រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា នាព្រឹកថ្ងៃទី១ ខែឧសភា ឆ្នាំ២០២០ នៅខណ្ឌសែនសុខក្នុងថ្ងៃដំបូងនេះ គេសង្កេតឃើញថា មានបងប្អូនប្រជាពលរដ្ឋដែលធ្វើដំណើរមួយចំនួនបានល្មើសនឹងច្បាប់ចរាចរណ៍ ហើយត្រូវបាននគរបាលចរាចរណ៍ធ្វើការឃាត់ម៉ូតូទុក…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា នាព្រឹកថ្ងៃទី១ ខែឧសភា ឆ្នាំ២០២០ នៅខណ្ឌសែនសុខក្នុងថ្ងៃដំបូងនេះ គេសង្កេតឃើញថា មានបងប្អូនប្រជាពលរដ្ឋដែលធ្វើដំណើរមួយចំនួនបានល្មើសនឹងច្បាប់ចរាចរណ៍ ហើយត្រូវបាននគរបាលចរាចរណ៍ធ្វើការឃាត់ម៉ូតូទុក ហើយនឹងដកហូតម៉ូតូ រួចធ្វើការផាកពិន័យភ្លាមៗផងដែរ។ ដោយនគរបាលចរាចរណ៍បានឃាត់ម៉ូតូទុកនៅនឹងកន្លែង រួចឱ្យម្ចាស់ម៉ូតូទៅបង់ការផាកពិន័យនៅអធិការដ្ឋាននគរបាលខណ្ឌសែនសុខ ក្រោយពីបានប្រកាន់ដៃផាកពិន័យហើយ ត្រូវយកមកប្រគល់ឱ្យនគរបាលចរាចរណ៍ ទើបអនុញ្ញាតិឱ្យត្រឡប់ទៅវិញ ចំណែកឯបងប្អូនណាដែលអត់ពាក់មួកសុវត្ថិភាពនោះក៏ដូចគ្នាដែរ គឺត្រូវទៅយកមួកសុវត្ថិភាពមកបង្ហាញនគរបាលចរាចរណ៍សិន ទើបអនុញ្ញាតឱ្យត្រឡប់វិញ ។
សេចក្តីរាយការណ៍បន្តថា ការអនុវត្តពង្រឹងច្បាប់ចរាចរណ៍ថ្មី គេសង្កេត់ឃើញថា បងប្អូនប្រជាពលរដ្ឋនៅតែមិនគោរពច្បាប់ចរាចរណ៍ ដោយមានអ្នកខ្លះជិះម៉ូតូអត់ពាក់មួកសុវត្ថិភាព ហើយអ្នកខ្លះទៀត ជិះម៉ូតូក៏អត់មានកញ្ចក់ក៏មាន ចំណែកអ្នកខ្លះទៀតយកលេសថា ផ្ទះនៅក្បែរៗនោះ ដោយជិះម៉ូតូទៅទិញបបរ ឬបាយឱ្យចៅជាដើម។
ហើយការអនុវត្តពង្រឹងច្បាប់ចរាចរណ៍ចាប់ផ្តើមនៅក្នុងថ្ងៃទី១នេះផងដែរ គេក៏សង្កេតឃើញថា មានរថយន្តមួយចំនួនយករថយន្តទៅឆៀក ដោយធ្វើដំណើរតាមតាមផ្លូវសម្តេចជាស៊ីម នៅក្បែរផ្សារទីក្រុងប៉ៃតងនេះ ។ ហើយក៏គេឃើញថា មានរថយន្តជាច្រើនបានតម្រៀបជាជួរ ដើម្បីនាំគ្នាមកធ្វើការឆៀកផងដែរ ខណៈពេលដែលការអនុវត្តពង្រឹងច្បាប់ចរាចរណ៍កំពុងតែចាប់ផ្តើមនៅក្នុងថ្ងៃទី១នេះ ។ ស្របពេលនោះគេក៏ឃើញថា មានរថយន្តជាច្រើនបាននាំគ្នាមកឈប់ចតរង់ចាំធ្វើការឆៀករថយន្តតាំងពីម៉ោង៤ទៀបភ្លឺរហូតមកដល់ព្រឹកនេះ ហើយអ្នកខ្លះទៀតយករថយន្តមកចតតាំងពីក្បាលល្ងាចម្សិលម៉ិញក៏មាន ដើម្បីរត់ចាំធ្វើការឆៀករថយន្ត ពេញទីតាំងកន្លែងឆៀករថយន្តយ៉ាងត្រៀបត្រា និងតាមដងផ្លូវផងដែរ ។
គួរបញ្ជាក់ថា នៅក្នុងការអនុវត្តពង្រឹងច្បាប់ចរាចរណ៍នេះផងដែរ សមត្ថកិច្ចក៏បានធ្វើការជាតារាងសម្រាប់ផាកពិន័យដោយយានយន្តគ្រប់ប្រភេទ ដាក់ប្រចាំនៅទីតាំងគោលដៅកន្លែងផាកពិន័យនេះតែម្តង ។ (កែសម្រួលដោយ ៖ បុប្ផា)
ចែករំលែកព័តមាននេះ