-នៅឬស្សីកែវឬជិតស្នងការនគរបាលរាជធានីភ្នំពេញ ទី២-មជ្ឈមណ្ឌលត្រួតពិនិត្យចំការដូង ទី៣-មជ្ឈមណ្ឌលត្រួតពិនិត្យ វាលស្បូវ ទី៤មជ្ឈមណ្ឌលត្រួតពិនិត្យផ្លូវជាតិលេខ៦ ខណ្ឌជ្រោយចង្វារ និងទី៥-មជ្ឈមណ្ឌលត្រួតពិនិត្យបឹងបៃតង ខណ្ឌសែនសុខ ។
បើយោងតាមរបាយការណ៍របស់ក្រសួងសាធារណការ និងដឹកជញ្ជូន បានឲ្យដឹងថា គិតចាប់ពីថ្ងៃ២៣ ដល់៣០ ខែមេសា ឆ្នាំ២០២០ ការត្រួតពិនិត្យលក្ខណៈបច្ចេកទេសយានយន្ត(ឆៀក)នៅទូទាំងប្រទេស មាន ចំនួនសរុប១៧.១៨៩គ្រឿង ក្នុងនោះចំនួននៃការទៅទទួលសេវា មានការកើនឡើងខ្ពស់ជាងគេ ក្នុងមួយថ្ងៃ គឺថ្ងៃទី២៩ ខែមេសា ដែលមានចំនួនរហូតដល់ ៤.១១៦ គ្រឿង និងនៅថ្ងៃទី៣០ ខែមេសា មានចំនួនរហូតដល់៤.៤៣២គ្រឿង។
សូមបញ្ជាក់ថា ចន្លោះពីឆ្នាំ២០១៥ ដល់ឆ្នាំ២០១៩ ចំនួនយានយន្តដែលបានចុះបញ្ជីសម្រាប់នៅទូទាំងប្រទេសមានចំនួនសរុបជាង២លាន២៥ម៉ឺនគ្រឿង៕
ចែករំលែកព័តមាននេះ